ຂ່າວ: ນາງ ຕູດ ຄໍາພໍໃຈ

     ໃນຕອນບ່າຍຂອງວັນທີ 11 ພຶດສະພາ 2022 ໜ່ວຍພັກພະແນກໂຍທາທິການ ແລະ ຂົນສົ່ງ ແຂວງໄຊສົມບູນ ໄດ້ຈັດພິທີຮັບສະມາຊິກພັກສໍາຮອງ 5 ສະຫາຍ ທີ່ຫ້ອງປະຊຸມຂອງຕົນ ໂດຍການເປັນປະທານຂອງສະຫາຍ ໄຊສົມພັນ ລີເຕັ່ງເບຼັ່ຍຈື່ ກໍາມະການພັກແຂວງ, ເລຂາໜ່ວຍພັກພະແນກໂຍທາທິການ ແລະ ຂົນສົ່ງແຂວງ, ມີຕາງໜ້າຈາກຄະນະຈັດຕັ້ງແຂວງ, ຄະນະໂຄສະນາອົບຮົມແຂວງ, ມີບັນດາເລຂາ, ຮອງເລຂາໜ່ວຍພັກ ພະແນກການ ຂົງເຂດກຸ່ມເສດຖະກິດ ພ້ອມດ້ວຍສະມາຊິກພັກສົມບູນ ແລະ ສະມາຊິກພັກສໍາຮອງ ພາຍໃນໜ່ວຍ ຂອງຕົນ ເຂົ້າຮ່ວມ.

     ໃນພິທີສະຫາຍ ນາງ ຜາສຸກ ຄຸນມະນີ, ຄະນະຈັດຕັ້ງພິທີ ໄດ້ຂຶ້ນຜ່ານມະຕິຕົກລົງຂອງຄະນະປະຈໍາພັກແຂວງ ວ່າດ້ວຍການອະນຸມັດຮັບເອົາມະຫາຊົນຜູ້ກ້າວໜ້າ ເຂົ້າເປັນສະມາຊິກພັກສໍາຮອງ ຈໍານວນ 5 ສະຫາຍ ຊຶ່ງທັງ 5 ສະຫາຍ ແມ່ນໄດ້ຮັບການຮຽນສະໜັບສະໜູນ, ຮຽນກົດລະບຽບພັກ ແລະ ຜ່ານການຝຶກຝົນຫຼໍ່ຫຼອມໃນໜ້າທີ່ການເມືອງທີ່ຕົນຮັບຜິດຊອບເປັນເວລາ 6 ເດືອນ ເຫັນວ່າມີຄຸນສົມບັດສິນທໍາປະຕິວັດ, ມີຄວາມຫ້າວຫັນຕໍ່ໜ້າທີ່ວຽກງານ, ມີຄວາມຮັບຜິດຊອບສູງໃນການຈັດຕັ້ງປະຕິບັດວຽກງານ ແລະ ໜ້າທີ່ການເມືອງທີ່ພັກ-ລັດມອບໝາຍໃຫ້. ຜ່ານຂະບວນການຝຶກຝົນຫຼໍ່ຫຼອມຄືດັ່ງກ່າວ ເຫັນວ່າພວກກ່ຽວມີເງື່ອນໄຂຄົບຖ້ວນທີ່ຈະເຂົ້າເປັນສະມາຊິກພັກປະຊາຊົນປະຕິວັດລາວຕາມລະບຽບການທີ່ໄດ້ກຳນົດໄວ້. ຈາກນັ້ນ ເລຂາໜ່ວຍພັກ ໄດ້ກ່າວມີຄຳເຫັນ ແລະ ຈັບມືຮັບເອົາມະຫາຊົນກ້າວໜ້າ ເຂົ້າເປັນສະມາຊິກພັກສໍາຮອງ ຢ່າງເປັນທາງການ.

     ໃນໂອກາດທີ່ມີຄວາມໝາຍສໍາຄັນນີ້ ສະຫາຍ ໄຊສົມພັນ ລີເຕັ່ງເບຼັ່ຍຈື່, ກໍາມະການພັກແຂວງ, ເລຂາໜ່ວຍພັກ ໄດ້ມີຄໍາເຫັນໂອ້ລົມຕໍ່ພິທີ ເຊິ່ງສະຫາຍໄດ້ຍ້ອງຍໍຊົມເຊີຍ ແລະ ເນັ້ນໃຫ້ສະມາຊິກພັກສໍາຮອງໃໝ່ ຈົ່ງໄດ້ພ້ອມກັນເອົາໃຈໃສ່ປະຕິບັດກົດລະບຽບຂອງພັກ, ປະຕິບັດໜ້າທີ່, ສິດ ແລະ ຂໍ້ຫ້າມຂອງສະມາຊິກພັກ ຢ່າງເຂັ້ມງວດ ພ້ອມທັງຝຶກຝົນຫຼໍ່ຫຼອມຕົນເອງໃນທຸກດ້ານຕະລອດໄລຍະສະໄໝສຳຮອງ, ເປັນແບບຢ່າງທີ່ດີໃຫ້ແກ່ມະຫາຊົນ ເພື່ອກ້າວເຂົ້າສູ່ການເປັນສະມາຊິກພັກສົມບູນໃນຂັ້ນຕໍ່ໄປ.