ໂດຍ: ວິລະສະໄໝ

          ໃນຕອນບ່າຍ ວັນທີ  25 ທັນວາ 2020 ກະຊວງວິທະຍາສາດ ແລະ ເຕັກໂນໂລຊີ ໄດ້ຈັດພິທີປິດຊຸດຝຶກ ອົບຮົມທິດສະດີການເມືອງ-ການປົກຄອງໄລຍະສັ້ນ 45 ວັນ ຊຸດທີ IV ໂດຍການເຂົ້າຮ່ວມຂອງສະຫາຍ ຫຸມພັນ ອິນທະຣາດ  ຄະນະພັກກະຊວງ, ຮອງລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ແລະ ສະຫາຍ ນາງ ໄກສອນ ຈັນສີນາ ຄະນະພັກ, ຫົວໜ້າກົມການຮຽນ-ການສອນ ສະຖາບັນການເມືອງ ແລະ ການປົກຄອງແຫ່ງຊາດ, ມີບັນດາສະຫາຍເລຂາ, ຮອງເລຂາໜ່ວຍພັກ, ຕາງໜ້າຈາກ 3 ອົງການຈັດຕັ້ງມະຫາຊົນ, ນັກຝຶກອົບຮົມ ແລະ ຕາງໜ້າຄະນະຮັບຜິດຊອບຊຸດຝຶກອົບຮົມ ເຂົ້າຮ່ວມຢ່າງພ້ອມພຽງ.

          ຊຸດຝຶກອົບຮົມທິດສະດີການເມືອງ ແລະ ການປົກຄອງ ໄລຍະສັ້ນ 45 ວັນ ຊຸດທີ IV ຄັ້ງນີ້ ໄດ້ເລີ່ມມາແຕ່ ວັນທີ 26 ຕຸລາ 2020, ມີນັກຝຶກອົບຮົມອ້ອມຂ້າງກະຊວງ  45 ສະຫາຍ, ຍິງ 18 ສະຫາຍ, ແບ່ງການຮຽນອອກເປັນ 5 ພາກວິຊາຄື: ພາກວິຊາປັດຊະຍາມາກ-ເລນິນ 5 ບົດ, ພາກວິຊາເສດຖະສາດການເມືອງ 8 ບົດ, ພາກວິຊາລັດທິ ສັງຄົມນິຍົມວິທະຍາສາດມີ 6 ບົດ, ພາກວິຊາບໍລິຫານສາດ ມີ 8 ບົດ ແລະ ພາກວິຊາກໍ່ສ້າງພັກ 5 ບົດ. ຜ່ານການຝຶກອົບຮົມເຫັນວ່າ ຜູ້ເຂົ້າຮ່ວມມີຄວາມຮັບຮູ້, ເຂົ້າໃຈ ແລະ ມີຄວາມກະຕືລືລົ້ນ ເອົາໃຈໃສ່ໃນການຊອກ ຮູ້ຮ່ຳຮຽນ, ກ້າສະແດງອອກໃນການຕັ້ງຄຳຖາມ ປະກອບຄຳເຫັນເພື່ອແລກປ່ຽນບົດຮຽນທາງດ້ານທິດສະດີ ແລະ ພຶດຕິກຳໄດ້ເປັນຢ່າງດີ.

          ໃນຕອນທ້າຍຂອງພິທີ ຜູ້ເຂົ້າຮ່ວມໄດ້ຮັບຟັງຄຳເຫັນໂອ້ລົມຈາກສະຫາຍ ຫຸມພັນ ອິນທະຣາດ ເຊິ່ງໄດ້ເນັ້ນໃຫ້ ຜູ້ເຂົ້າຮ່ວມຮັບການຝຶກອົບຮົມຄັ້ງນີ້ ພ້ອມກັນນຳເອົາບົດຮຽນທີ່ໄດ້ຮຽນມານັ້ນ ໝູນໃຊ້ເຂົ້າໃນການຈັດຕັ້ງປະຕິບັດໜ້າທີ່ວຽກງານຂອງຕົນໃຫ້ມີຜົນສຳເລັດໃໝ່ຢ່າງຕັ້ງໜ້າ…ຯ