ໂດຍ: ວິລະສະໄໝ
ໃນລະຫວ່າງວັນທີ 17-20 ຕຸລາ 2022 ຄະນະພັກກະຊວງເຕັກໂນໂລຊີ ແລະ ການສື່ສານ ໄດ້ຈັດຝຶກອົບຮົມວຽກງານກໍ່ສ້າງພັກ ໃຫ້ບັນດາເລຂາ, ຮອງເລຂາ, ຄະນະໜ່ວຍພັກ, ຄະນະພັກຮາກຖານ ແລະ ກອງເລຂາບັນດາໜ່ວຍພັກ ໂດຍການ ເປັນປະທານຂອງ ສະຫາຍ ປອ ສັນຕິສຸກ ສິມມາລາວົງ ຮອງເລຂາຄະນະພັກກະຊວງເຕັກໂນໂລຊີ ແລະ ການສື່ສານ, ມີວິທະຍາກອນຈາກຄະນະຈັດຕັ້ງສູນກາງພັກ 3 ສະຫາຍ, ມີສຳມະນາກອນທັງໝົດ 71 ສະຫາຍ, ຍິງ 23 ສະຫາຍ.
ຊຸດຝຶກອົບຮົມຄັ້ງນີ້ບັນດາສຳມະນາກອນ ໄດ້ຮຽນຮູ້ ແລະ ເຂົ້າໃຈ ກ່ຽວກັບຄວາມໝາຍຂອງວຽກງານກໍ່ສ້າງພັກ, ບັນດາເນື້ອໃນ ແລະ ທິດທາງຂອງການນຳພາຂອງພັກຢ່າງເລິກເຊິ່ງ ໂດຍຜ່ານການຮັບຟັງການບັນຍາຍເອກະສານທັງໝົດ 6 ບົດ ຄື: ບົດທີ 1 ຍົກສູງຄຸນນະພາບການຈັດຕັ້ງຮາກຖານພັກໃຫ້ປອດໃສ, ເຂັ້ມແຂງ, ໜັກແໜ້ນ, ບົດທີ 2 ກ່ຽວກັບການຕີລາຄາຄຸນນະພາບ, ແບ່ງປະເພດສະມາຊິກພັກ ແລະ ໜ່ວຍພັກ, ບົດທີ 3 ຍົກສູງຄຸນນະພາບຂອງສະມາຊິກພັກ ແລະ ວຽກງານຂະຫຍາຍພັກໃນໄລຍະໃໝ່, ບົດທີ 4 ເພີ່ມທະວີວຽກງານຄຸ້ມຄອງ ແລະ ລະບຽບການຍົກຍ້າຍສະມາຊິກພັກ, ບົດທີ 5 ການອອກບັດ-ມອບບັດສະມາຊິກພັກສົມບູນຂອງພັກປະຊາຊົນປະຕິວັດລາວ, ບົດທີ 6 ເນື້ອໃນພື້ນຖານກ່ຽວກັບວຽກງານປ້ອງກັນພັກ-ພະນັກງານ.
ໂດຍໄດ້ຄົ້ນຄວ້າປະກອບຄຳຄິດຄຳເຫັນ ແລະ ເຫັນດີເປັນເອກະພາບ ຕໍ່ບັນດາເນື້ອໃນເອກະສານດັ່ງກ່າວຢ່າງເລິກເຊິ່ງບົນພື້ນຖານອີງໃສ່ບັນດາທັດສະນະຂອງພັກ ແລະ ບົດແນະນຳກ່ຽວກັບການກໍ່ສ້າງພັກ, ຍົກໃຫ້ເຫັນດ້ານດີ, ດ້ານອ່ອນ, ຊອກໃຫ້ເຫັນບົດຮຽນທີ່ຖອດຖອນໄດ້ ເພື່ອພ້ອມກັນຊອກຫາວິທີແກ້ໄຂໃນຕໍ່ໜ້າ.
ໃນມື້ສຸດທ້າຍຂອງຊຸດຝຶກອົບຮົມ ໄດ້ມີພິທີມອບໃບຢັ້ງຢືນໃຫ້ແກ່ສຳມະນາກອນ ແລະ ຮັບຟັງຄຳເຫັນໂອ້ລົມຈາກສະຫາຍ ຄຳພູ ດວງຖະໜອມ ຄະນະພັກ, ຫົວໜ້າກົມຈັດຕັ້ງ ແລະ ພະນັກງານ ກະຊວງເຕັກໂນໂລຊີ ແລະ ການສື່ສານ ໂດຍໄດ້ເນັ້ນໜັກໃຫ້ບັນດາສະຫາຍສຳມະນາກອນຈົ່ງກຳແໜ້ນບັນດາເອກະສານ ໃນການຝຶກອົບຮົມຄັ້ງນີ້ ເພື່ອໝູນໃຊ້ເຂົ້າໃນການປະຕິບັດໜ້າທີ່ວຽກງານຂອງຕົນໃຫ້ເກີດຜົນເປັນຈິງ. ຄະນະໜ່ວຍພັກ ເອົາໃຈໃສ່ຄົ້ນຄວ້າກຳແໜ້ນເປັນເອກະພາບ ແລະ ຫັນເປັນອັນລະອຽດເພື່ອຈັດຕັ້ງປະຕິບັດຕໍ່ວຽກງານກໍ່ສ້າງພັກ-ພະນັກງານ ເຮັດໃຫ້ມີການຫັນປ່ຽນຢ່າງຕັ້ງໜ້າ ສາມາດຕອບສະໜອງໄດ້ກັບຄວາມຮຽກຮ້ອງຕ້ອງການຂອງວຽກງານກໍ່ສ້າງພັກໃນສະເພາະໜ້າ ແລະ ຍາວນານ.
