ດຳເນີນຊີວິດການເມືອງທ້າຍສະໄໝຂອງຄະນະບໍລິຫານງານພັກກະຊວງເຕັກໂນໂລຊີ ແລະ ການສື່ສານ ສະໄໝທີ I
ຈຳນວນຜູ້ອ່ານ: 148
ອະນຸມັດວັນທີ:
11/03/2022
ແຫຼ່ງຂ່າວ: ກະຊວງເຕັກໂນໂລຊີ ແລະ ການສື່ສານ
ໃນວັນທີ 9 ມີນາ 2022, ທີ່ກະຊວງເຕັກໂນໂລຊີ ແລະ ການສື່ສານ ໄດ້ຈັດກອງປະຊຸມ ດຳເນີນຊີວິດການເມືອງ ຄະນະບໍລິຫານງານພັກກະຊວງເຕັກໂນໂລຊີ ແລະ ການສື່ສານ ສະໄໝທີ I ພາຍໃຕ້ການເປັນປະທານຂອງ ສະຫາຍ ບຸນທອງ ຈິດມະນີ, ກົມການເມືອງສູນກາງພັກ, ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດແຫ່ງ ສປປ ລາວ, ມີສະຫາຍ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ບັນດາສະຫາຍຄະນະຊີ້ນຳກອງປະຊຸມໃຫຍ່ຂັ້ນສູນກາງ, ບັນດາສະຫາຍຄະນະປະຈຳພັກ ແລະ ກຳມະການພັກ ກະຊວງເຕັກໂນໂລຊີ ແລະການສື່ສານເຂົ້າຮ່ວມຢ່າງພ້ອມພຽງ.
ກອງປະຊຸມໃນຄັ້ງນີ້ ຄະນະບໍລິຫານງານພັກ ກະຊວງເຕັກໂນໂລຊີ ແລະ ການສື່ສານ ໄດ້ດຳເນີນຊີວິດການເມືອງທ້າຍສະໄໝຂອງຕົນ, ການດຳເນີນຊີວິດການເມືອງ ໃນຄັ້ງນີ້ແມ່ນມີຄວາມໝາຍຄວາມສຳຄັນທີ່ສຸດ ແລະ ບັນດາສະຫາຍຄະນະບໍລິຫານງານພັກກະຊວງ ກໍໄດ້ມີຄວາມຮັບຜິດຊອບສູງ. ຊຶ່ງໃນກອງປະຊຸມໄດ້ພ້ອມກັນປະກອບຄຳເຫັນ ໃສ່ບົດສຳຫຼວດການນຳພາລວມ ຂອງຄະນະບໍລິຫານງານພັກ ກະຊວງເຕັກໂນໂລຊີ ແລະ ການສື່ສານ ໃນໄລຍະ 5 ປີ ຜ່ານມາ ແລະ ດຳເນີນການສຳຫຼວດກວດກາບຸກຄົນໃນຄະນະພັກ ຕໍ່ກັບບົດສຳຫຼວດການນຳພາລວມ ກໍໄດ້ຍົກໃຫ້ເຫັນຈຸດດີຜົນງານອັນພົ້ນເດັ່ນຂອງການເຄື່ອນໄຫວນຳພາ-ຊີ້ນຳຂອງຄະນະພັກ. ພ້ອມນັ້ນ, ກໍໄດ້ຍົກໃຫ້ເຫັນຈຸດອ່ອນ, ຂໍ້ຄົງຄ້າງ, ສາເຫດ ແລະ ບົດຮຽນທີ່ຖອດຖອນໄດ້ ພ້ອມທັງໄດ້ກຳນົດວິທີການ ແລະ ມາດຕະການແກ້ໄຂ ຈຸດອ່ອນ, ຂໍ້ຄົງຄ້າງ ແລະ ການກຳນົດທິດທາງແກ້ໄຂ ໃນການນຳພາ-ຊີ້ນຳ ຂອງຄະນະພັກໃນ 5 ປີ ຕໍ່ໜ້າ.
ໃນໂອກາດນີ້, ສະຫາຍ ບຸນທອງ ຈິດມະນີ ໄດ້ໃຫ້ທິດຊີ້ນຳII ຂອງອົງຄະນະພັກ ກະຊວງເຕັກໂນໂລຊີ ແລະການສື່ສານ ໃຫ້ມີຜົນສຳເລັດດີ ດັ່ງນີ້:
- ພາຍຫຼັງສຳເລັດການດຳເນີນຊີວິດການເມືອງໃນຄັ້ງນີ້ແລ້ວ ໃຫ້ບັນດາຄະນະພັກ ນໍາເອົາເນື້ອໃນຈິດໃຈຜົນສຳເລັດ ຂອງການດຳເນີນຊີວິດການເມືອງໃນຄັ້ງນີ້ໄປຜັນຂະຫຍາຍ ແລະ ແກ້ໄຂບັນຫາຕົວຈິງ ເພື່ອສ້າງການຫັນປ່ຽນໃໝ່ ທີ່ແຂງແຮງ ແລະ ເລິກເຊິ່ງ ຕາມທິດທີ່ພັກເຮົາວາງໄວ້.
- ໃຫ້ບັນດາສະຫາຍຄະນະພັກ ຮີບຮ້ອນຮຽບຮຽງ-ປັບປຸງຮ່າງລາຍງານການເມືອງ; ບົດສຳຫຼວດການນຳພາລວມ ຂອງຄະນະພັກ ແລະ ແຜນພັດທະນາຂະແໜງການເຕັກໂນໂລຊີ ແລະ ການສື່ສານ ໃນ 5 ປີ ຕໍ່ໜ້າ ໃຫ້ສອດຄ່ອງກັບມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 9 ກໍ່ຄືປະຕິບັດວາລະແຫ່ງຊາດ ທາງດ້ານເສດຖະກິດ-ການເງິນ ຂອງປະເທດ ທີ່ວາງອອກ ພ້ອມກັນຄົ້ນຄວ້າປະກອບຄຳເຫັນ ໃນເວລາທາບທາມຮອບທີ III ເຮັດໃຫ້ ທັງ 3 ເນື້ອໃນດັ່ງກ່າວ ເປັນຕົ້ນ ຮ່າງລາຍງານການເມືອງ ແລະ ແຜນພັດທະນາຂະແໜງການ ມີເນື້ອໃນຄົບຖ້ວນສົມບູນ, ສອດຄ່ອງ ແລະ ຕອບສະໜອງກັບການເລັ່ງທວງ ຂອງການຄຸ້ມຄອງບໍລິຫານລັດ ແລະ ການພັດທະນາເສດຖະກິດ-ສັງຄົມ ໃນເງື່ອນໄຂໃໝ່ ສອດຄ່ອງກັບການຂະຫຍາຍຕົວທາງດານດ້ານເຕັກໂນໂລຊີ ແລະ ການສື່ສານ ໃນຍຸກປະຈຸບັນ. ພ້ອມກັນຊີ້ແຈງໃຫ້ສະມາຊິກພັກ, ພະນັກງານ-ລັດຖະກອນ ຮັບຮູ້ ແລະ ເຂົ້າໃຈກ່ຽວກັບບັນຫາຕ່າງໆ ທີ່ເຂົາເຈົ້າໄດ້ ຕຳນິສົ່ງຂ່າວ ຕໍ່ແຕ່ລະສະຫາຍ ໃນຄະນະພັກ ແມ່ນໄດ້ນຳມາເວົ້າວ່າກັນກົງໄປກົງມາ.
- ໃຫ້ຄະນະພັກ ເອົາໃຈໃສ່ສືບຕໍ່ນຳພາ-ຊີ້ນຳ ວຽກງານໂຄສະນາ, ສຶກສາອົບຮົມການເມືອງແນວຄິດ, ຍູ້ຂະບວນການຮອບດ້ານ ໃຫ້ຟົດຟື້ນ ແລະ ແຂງແຮງຕື່ມອີກ ເປັນຕົ້ນແມ່ນ ຂະບວນການຈັດຕັ້ງປະຕິບັດບັນດາຄາດໝາຍສູ້ຊົນຕ່າງໆ ທີ່ໄດ້ກຳນົດໄວ້ ໃນມະຕິກອງປະຊຸມໃຫຍ່ຂອງອົງຄະນະພັກກະຊວງເຕັກໂນໂລຊີ ແລະ ການສື່ສານ ຜ່ານມາ; ການປະຕິບັດ 2 ວາລະແຫ່ງຊາດ, ຂະບວນການຈັດຕັ້ງປະຕິບັດໜ້າທີ່ການເມືອງ, ວິຊາສະເພາະ ຂອງແຕ່ລະຂົງເຂດ, ເອົາໃຈໃສ່ສະກັດກັ້ນ ພະຍາດໂຄວິດ-19 ແລະ ຂະບວນການ ອື່ນໆ.
- ສືບຕໍ່ຄົ້ນຄວ້າກະກຽມບຸກຄະລາກອນທີ່ຈະສະໝັກຮັບເລືອກຕັ້ງ ເຂົ້າໃນຄະນະບໍລິຫານງານພັກ ກະຊວງເຕັກໂນໂລຊີ ແລະ ການສື່ສານ ຊຸດໃໝ່ ໂດຍໃຫ້ອີງໃສ່ຜົນຂອງການດຳເນີນຊີວິດການເມືອງໃນຄັ້ງນີ້, ອີງໃສ່ມາດຕະຖານ, ເງື່ອນໄຂ ທີ່ກຳນົດໄວ້ໃນມະຕິກົມການເມືອງສູນກາງພັກ ເລກທີ 030/ກມສພ ແລະ ອີງໃສ່ການທາບທາມຮອບ 3 ໃນຕໍ່ ໜ້າ ທັງຮັບປະກັນໃຫ້ມີໂຄງປະກອບ ຄື: 3 ຮຸ້ນ: ຮຸ້ນອາວຸໂສ, ຮຸ້ນກາງ ແລະ ຮຸ້ນໜຸ່ມ, ມີເພດ, ເຜົ່າ ແລະ ການແຈກຢາຍແຕ່ລະວຽກງານ ສາມາດເປັນກຳລັງແຮງຫຼັກແຫຼ່ງ ໃຫ້ການເຄື່ອນໄຫວນຳພາ ໃນສະໄໝຕໍ່ໜ້າດ້ວຍບາດກ້າວບຸກທະລຸ.... ສ່ວນດ້ານຈຳນວນຄະນະພັກ ຊຸດທີ II ນີ້ ໃຫ້ບັນດາສະຫາຍຄົ້ນຄວ້າເປັນເອກະພາບກັນໃນການກຳນົດຈຳນວນ ເພື່ອລາຍງານຕໍ່ກົມການເມືອງ ແລະ ຄະນະເລຂາທິການສູນກາງພັກ ພິຈາລະນາຕົກລົງ.
- ໃຫ້ເອົາໃຈໃສ່ກວດກາຄືນດ້ານຈຳນວນ ແລະ ຄຸນລັກສະນະຂອງຜູ້ແທນທີ່ຈະເຂົ້າຮ່ວມກອງປະຊຸມໃຫຍ່ອົງຄະນະພັກກະຊວງເຕັກໂນໂລຊີ ແລະ ການສື່ສານ ຍັງຮັບປະກັນຄຸນນະພາບ ແລະ ມາດຕະຖານ, ເງື່ອນໄຂ ບົນພື້ນຖານນັ້ນເອົາໃຈໃສ່ນຳພາ ແລະ ສຶກສາອົບຮົມແນວຄິດໃຫ້ຜູ້ແທນກອງປະຊຸມມີຄວາມຮັບຜິດຊອບ ແລະ ມີຄວາມເປັນເອກະພາບສູງຕໍ່ກັບຜົນສຳເລັດຂອງກອງປະຊຸມໃຫຍ່ ຂອງອົງຄະນະພັກ ກະຊວງເຕັກໂນໂລຊີ ແລະ ການສື່ສານ ບັນດາສະຫາຍຜູ້ແທນນີ້ຈະເປັນຜູ້ເຂົ້າຮ່ວມ ແລະ ພິຈາລະນາຕົກລົງ, ຮັບຮອງເອົາເນື້ອໃນສຳຄັນຕ່າງໆ ຂອງກອງປະຊຸມໃຫຍ່.
- ພາຍຫຼັງສຳເລັດໜ້າວຽກຕ່າງໆໃຫ້ບັນດາ ສະຫາຍ ຄະນະພັກ ກະກຽມເອກະສານເພື່ອລາຍງານຄວາມພ້ອມ ກ່ຽວກັບການກະກຽມດຳເນີນກອງປະຊຸມໃຫຍ່ອົງຄະນະພັກກະຊວງເຕັກໂນໂລຊີ ແລະ ການສື່ສານ ຢ່າງລະອຽດ ພ້ອມກັນນັ້ນ, ກໍໃຫ້ກຳນົດວັນ, ເວລາທີ່ຈະດຳເນີນກອງປະຊຸມໃຫຍ່ ຄັ້ງທີ II ຂອງອົງຄະນະພັກ ກະຊວງເຕັກໂນໂລຊີ ແລະ ການສື່ສານ ເພື່ອພ້ອມກັນສືບຕໍ່ນຳພາກະກຽມກອງປະຊຸມໃຫຍ່ໃຫ້ບັນລຸຕາມຄາດໝາຍທີ່ວາງໄວ້.
