ຂ່າວ: ວິລະສະໄໝ

ພາບ: ບານ

     ກອງປະຊຸມໃຫຍ່ຜູ້ແທນສະມາຊິກພັກ ຄັ້ງທີ II ອົງຄະນະພັກກະຊວງເຕັກໂນໂລຊີ ແລະ ການສື່ສານໄດ້ ຈັດຂຶ້ນ ໃນວັນທີ 4- 5 ເມສາ 2022 ທີ່ຫໍປະຊຸມແຫ່ງຊາດ ພາຍໃຕ້ຄຳຂວັນ: “ຍົກສູງຄວາມຮັບຜິດຊອບຕໍ່ວຽກງານ ເຕັກໂນໂລຊີ ແລະ ການສື່ສານ ໃຫ້ເປັນກຳລັງແຮງຂັບເຄື່ອນໃນການຫັນເປັນ ດິຈິຕ໋ອນ ຕາມທິດຫັນເປັນອຸດສາຫະກຳ ແລະ ທັນສະໄໝ” ໂດຍການເປັນປະທານຂອງສະຫາຍ ບັນດິດ ສຈ. ບໍ່ວຽງຄຳ ວົງດາລາ ກຳມະການສູນກາງພັກ ເລຂາຄະນະພັກ ລັດຖະມົນຕີກະຊວງເຕັກໂນໂລຊີ ແລະ ການສື່ສານ, ເປັນກຽດເຂົ້າຮ່ວມ ແລະ ມີຄຳເຫັນໂອ້ລົມ ຂອງສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດ, ມີບັນດາຜູ້ແທນສະມາຊິກພັກ ພ້ອມດ້ວຍແຂກຖືກເຊີນເຂົ້າຮ່ວມ.​

     ບັນດາສະຫາຍຜູ້ແທນກອງປະຊຸມໄດ້ຍົກສູງຄວາມຮັບຜິດຊອບ ແລະ ສຸມສະຕິປັນຍາຂອງຕົນ ເຂົ້າໃນການຄົ້ນຄວ້າປະກອບຄຳຄິດເຫັນຕໍ່ບັນດາເອກະສານທີ່ນຳມາຜ່ານໃນກອງປະຊຸມຢ່າງກົງໄປກົງມາ  ເຮັດໃຫ້ກອງປະຊຸມດຳເນີນໄປດ້ວຍບັນຍາກາດແຫ່ງຄວາມສາມັກຄີ, ຄວາມເອກະພາບ ແລະ ສຳເລັດຕາມຈຸດປະສົງທີ່ວາງໄວ້ ເຊິ່ງກອງປະຊຸມໄດ້ລົງປະຊາມະຕິເປັນເອກະສັນ ຮັບຮອງເອົາຮ່າງລາຍງານການເມືອງ ແລະ ທິດທາງຄາດໝາຍສູ້ຊົນແຕ່ລະດ້ານ ທັງວຽກງານກໍ່ສ້າງພັກ-ພະນັກງານ, ການນຳພາຊີ້ນຳວຽກງານອົງການຈັດຕັ້ງມະຫາຊົນ, ວຽກງານວິຊາສະເພາະ, ວຽກງານການພົວພັນຮ່ວມມືກັບຕ່າງປະເທດ ແລະ ຮ່າງສຳຫຼວດການນຳພາລວມຂອງຄະນະພັກ ໂດຍໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ບົດຮຽນໃນການຊີ້ນຳ-ນຳພາ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ I ຜ່ານມາ. ພ້ອມກັນນີ້ ກອງປະຊຸມຍັງໄດ້ຮັບຮອງເອົາທິດທາງໜ້າທີ່ ແລະ ຄາດໝາຍສູ້ຊົນ ແຕ່ປີ 2022-2025, ຄາດໝາຍ ແລະ ວຽກງານຈຸດສຸມໃນ 5 ປີ ຕໍ່ໜ້າ ແລະ ແຜນພັດທະນາຂອງຂະແໜງການ ເຕັກໂນໂລຊີ ແລະ ການສື່ສານ ຄັ້ງທີ III.

     ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະບໍລິຫານງານຊຸດ ໃໝ່ 21 ສະຫາຍ, ຍິງ 1 ສະຫາຍ.  ຈາກຜູ້ສະໝັກ 26 ສະຫາຍ, ຍິງ 4 ສະຫາຍ. ກອງປະຊຸມຄັ້ງປະຖົມມະລຶກ ຂອງຄະນະພັກຊຸດໃໝ່ໄດ້ເລືອກເອົາຄະນະປະຈຳພັກ 7 ສະຫາຍ ຄື: 1. ສະຫາຍ ບັນດິດ ສຈ. ບໍ່ວຽງຄຳ ວົງດາລາ, 2. ສະ ຫາຍ ປອ ສັນຕິສຸກ ສິມາລາວົງ, 3. ສະຫາຍ ບຸນສະເຫຼີມໄຊ ເຄນນາວົງ, 4. ສະຫາຍ ພູຂົງ ຈິດຮູບໂລກ, 5. ສະຫາຍ ຄຳພູ ດວງຖະໜອມ, 6. ສະຫາຍ ໄຊລືຊາ ອິນສີຊຽງໃໝ່, 7. ສະຫາຍ ແກ້ວວິສຸກ ໂສລະພົມ; ເລືອກເອົາ ສະຫາຍ ບັນດິດ ສຈ. ບໍ່ວຽງຄຳ ວົງດາລາ ເປັນເລຂາຄະນະບໍລິຫານງານພັກ, ສະຫາຍ ປອ ສັນຕິສຸກ ສິມສາລາວົງ ເປັນຮອງ ເລຂາຄະນະພັກ ທັງເປັນປະທານກວດກາ.

     ໃນຕອນທ້າຍຂອງກອງປະຊຸມ ຍັງໄດ້ຮັບຟັງຄຳເຫັນໂອ້ລົມຂອງສະຫາຍ ບຸນທອງ ຈິດມະນີ, ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ  ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ແລະ ໄຊຊະນະ ທີ່ອົງຄະນະພັກ ກະຊວງເຕັກໂນໂລຊີ ແລະ ການສື່ສານ ຍາດມາໄດ້ ເຊິ່ງເປັນໝາກຜົນລວມຂອງການຈັດຕັ້ງນຳພາຂອງອົງຄະນະພັກກະຊວງເຕັກໂນໂລຊີ ແລະ ການສື່ສານ. ສະຫາຍ ໄດ້ກ່າວວ່າ: ກົມການເມືອງ, ຄະນະເລຂາທິການສູນກາງພັກ, ຕີລາຄາສູງຕໍ່ການນຳພາຊີ້ນຳ ກໍ່ຄື  ຜົນສຳເລັດທີ່ຍາດ ມາໄດ້ຂອງຄະນະພັກ, ຄະນະນຳ ກໍຄື ຂອງບັນດາສະຫາຍສະມາຊິກພັກ, ພະນັກງານ ທົ່ວອົງຄະນະພັກກະຊວງເຕັກໂນໂລຊີ ແລະ ການສື່ສານ ໃນການປະຕິບັດໜ້າທີ່ການເມືອງຕາມພາລະບົດບາດຂອງຕົນ, ເຊິ່ງສາມາດເຫັນໄດ້ ດ້ານດີ ແລະ ຜົນສຳເລັດ ທີ່ຕ້ອງເສີມຂະຫຍາຍ, ທັງເຫັນໄດ້ດ້ານອ່ອນ, ຂໍ້ຄົງຄ້າງ ທີ່ຈະຕ້ອງປັບປຸງແກ້ໄຂ.​ ທັງໝົດນັ້ນ, ເປັນການປະກອບສ່ວນສຳຄັນ ເຂົ້າໃນການປັບປຸງ, ກໍ່ສ້າງພັກ ໃຫ້ປອດໃສ, ເຂັ້ມແຂງ, ໜັກແໜ້ນ. ເພື່ອເຮັດໃຫ້ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມຕາມກົດໝາຍ ແລະ ລະບຽບການຂອງລັດ ໃຫ້ມີຄວາມສັກສິດ, ເຂັ້ມງວດ ເທື່ອລະກ້າວ. ພ້ອມກັນນັ້ນ, ສະຫາຍຍັງໄດ້ສະແດງຄວາມເປັນຫ່ວງເປັນໃຍ ຕໍ່ດ້ານອ່ອນ, ຂໍ້ຄົງຄ້າງ ແລະ ໄດ້ຮຽກຮ້ອງ ໃຫ້ຄະນະພັກຊຸດໃໝ່ ສືບຕໍ່ປັບປຸງ, ແກ້ໄຂ.