ໂດຍ: ພິດສະໄໝ
ໃນເດືອນກໍລະກົດ ແລະ ເດືອນສິງຫາ 2019 ຫຼາຍໜ່ວຍພັກທີ່ຂຶ້ນກັບອົງຄະນະພັກກະຊວງພະລັງງານ ແລະ ບໍ່ແຮ່ ໄດ້ດຳເນີນກອງປະຊຸມໃຫຍ່ຂັ້ນຂອງຕົນຂຶ້ນ ຊຶ່ງລວມມີ 9 ໜ່ວຍພັກຄື: 1. ໜ່ວຍພັກສະຖາບັນສົ່ງເສີມ ພະລັງງານທົດແທນ, 2. ໜ່ວຍພັກກົມຄຸ້ມຄອງພະລັງງານ, 3. ໜ່ວຍພັກສະຖາບັນຄົ້ນຄວ້າພະລັງງານ ແລະ ບໍ່ແຮ່, 4. ໜ່ວຍພັກກົມທໍລະນີສາດ ແລະ ແຮ່ທາດ, 5. ໜ່ວຍພັກກົມກວດກາ, 6. ໜ່ວຍພັກກົມ ຄຸ້ມຄອງບໍ່ແຮ່, 7. ໜ່ວຍພັກກົມທຸລະກິດພະລັງງານ, 8. ໜ່ວຍພັກກົມນິຕິກຳ. 9. ໜ່ວຍພັກກົມຈັດຕັ້ງ ແລະ ພະນັກງານ; ເປັນກຽດເຂົ້າຮ່ວມກອງປະຊຸມດັ່ງກ່າວມີສະຫາຍ ປອ ຄຳມະນີ ອິນທິລາດ ເລຂາຄະນະພັກກະຊວງພະລັງງານ ແລະ ບໍ່ແຮ່, ມີບັນດາສະຫາຍເລຂາໜ່ວຍພັກອ້ອມຂ້າງ, ສະມາຊິກພັກ ແລະ ແຂກຖືກເຊີນເຂົ້າຮ່ວມຢ່າງພ້ອມພຽງ.
ໃນພິທີດັ່ງກ່າວ ເລຂາໜ່ວຍພັກແຕ່ລະໜ່ວຍໄດ້ຂຶ້ນຜ່ານຮ່າງບົດລາຍງານການເມືອງໃນສະໄໝ ຜ່ານມາ ເຊິ່ງຄະນະໜ່ວຍພັກ ໄດ້ເອົາໃຈໃສ່ຊີ້ນຳ-ນຳພາສະມາຊິກພັກ-ພະນັກງານໃນຄວາມຮັບຜິດຊອບ ຂອງໜ່ວຍພັກ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ, ມະຕິກອງປະຊຸມໃຫຍ່ ຄັ້ງທີ II ຂອງອົງຄະນະພັກກະຊວງພະລັງງານ ແລະ ບໍ່ແຮ່ ກໍ່ຄືມະຕິກອງປະຊຸມໃຫຍ່ຄັ້ງທີ່ຜ່ານມາຂອງໜ່ວຍພັກຕົນ. ຜ່ານການຈັດຕັ້ງປະຕິບັດວຽກງານໃນໄລຍະຜ່ານມາສາມາດຍາດໄດ້ຜົນສຳເລັດຫຼາຍດ້ານ ໂດຍສະ ເພາະຄະນະໜ່ວຍພັກໄດ້ຖືເອົາວຽກງານສຶກສາອົບຮົມການເມືອງ-ແນວຄິດເປັນກົກ ນຳພາວຽກງານວິຊາສະເພາະ ແລະ ວຽກງານປິ່ນອ້ອມທີ່ໜ່ວຍພັກມີໜ້າທີ່ເປັນເສນາທິການໃຫ້ຄະນະພັກກະຊວງ.
ໃນວາລະກອງປະຊຸມຂອງ 9 ໜ່ວຍພັກໄດ້ມີການປ່ອນບັດເລືອກຕັ້ງເອົາຄະນະໜ່ວຍພັກຊຸດໃໝ່ ເພື່ອເປັນຫຼັກແຫຼ່ງແກ່ນສານໃນການຊີ້ນຳ-ນຳພາຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງນີ້ໃຫ້ປະກົດເປັນຈິງ. ຜົນການປ່ອນບັດເລືອກຕັ້ງໄດ້ຄະນະໜ່ວຍພັກຊຸດໃໝ່ ດັ່ງນີ້: 1. ໜ່ວຍພັກສະຖາບັນສົ່ງເສີມ ພະລັງງານທົດແທນ ມີສະຫາຍ ຈັນໂທ ມີລັດຕະນະແພງ ເປັນເລຂາໜ່ວຍພັກ, ສະຫາຍ ປອ ເສີມຄຳ ທຸມມະວົງສາ ເປັນຮອງເລຂາ ແລະ ສະຫາຍ ຄຳໝັ້ນ ສໍປະເສີດ ເປັນປະທານກວດກາ; 2. ໜ່ວຍພັກກົມຄຸ້ມຄອງພະລັງງານ ມີສະຫາຍ ບົວເທບ ມາໄລຄຳ ເປັນເລຂາໜ່ວຍພັກ, ສະຫາຍ ຫຸມພັນ ວົງພະຈັນ ເປັນຮອງເລຂາ ແລະ ສະຫາຍ ວຽງໄຊ ຈັນທາ ເປັນປະທານກວດກາ; 3. ໜ່ວຍພັກສະຖາບັນຄົ້ນຄວ້າພະລັງງານ ແລະ ບໍ່ແຮ່ ມີສະຫາຍ ສີມອນ ພິຈິດ ເປັນເລຂາໜ່ວຍພັກ, ສະຫາຍ ພູວຽງ ແກ້ວບຸບຜາ ເປັນຮອງເລຂາ ແລະ ສະຫາຍ ອະນຸສັກ ເປັນປະທານກວດກາ; 4. ໜ່ວຍພັກກົມທໍລະນີສາດ ແລະ ແຮ່ທາດ ມີສະຫາຍ ແກ້ວ ຄຳຜາວົງ ເປັນເລຂາໜ່ວຍພັກ, ສະຫາຍ ຈັນທະລາ ແກ້ວຫາວົງ ເປັນຮອງເລຂາ ແລະ ສະຫາຍ ລາວຈູ່ ໂຊຕູ້ກີ້ ເປັນປະທານກວດກາ; 5. ໜ່ວຍພັກກົມກວດກາ ມີສະຫາຍ ຄຳຫຼ້າ ວິຈິດວົງສາ ເປັນເລຂາໜ່ວຍພັກ, ສະຫາຍ ຈັນທະເລດ ວໍລະບຸດ ເປັນຮອງເລຂາ ແລະ ສະຫາຍ ວົງທອງ ທີມະຫາໄຊ ເປັນປະທານກວດກາ; 6. ໜ່ວຍພັກກົມ ຄຸ້ມຄອງບໍ່ແຮ່ ມີສະຫາຍ ສຸຂັນສັກ ສີສຸກ ເປັນເລຂາໜ່ວຍພັກ, ສະຫາຍ ບຸນຍົງ ສີດາວົງ ເປັນຮອງເລຂາ ແລະ ສະຫາຍ ກົງຄຳ ເປັນປະທານກວດກາ; 7. ໜ່ວຍພັກກົມທຸລະກິດພະລັງງານ ມີສະຫາຍ ສົມພິດ ແກ້ວພິຈິດ ເປັນເລຂາໜ່ວຍພັກ, ສະຫາຍ ປອ ອາຄົມເດດ ວົງໄຊ ເປັນຮອງເລຂາ ແລະ ສະຫາຍ ບຸນທຽມ ໄຊສົງຄາມ ເປັນປະທານກວດກາ; 8. ໜ່ວຍພັກກົມນິຕິກຳ ມີສະຫາຍ ຄຳໂສ້ ກຸໂພຄຳ ເປັນເລຂາໜ່ວຍພັກ, ສະຫາຍ ນາງແສງເດືອນ ວົງອິນ ເປັນຮອງເລຂາ; 9. ໜ່ວຍພັກກົມຈັດຕັ້ງ ແລະ ພະນັກງານ ມີສະຫາຍ ທອງຂັນ ພິມວິໄລ ເປັນເລຂາໜ່ວຍພັກ, ສະຫາຍມ້ອນ ເພັດພູໄທ ເປັນຮອງເລຂາ ແລະ ສະຫາຍ ນາງສຸກສອນ ຈຳປາສຸກ ເປັນປະທານກວດກາ. ພ້ອມນີ້ຜູ້ແທນກອງປະຊຸມຍັງໄດ້ປ່ອນບັດເລືອກຕັ້ງເອົາຜູ້ແທນສົມບູນ ແລະ ສຳຮອງຂອງໜ່ວຍພັກຕົນໄປເຂົ້າຮ່ວມກອງປະຊຸມໃຫຍ່ອົງຄະນະພັກກະຊວງພະລັງງານ ແລະ ບໍ່ແຮ່ ຄັ້ງທີ III ທີ່ຈະມາເຖິງ.
ເພື່ອເຮັດໃຫ້ກອງປະຊຸມມີຄວາມໝາຍ ແລະ ເນື້ອໃນເລິກເຊິ່ງ, ກອງປະຊຸມໄດ້ຮັບຟັງການໂອ້ລົມຂອງສະຫາຍ ປອ ຄຳມະນີ ອິນທິລາດ ເລຂາຄະນະພັກກະຊວງໄດ້ຍ້ອງຍໍຊົມເຊີຍການນຳພາຂອງຄະນະໜ່ວຍພັກ ແລະ ໃຫ້ທິດຊີ້ນຳໃນຕໍ່ໜ້າ ພ້ອມກັບເນັ້ນໜັກບາງຈຸດສຳຄັນ ທີ່ຄະນະໜ່ວຍພັກ, ສະມາຊິກພັກທຸກສະຫາຍ ຕ້ອງໄດ້ເພີ່ມທະວີວຽກງານສຶກສາອົບຮົມການເມືອງແນວຄິດ, ການຈັດຕັ້ງ ແລະ ແບບແຜນວິທີເຮັດວຽກ, ເປັນເຈົ້າການໃນການຈັດຕັ້ງປະຕິບັດແນວທາງນະໂຍບາຍຂອງພັກ, ລະບຽບກົດໝາຍຂອງລັດດ້ວຍຄວາມເປັນເຈົ້າການ ແລະ ຄວາມຮັບຜິດຊອບສູງ ພ້ອມກັນສ້າງໜ່ວຍພັກຂອງຕົນໃຫ້ກາຍເປັນໜ່ວຍພັກ ປອດໃສ ເຂັ້ມແຂງ ໜັກແໜ້ນ ເຮັດສຳເລັດໜ້າທີ່ການເມືອງເປັນເສນາທິການໃຫ້ຄະນະພັກກະຊວງຕາມການມອບໝາຍ.
