ໂດຍ: ຄອນຄຳ
ປະຕິບັດຕາມຄຳສັ່ງຂອງຄະນະເລຂາທິການສູນກາງພັກສະບັບເລກທີ 04/ຄລສພ, ລົງວັນທີ 7 ພຶດສະພາ 2018 ວ່າດ້ວຍການກະກຽມດຳເນີນກອງປະຊຸມໃຫຍ່ອົງຄະນະພັກກະຊວງ-ອົງການ, ແຂວງ-ນະຄອນຫຼວງ, ອົງຄະນະພັກເມືອງ-ນະຄອນ ແລະ ຮາກຖານພັກທົ່ວປະເທດ ແລະ ມະຕິຕົກລົງຂອງຄະນະປະຈຳພັກກະຊວງສຶກສາທິການ ແລະ ກິລາສະບັບເລກທີ 117/ຄພສກ, ລົງວັນທີ 25 ມີນາ 2020 ວ່າດ້ວຍການແຕ່ງຕັ້ງຄະນະຮັບຜິດຊອບກະກຽມ ແລະ ດຳເນີນກອງປະຊຸມໃຫຍ່ອົງຄະນະພັກ ຄັ້ງທີ IX.
ໃນວັນທີ 28 ຕຸລາ 2020 ກະຊວງສຶກສາທິການ ແລະ ກິລາໄດ້ເປີດກອງປະຊຸມທາບທາມບຸກຄະລາກອນອອກສະໝັກຮັບເລືອກຕັ້ງຄະນະບໍລິຫານງານພັກກະຊວງ ສະໄໝທີ IX, ຮອບ III ທີ່ສະໂມສອນໃຫຍ່ຄະນະເສດຖະສາດ-ບໍລິຫານທຸລະກິດ, ມະຫາວິທະຍາໄລແຫ່ງຊາດ ພາຍໃຕ້ການເປັນປະທານຂອງສະຫາຍ ນາງ ແສງເດືອນ ຫຼ້າຈັນທະບູນ ກຳມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງສຶກສາທິການ ແລະ ກິລາ, ມີຕາງໜ້າຫ້ອງວ່າການສູນກາງພັກ, ຄະນະກວດກາສູນກາງພັກ, ຄະນະຈັດຕັ້ງສູນກາງພັກ ພ້ອມດ້ວຍສະມາຊິກພັກເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ຜ່ານຮ່າງລາຍງານການເມືອງ ສະຫລຸບຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງຜ່ານມາ, ຜ່ານຮ່າງແຜນພັດທະນາການສຶກສາ ແລະ ກິລາ 5 ໃນປີຕໍ່ໜ້າ (2021-2025) ແລະ ຜ່ານຮ່າງບົດສຳຫຼວດການນຳພາລວມຂອງຄະນະພັກກະຊວງ ເພື່ອພ້ອມກັນປະກອບຄຳເຫັນໃສ່ຮ່າງເອກະສານດັ່ງກ່າວໃຫ້ມີເນື້ອໃນສອດ ຄ່ອງຄົບຖ້ວນຕາມຄວາມເປັນຈິງ ແລະ ສາມາດຈັດຕັ້ງປະຕິບັດໄດ້ຕາມທ່າແຮງບົ່ມຊ້ອນທີ່ມີ. ພ້ອມນີ້ ກອງປະຊຸມຍັງໄດ້ດຳເນີນການທາບທາມບຸກຄະລາກອນຮອບທີ III ເພື່ອອອກສະໝັກຮັບເລືອກຕັ້ງເຂົ້າໃນຄະນະບໍລິຫານງານພັກກະຊວງ ສະໄໝທີ IX; ທາບທາມເປົ້າໝາຍເລຂາ, ຮອງເລຂາ, ຄະນະປະຈຳພັກກະຊວງ, ປະທານ, ແລະ ຮອງປະ ທານຄະນະກວດກາ.
ກອງປະຊຸມຮຽກຮ້ອງມາຍັງບັນດາສະຫາຍສະມາຊິກພັກທົ່ວອົງຄະນະພັກກະຊວງສຶກສາທິການ ແລະ ກິລາຍົກສູງຄວາມຮັບຜິດຊອບ ໃນການຄັດເລືອກບຸກຄະລາກອນອອກສະໝັກຮັບເລືອກຕັ້ງ ແລະ ປະກອບຄຳເຫັນໃສ່ເອກະສານສຳຄັນຂອງກອງປະຊຸມໃຫ້ໄດ້ຮັບຜົນສຳເລັດຕາມລະດັບຄາດໝາຍ ເປັນຕົ້ນເອົາໃຈໃສ່ດ້ານໂຄງປະກອບຂອງຄະນະບໍລິຫານງານພັກຕ້ອງຮັບປະກັນ 3 ຮຸ່ນ: ຮຸ່ນອາວຸໂສ, ຮຸ່ນກາງ ແລະ ຮຸ່ນໜຸ່ມ, ມີຜູ້ເກົ່າ, ຜູ້ໃໝ່, ເຜົ່າ ແລະ ເພດຍິງ ຕາມຈຳນວນທີ່ເໝາະສົມ, ກຳແໜ້ນ ແລະ ຄຳນຶງເຖິງມາດຕະຖານເງື່ອນໄຂ ແລະ ໂຄງປະກອບໃຫ້ຖືກຕ້ອງຕາມນິຕິກຳ ທີ່ກຳນົດໄວ້.
