ຂ່າວ: ລັດດາວັນ ສີຫານຸວົງ
ພາບ: ບານ ມູນປະເສີດ
ກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານຈັດຕັ້ງ, ກໍ່ສ້າງພັກ-ພະນັກງານ ຂອງຂະແໜງສາທາລະນະສຸກ ໃນໄລຍະ 5 ປີ (2016-2020) ແລະ ທິດທາງແຜນການ 5 ປີ (2021-2025) ໄດ້ຈັດຂຶ້ນໃນວັນທີ 18-19 ກຸມພາ 2022 ທີ່ໂຮງແຮມດອນຈັນ ໂດຍການເປັນປະທານຂອງສະຫາຍ ປອ. ດຣ. ບຸນແຝງ ພູມມະໄລສິດ ກຳມະການສູນກາງພັກ, ເລຂາຄະນະພັກ, ລັດຖະມົນຕີກະຊວງສາທາລະນະສຸກ, ມີຄະນະພັກກະຊວງ, ຄະນະໜ່ວຍພັກກົມ, ຫົວໜ້າພະແນກອ້ອມຂ້າງກະຊວງ ແລະ ຕາງໜ້າຂະແໜງສາທາລະນະສຸກບັນດາແຂວງ-ນະຄອນຫຼວງເຂົ້າຮ່ວມ 150 ກວ່າສະຫາຍ, ຍິງ 60 ສະຫາຍ, ໃຫ້ກຽດເຂົ້າຮ່ວມ ແລະ ໂອ້ລົມຕໍ່ກອງປະຊຸມໂດຍ ສະຫາຍ ນາງ ສີໃສ ລືເດດມູນສອນ ກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ.
ກອງປະຊຸມຄັ້ງນີ້ ໄດ້ສະຫຼຸບຕີລາຄາການຈັດຕັ້ງປະຕິບັດວຽກງານຈັດຕັ້ງ, ກໍ່ສ້າງພັກ-ພະນັກງານ ທົ່ວຂະແໜງສາທາລະນະສຸກ ໄລຍະ 5 ປີ (2016-2020) ເຊິ່ງຜ່ານການຕີລາຄາເຫັນວ່າ ຄະນະພັກທຸກຂັ້ນໄດ້ເອົາໃຈໃສ່ເຮັດວຽກງານການເມືອງ-ແນວຄິດເປັນກົກ, ສະມາຊິກພັກ-ພະນັກງານ ຍັງມີທັດສະນະຫຼັກໝັ້ນຖືກຕ້ອງ, ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ຈຳແນກມິດສັດຕູຈະແຈ້ງ, ມີຄວາມຈົ່ງຮັກພັກດີ ແລະ ເຊື່ອໝັ້ນຕໍ່ການນຳພາຂອງພັກ, ມີຄວາມສາມັກຄີເປັນເອກະພາບ ສຸມໃສ່ປະຕິບັດໜ້າທີ່ການເມືອງ, ໜ້າທີ່ວິຊາສະເພາະດ້ວຍຄວາມຮັບຜິດຊອບສູງ ແລະ ມີຜົນສຳເລັດຢ່າງຕໍ່ເນື່ອງ ຕິດພັນກັບວຽກງານກໍ່ສ້າງພັກໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ ເຊິ່ງ 5 ປີຜ່ານມາ ສາມາດຕີລາຄາ ແລະ ປະເມີນຮັບຮອງໜ່ວຍພັກເຂັ້ມແຂງ-ຮູ້ນຳພາຮອບດ້ານ ກໍ່ຄືໜ່ວຍພັກປອດໃສ, ເຂັ້ມແຂງ, ໜັກແໜ້ນ ໄດ້ທັງໝົດ 153 ເທື່ອໜ່ວຍ. ການຕີລາຄາແບ່ງປະເພດສະມາຊິກພັກທົ່ວອົງຄະນະພັກກະຊວງໃນແຕ່ລະປີ ສາມາດຕີລາຄາໄດ້ສະມາຊິກພັກແຂງ ຈຳນວນ 1007 ເທື່ອສະຫາຍ, ກາງ 120 ເທື່ອສະຫາຍ, ສະມາຊິກພັກອ່ອນ 1 ສະຫາຍ ແລະ ບໍ່ໄດ້ຈັດປະເພດ 31 ເທື່ອສະຫາຍ.
ໃນໄລຍະປີ 2016-2020 ຜ່ານມາ, ພະນັກງານ-ລັດຖະກອນຂະແໜງສາທາລະນະສຸກໄດ້ເພີ່ມຂື້ນຢ່າງຕໍ່ເນື່ອງ, ປະຈຸບັນມີພະນັກງານທັງໝົດ 20,351 ຄົນ (ເພີ້ມຂື້ນຈາກປີ 2015 ຈໍານວນ 303 ຄົນ ເທົ່າກັບ 1,48%), ຍິງ 13,328 ຄົນ (65,5% ຂອງລັດຖະກອນທັງໝົດ). ໃນນັ້ນ, ຢູ່ຂັ້ນສູນກາງ 3.721 ຄົນ (ຫຼຸດລົງຈາກປີ 2015 ຈໍານວນ 214 ຄົນ, ຫຼຸດ 5,7%), ຢູ່ຂັ້ນແຂວງ 4.945 ຄົນ (ເພີ້ມຂຶ້ນຈາກປີ 2015 ຈໍານວນ 524 ເທົ່າກັບ 10,5%), ຢູ່ຂັ້ນເມືອງ 7.235 (ຫຼຸດລົງ 93 ຄົນ ທຽບໃສ່ປີ 2015 ຫຼຸດ 1,2%), ໂຮງໝໍນ້ອຍ 4.319 ຄົນ (ທຽບໃສ່ປີ 2015 ເພີ້ມຂື້ນ 64 ຄົນ ເທົ່າກັບ 1,4%) ແລະ ຂັ້ນບ້ານ 131 ຄົນ (ທຽບໃສປີ 2015 ເພີ້ມຂຶ້ນ 22 ຄົນ ເທົ່າກັບ 16,7%).
ການບັນຈຸ ແລະ ສັບຊ້ອນລັດຖະກອນໃໝ່ແມ່ນສຸມໃສ່ທ້ອງຖີ່ນ ມີຈໍານວນ 2.050 ຕໍາແໜ່ງ, ຂັ້ນສູນກາງ 547 ຄົນ (26,7%), ຂັ້ນແຂວງ 272 ຄົນ (13,2%), ຂັ້ນເມືອງ 345 ຄົນ (16,8%) ແລະ ໂຮງໝໍນ້ອຍ 886 ຄົນ (43,2%). ໃນນີ້ ແມ່ນໃຫ້ບູລິມະສິດ ຂັ້ນໂຮງໝໍນ້ອຍທີ່ມີພະນັກງານບໍ່ຮອດ 3 ຄົນ, ບໍ່ມີແພດປິ່ນປົວ ແລະ ຜະດຸງຄັນ ເພື່ອແນໃສ່ປັບປຸງການບໍລິການສຸຂະພາບຢູ່ຂັ້ນທ້ອງຖິ່ນຮາກຖານ ໃຫ້ດີຂຶ້ນກວ່າເກົ່າ.
ການຄຸ້ມຄອງສະຖິຕິຂໍ້ມູນພະນັງການ ໄດ້ນໍາໃຊ້ລະບົບຄຸ້ມຄອງທີ່ທັນສະໄໝ ເຊື່ອມຕໍ່ແຕ່ຂັ້ນກະຊວງຮອດຂັ້ນໂຮງໝໍນ້ອຍ; ໄດ້ສ້າງແຜນພັດທະນາພະນັກງານສາທາລະນະສຸກຂັ້ນແຂວງສຳເລັດ 18 ແຂວງ ໃນປີ 2017 ແລະ ໄດ້ກຳນົດທິດການປະຕິຮູບພະນັກງານສາທາລະນະສຸກ ຮອດປີ 2030 ເພື່ອເປັນບ່ອນອີງໃນການວາງແຜນ ແລະ ການຄຸ້ມຄອງພະນັກງານສາທາລະນະສຸກ.
ໄດ້ຄົ້ນຄວ້າ ແລະ ນຳສະເໜີແຕ່ງຕັ້ງພະນັກງານ ຮັບຕຳແໜ່ງບໍລິຫານປະເພດຕ່າງໆ ທັງຢູ່ຂັ້ນສູນກາງ ແລະ ທ້ອງຖິ່ນ ຈໍານວນ 892 ຕໍາແໜ່ງ; ປະຈຸບັນ ທົ່ວຂະແໜງສາທາລະນະສຸກ ພະນັກງານ-ລັດຖະກອນ ມີຕຳແໜ່ງບໍລິຫານທັງໝົດ 5.728 ຄົນ ກວມ 28,1% ຂອງຈໍານວນລັດຖະກອນທັງໝົດ ໃນນັ້ນເປັນເພດຍິງ 3.136 ຄົນ ກວມ 54,7%. ນອກນັ້ນ, ຍັງໄດ້ມອບໃບຍ້ອງຍໍ ແລະ ລາງວັນໃຫ້ໂຮງໝໍຊຸມຊົນ ແລະ ໂຮງໝໍນ້ອຍດີເດັ່ນ ຈຳນວນ 10 ແຫ່ງ ໃນທົ່ວປະເທດ, ໃນນີ້ ໄດ້ຮັບລາງວັນດີເດັ່ນທີ 1-3 ຈຳນວນ 4 ແຫ່ງ ແລະ ລາງວັນຊົມເຊີຍ 6 ແຫ່ງ.
ຕອນທ້າຍຂອງກອງປະຊຸມ ຜູ້ເຂົ້າຮ່ວມໄດ້ຮັບຟັງຄຳເຫັນໂອ້ລົມຈາກສະຫາຍ ນາງ ສີໃສ ລືເດດມູນສອນ ກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ເຊິ່ງສະຫາຍໄດ້ຍ້ອງຍໍຊົມເຊີຍຕໍ່ຜົນງານ 5 ປີຜ່ານມາ ແລະ ເນັ້ນໜັກໃຫ້ຄະນະພັກ ຄະນະນຳແຕ່ລະຂັ້ນ ເອົາໃຈໃສ່ຄົ້ນຄວ້າຜັນຂະຫຍາຍແນວທາງການຈັດຕັ້ງຂອງພັກໃນໄລຍະໃໝ່, ແນວຄິດໄກສອນ ພົມວິຫານ, ການໝູນໃຊ້ທິດສະດີ ແລະ ພຶດຕິກໍາວຽກງານຕົວຈິງໃຫ້ກົມກຽວ; ເພີ່ມຄວາມເປັນແບບຢ່າງນໍາໜ້າໃນທຸກດ້ານ, ກ້າຫານໃນການສະເໜີບັນຫາ ແລະ ຕັດສິນບັນຫາໃຫ້ທັນສະພາບການ, ພັດທະນາ ແລະ ຍົກສູງບົດບາດການນຳພາຂອງພັກຢ່າງຮອບດ້ານ, ບຸກຄະລາກອນຂະແໜງສາທາລະນະສຸກ ເວົ້າລວມ, ເວົ້າສະເພາະ ບັນດາແພດໝໍສ່ວນຫຼາຍແມ່ນປັນຍາຊົນ, ຜູ້ຊ່ຽວຊານ ແລະ ມີລະດັບຄວາມຮູ້ຄວາມສາມາດວິຊາສະເພາະອັນແນ່ນອນ ເພື່ອປິ່ນປົວ ແລະ ກອບກູ້ເອົາຊີວິດຂອງມວນມະນຸດ. ສະນັ້ນ, ສະມາຊິກພັກ-ພະນັກງານຂອງຂະແໜງສາທາລະນະສຸກ ຍິ່ງຈໍາເປັນຕ້ອງມີຫລັກໝັ້ນການເມືອງສູງ, ມີຄຸນສົມບັດສິນທໍາປະຕິວັດ, ມີຄວາມຮູ້ຄວາມສາມາດ, ຈັນຍາທໍາ, ຈັນຍາບັນ, ມີນໍ້າໃຈເສຍສະຫຼະ, ຮັກ ແລະ ຈິງໃຈປະຕິບັດໜ້າທີບໍລິການຮັບໃຊ້ປະຊາຊົນ ເພື່ອປະຕິບັດນະໂຍບາຍ 5 ດີ 1 ພໍໃຈ (5ດີ: ຕ້ອນຮັບດີ, ສະອາດດີ, ສະດວກດີ, ບົ່ງມະຕິຊັດເຈນດີ ແລະ ປິ່ນປົວດີ; 1 ພໍໃຈ: ຄົນເຈັບພໍໃຈ) ແນ່ໃສ່ເພື່ອລຸດຜ່ອນຫາງສຽງຈົ່ມວ່າຂອງຜູ້ມາໃຊ້ບໍລິການຢູ່ສະຖານການປີ່ນປົວທາງສູນກາງ ແລະ ທ້ອງຖິ່ນເທື່ອລະກ້າວ.
