ຂ່າວ: ນ.ວິລະສະໄໝ

ພາບ: ບານ ມູນປະເສີດ

     ເພື່ອສືບຕໍ່ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ່ XI ຂອງພັກ ເວົ້າລວມ, ເວົ້້າສະເພາະ ການຜັນຂະຫຍາຍເນື້ອໃນກອງປະຊຸມວຽກງານຈັດຕັ້ງທົ່ວປະເທດຄັ້ງທີ XI ໂດຍສະເພາະແມ່ນການປະຕິບັດຕາມຄຳສັ່ງແນະນຳ ຂອງຄະນະເລຂາທິການສູນກາງພັກ ວ່າດ້ວຍການຈັດຕັ້ງຜັັນຂະຫຍາຍເນື້ອໃນມະຕິກອງປະຊຸມວຽກງານຈັດຕັ້ງທົ່ວປະເທດ  ຄັ້ງທີ XI ສະບັບ ເລກທີ 219/ຄລສພ ລົງວັນທີ 8 ພະຈິກ 2021. ໃນວັນທີ 28 ກຸມພາ 2022 ທີ່ກະຊວງກະສິກຳ ແລະ ປ່າໄມ້ໄດ້ຈັດກອງປະຊຸມສະຫຼຸບວຽກງານຈັດຕັ້ງ 5 ປີ (2016-2020) ແລະ ຜັນຂະຫຍາຍເນື້ອໃນມະຕິກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI ໂດຍການເປັນປະທານຂອງ ສະຫາຍ ເພັດ ພົມພິພັກ ກຳມະການສູນກາງພັກ ເລຂາຄະນະພັກ, ລັດຖະມົນຕີກະຊວງກະສິກຳ ແລະ ປ່າໄມ້, ມີບັນດາສະຫາຍຄະນະບໍລິຫານງານພັກກະຊວງ, ຄະນະກົມ ແລະ ທຽບເທົ່າອ້ອມຂ້າງກະຊວງ, ຄະນະພະແນກ ແລະ ຂະແໜງການກະສິກຳ ແລະ ປ່າໄມ້ ບັນດາແຂວງເຂົ້າຮ່ວມ.

     ກອງປະຊຸມຄັ້ງນີ້ ໄດ້ສະຫຼຸບຕີລາຄາວຽກງານຈັດຕັ້ງທົ່ວຂະແໜງກະສິກຳ ແລະ ປ່າໄມ້ 5 ປີ ແລະ ໄດ້ຜັນຂະຫຍາຍ ເຜີຍແຜ່ ເຊື່ອມຊຶມເອກະສານສຳຄັນ ດັ່ງນີ້:

1. ມະຕິ 04/ຄລສພ, ລົງວັນທີ 30 ກັນຍາ 2021 ວ່າດ້ວຍເພີ່ມທະວີການນຳພາຂອງພັກ ເພື່ອສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງວຽກງານພະນັກງານ,
2. ຄຳສັ່ງແນະນຳ ເລກທີ 219/ຄລສພ, ລົງວັນທີ 8 ພະຈິກ 2021 ວ່າດ້ວຍການຈັດຕັ້ງຜັນຂະຫຍາຍເນື້ອໃນມະຕິກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI;
3. ບົດສະຫຼຸບຕີລາຄາສະພາບການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ ແລະ ວຽກງານປັບປຸງກົງຈັກການຈັດຕັ້ງໃນໄລຍະ 5 ປີຜ່ານມາ (2016-2020) ແລະ ທິດທາງໜ້າທີ່ວຽກງານກໍ່ສ້າງພັກ-ພະນັກງານ ແລະ ວຽກງານປັບປຸງກົງຈັກການຈັດຕັ້ງໃນ 5 ປີຕໍ່ໜ້າ (2021-2025) ຂອງຄະນະຈັດຕັ້ງສູນກາງພັກ ສະເໜີຕໍ່ກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI;
4. ບົດລາຍງານການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ  ໃນທົ່ວພັກ ແລະ ທິດທາງໃນຕໍ່ໜ້າ ຂອງຄະນະຈັດຕັ້ງສູນກາງພັກ ຕໍ່ກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI;
5. ບົດລາຍງານການຫັນປ່ຽນຢ່າງແຂງແຮງ ການປັບປຸງການຈັດຕັ້ງ ຕິດພັນກັບການກຳນົດຕຳແໜ່ງງານຂອງກະຊວງພາຍໃນ ຕໍ່ກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI;
6. ບົດໂອ້ລົມຂອງສະຫາຍເລຂາທິການໃຫຍ່ຄະນະບໍລິຫານງານສູນກາງພັກ ຕໍ່ກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI;
7. ມະຕິກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI;
8. ຮ່າງບົດສະຫຼຸບຕີລາຄາສະພາບການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ ແລະ ວຽກງານປັບປຸງກົງຈັກການຈັດຕັ້ງ ໃນໄລຍະ 5 ປີຜ່ານມາ (2016-2020) ແລະ ທິດທາງໜ້າທີ່ວຽກງານກໍ່ສ້າງພັກ-ພະນັກງານ ແລະ ວຽກງານປັບປຸງກົງຈັກການຈັດຕັ້ງ ໃນ 5 ປີຕໍ່ໜ້າ (2021-2025) ຂອງຄະນະພັກກະຊວງກະສິກຳ ແລະ ປ່າໄມ້;
9. ຮ່າງບົດລາຍງານເພີ່ມເຕີມ ກ່ຽວກັບວຽກງານປັບປຸງກົງຈັກການຈັດຕັ້ງ ແລະ ການກຳນົດຕຳແໜ່ງງານ ຂອງກະຊວງກະສິກຳ ແລະ ປ່າໄມ້.

     ຫຼັງຈາກນັ້ນ, ​ຜູ້​​ແທນ​ກອງ​ປະຊຸມ​ໄດ້​ພ້ອມ​ກັນປະກອບ​ຄຳ​ເຫັນຕໍ່​ຮ່າງບົດສະຫຼຸບຕີລາຄາສະພາບການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ ແລະ ວຽກງານປັບປຸງກົງຈັກການຈັດຕັ້ງ ໃນໄລຍະ 5 ປີຜ່ານມາ ແລະ ທິດທາງໜ້າທີ່ວຽກງານກໍ່ສ້າງພັກ-ພະນັກງານ ແລະ ວຽກງານປັບປຸງກົງຈັກການຈັດຕັ້ງ ໃນ 5 ປີຕໍ່ໜ້າ ຂອງຄະນະພັກກະຊວງກະສິກຳ ແລະ ປ່າໄມ້ ເພື່ອເຮັດໃຫ້ເນື້້ອໃນຂອງບົດມີຄວາມ​ສົມບູນຍິ່ງ​ຂຶ້ນ.

     ໃນຕອນທ້າຍຂອງກອງປະຊຸມ ຜູ້​ເຂົ້າ​ຮ່ວມ​ໄດ້​ຮັບ​ຟັງຄຳ​ເຫັນ​ໂອ້​ລົມ​ຂອງ​ສະຫາຍ ເພັດ ພົມພິພັກ ກຳມະການສູນກາງພັກ ເລຂາຄະນະພັກ, ລັດຖະມົນຕີກະຊວງກະສິກຳ ແລະ ປ່າໄມ້ ເຊິ່ງສະຫາຍ​ໄດ້​ຍ້ອງຍໍ​ຊົມ​ເຊີຍ​ຕໍ່ຄະນະພັກ, ຄະນະນຳຂອງບັນດາກົມ, ຫ້ອງການ, ສະຖາບັນ ແລະ ຄະນະພັກ, ຄະນະນຳ ຂອງພະແນກກະສິກຳ ແລະ ປ່າໄມ້ແຂວງ-ນະຄອນຫຼວງ ກໍ່ຄືຖັນແຖວພະນັກງານຈັດຕັ້ງທີ່ເຊີດຊູຄວາມຮັບຜິດຊອບ ເອົາໃຈໃສ່ຊີ້ນຳ-ນຳພາເຄື່ອນໄຫວຈັດຕັ້ງຕະຫຼອດໄລຍະຜ່ານມາ,  ພາຍຫຼັງສຳເລັດກອງປະຊຸມຄັ້ງນີ້ ຈົ່ງພ້ອມກັນນຳເອົາເນື້ອໃນຈິດໃຈກອງປະຊຸມຄັ້ງນີ້ ໄປຄົ້ນຄວ້າ, ເຜີຍແຜ່-ເຊື່ອມຊຶມ ແລະ ຈັດຕັ້ງຜັນຂະຫຍາຍ ຢູ່ໃນວຽກງານຂອງຕົນຮັບຜິດຊອບ ເພື່ອເຮັດໃຫ້ວຽກງານຈັດຕັ້ງ ມີບາດກ້າວທີ່ດີ ດ້ວຍບາດກ້າວບຸກທະລຸ ແນໃສ່ສ້າງໃຫ້ການຈັດຕັ້ງມີຄວາມປອດໃສ, ເຂັ້ມແຂງ, ໜັກແໜ້ນ ເຮັດໃຫ້ການພັດທະນາວຽກງານຂະແໜງກະສິກຳ, ປ່າໄມ້ ແລະ ພັດທະນາຊົນນະບົດ ໜັກແໜ້ນ ແລະ ມີຄວາມເຂັ້ມແຂງເມືອໜ້າ.