ໂດຍ: ສ. ສົດໃສ
ໃນວັນທີ 20 ມິຖຸນາ 2022 ຢູ່ທີ່ສະໂມສອນກະຊວງກະສິກຳ ແລະ ປ່າໄມ້ ໄດ້ຈັດພິທີສະຫຼຸບວຽກງານກໍ່ສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ ແລະ ການມອບ-ຮັບໃບຢັ້ງຢືນໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈຳປີ 2021 ໂດຍການເປັນປະທານ ແລະ ມອບໃບຢັ້ງຢືນຂອງສະຫາຍ ທອງພັດ ວົງມະນີ ຮອງເລຂາຄະນະພັກ, ຮອງລັດຖະມົນຕີກະຊວງກະສິກຳ ແລະ ປ່າໄມ້, ມີຄະນະພັກກະຊວງ, ມີຄະນະພັກຮາກຖານ, ຄະນະໜ່ວຍພັກ, ສະຫາຍຫົວໜ້າກົມ ແລະ ຮອງຫົວໜ້າຂອງຫ້ອງການ, ບັນດາກົມ, ສະຖາບັນ, ຫົວໜ່ວຍວິຊາການລະດັບສອງ ແລະ ບັນດາອົງການຈັດຕັ້ງມະຫາຊົນເຂົ້າຮ່ວມ.
ພິທີດັ່ງກ່າວ ຜູ້ເຂົ້າຮ່ວມໄດ້ຮັບຟັງການຜ່ານບົດສະຫຼຸບກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈຳປີ 2021 ແລະ ທິດທາງແຜນການປີ 2022 ຂອງຄະນະພັກກະຊວງ ເຊິ່ງຕະຫຼອດໄລຍະ 1 ປີຜ່ານມາ ຄະນະພັກກະຊວງ ໄດ້ຖືສຳຄັນການນຳພາຄະນະພັກຮາກຖານ, ໜ່ວຍພັກຮາກຖານ ແລະ ໜ່ວຍພັກຂຶ້ນກັບຄະນະພັກຮາກຖານ ຈັດຕັ້ງປະຕິບັດຄຳສັ່ງຂອງກົມການເມືອງສູນກາງພັກ ສະບັບເລກທີ 01/ກມສພ, ລົງວັນທີ 30 ມັງກອນ 2018 ວ່າດ້ວຍການເພີ່ມທະວີການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ; ຄຳແນະນຳຂອງຄະນະຈັດຕັ້ງສູນກາງພັກ ສະບັບເລກທີ 291/ຄຈສພ, ລົງວັນທີ 26 ເມສາ 2018 ກ່ຽວກັບການຈັດຕັ້ງປະຕິບັດຄຳສັ່ງຂອງກົມການເມືອງສູນກາງພັກ ວ່າດ້ວຍການເພີ່ມທະວີການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ແລະ ປະຕິບັດຕາມມະຕິຕົກລົງຂອງຄະນະປະຈຳພັກກະຊວງກະສິກຳ ແລະ ປ່າໄມ້ ສະບັບເລກທີ 0230/ຄພ.ກປ, ລົງວັນທີ 08 ກໍລະກົດ 2021 ວ່າດ້ວຍການແຕ່ງຕັ້ງຄະນະຮັບຜິດຊອບຕິດຕາມ, ກວດກາ, ການປະເມີນຜົນການກໍ່ສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ ຢ່າງເຂັ້ມງວດ ແລະ ເປັນເອກະພາບກັນໃນທົ່ວອົງຄະນະພັກກະຊວງ.
ໃນການຕິດຕາມ, ກວດກາ, ຊຸກຍູ້ ການສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ຢູ່ບັນດາຄະນະພັກຮາກຖານ, ໜ່ວຍພັກຮາກຖານ ອ້ອມຂ້າງອົງຄະນະພັກກະຊວງ ປະຈຳປີ 2021 ສາມາດສະຫຼຸບຕີລາຄາໄດ້ດັ່ງນີ້: ທົ່ວອົງຄະນະພັກກະຊວງກະສິກຳ ແລະ ປ່າໄມ້ ປະກອບມີ 71 ການຈັດຕັ້ງຮາກຖານພັກ, ໃນນັ້ນ ມີ 11 ຄະນະພັກຮາກຖານ, 05 ໜ່ວຍພັກຮາກຖານ ແລະ 55 ໜ່ວຍພັກຂຶ້ນກັບ ຄະນະພັກຮາກຖານ; ຜ່ານການກວດກາ ປະເມີນຜົນຕາມ 5 ເນື້ອໃນຂອງການກໍ່ສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ ປະຈຳປີ 2021 ສະມາດສັງລວມການສະເໜີເປັນໜ່ວຍພັກປະເພດແຂງ ຈຳນວນ 48 ໜ່ວຍພັກ ເທົ່າກັບ 80% ແລະ ໜ່ວຍພັກກາງ ຈຳນວນ 12 ໜ່ວຍພັກ ເທົ່າກັບ 20%, ຈຳນວນສະມາຊິກພັກທັງໝົດ 1.000 ກວ່າສະຫາຍ ຍິງ 300 ກວ່າສະຫາຍ, ສະມາຊິກພັກທີ່ໄດ້ປະເມີນທັງໝົດ 867 ສະຫາຍ, ຍິງ 289 ສະຫາຍ, ບໍ່ໄດ້ປະເມີນ 136 ສະຫາຍ, ຍິງ 22 ສະຫາຍ, ຈັດແບ່ງປະເພດແຂງ ມີ 767 ສະຫາຍ, ຍິງ 257 ສະຫາຍ ເທົ່າກັບ 88,5%, ປະເພດກາງ 99 ສະຫາຍ, ຍິງ 32 ສະຫາຍ ເທົ່າກັບ 11,4%; ປະເພດອ່ອນ 01 ສະຫາຍ ເທົ່າກັບ 0,1%.
ໃນພິທີ ໄດ້ມອບ-ຮັບໃບຢັ້ງຢືນໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈຳປີ 2021 ໃຫ້ແກ່ບັນດາໜ່ວຍພັກທີ່ໄດ້ຜ່ານການກໍ່ສ້າງ ແລະ ໄດ້ຮັບການປະເມີນຜົນຄົບຕາມມາດຕະຖານເງື່ອນໄຂທີ່ວາງອອກ ຈຳນວນ 48 ໜ່ວຍພັກ.
ຕອນທ້າຍຂອງພິທີ ສະຫາຍ ທອງພັດ ວົງມະນີ ໄດ້ມີຄຳເຫັນໂອ້ລົມ ຢັ້ງຢືນຄືນເຖິງຜົນສຳເລັດຂອງການນຳພາຂອງຄະນະພັກແຕ່ລະຂັ້ນ ເຊິ່ງສະຫາຍໄດ້ຍ້ອງຍໍຊົມເຊີຍຜົນສຳເລັດການສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈຳປີ ແລະ ມີທິດຊີ້ນຳເພີ່ມທະວີຄວາມຮັບຜິດຊອບຂອງຄະນະຊີ້ນຳ, ຄວາມເປັນເຈົ້າການໃນການຕິດຕາມ, ກວດກາ, ຊຸກຍູ້ຢ່າງຕໍ່ເນື່ອງ, ສືບຕໍ່ແຕ່ງຕັ້ງຄະນະຮັບຜິດຊອບກວດກາການປະເມີນການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈຳປີ 2022 ເພື່ອສ້າງແຜນການເຄື່ອນໄຫວຊຸກຍູ້, ຕິດຕາມໃນການຈັດຕັ້ງປະຕິບັດວຽກງານດັ່ງກ່າວໃຫ້ມີບາດກ້າວໃໝ່ໄປໜ້າ ພ້ອມທັງຮຽກຮ້ອງໃຫ້ໜ່ວຍພັກທີ່ຍັງບໍ່ທັນໄດ້ຮັບຮອງເປັນໜ່ວຍພັກປອດໃສ ເຂັ້ມແຂງ ໜັກແໜ້ນ ຈົ່ງສືບຕໍ່ເສີມຂະຫຍາຍຜົນງານດ້ານຕັ້ງໜ້າ ແລະ ປັບປຸງບັນຫາໃດທີ່ຍັງບໍ່ທັນໄດ້ຕາມມາດຕະຖານ-ເງື່ອນໄຂ ໃຫ້ພ້ອມກັນຄົ້ນຄວ້າສູ້ຊົນແກ້ໄຂໃຫ້ເໝາະສົມ ແລະ ກາຍເປັນໜ່ວຍພັກປອດໃສ ເຂັ້ມແຂງ ໜັກແໜ້ນ ໃນປີຕໍ່ໄປ.
