ໂດຍ: ສຸລິໄຈ ຍອດສໍລິຄໍາ

     ໃນລະຫວ່າງວັນທີ 24-25 ຕຸລາ 2022 ທີ່ສຳນັກງານອົງການປົກຄອງແຂວງຜົ້ງສາລີ, ກົມຈັດຕັ້ງ-ພະນັກງານ ຄະນະຈັດຕັ້ງສູນກາງພັກ ໄດ້ເຄື່ອນໄຫວເຮັດວຽກ ເພື່ອສົມທົບແນະນໍາ, ຊຸກຍູ້, ຕິດຕາມການປັບປຸງພາລະບົດບາດ ແລະ ການວິເຄາະຕໍາແໜ່ງງານຂອງຄະນະຈັດຕັ້ງແຂວງ, ຄະນະຈັດຕັ້ງເມືອງ ຢູ່ແຂວງຜົ້ງສາລີ ນໍາໂດຍທ່ານ ຄໍາສອນ ສຸເທບມະນີ ຮອງຫົວໜ້າກົມຈັດຕັ້ງ-ພະນັກງານພ້ອມດ້ວຍທີມງານ ໃຫ້ກຽດເຂົ້າຮ່ວມເປັນປະທານໂດຍທ່ານ ຫຸມພັນ ຈັນທະລາ ຮອງເລຂາໜ່ວຍພັກ, ຮອງຫົວໜ້າຄະນະຈັດຕັ້ງແຂວງຜົ້ງສາລີ, ມີບັນດາທ່ານຮອງຫົວໜ້າຄະນະຈັດຕັ້ງແຂວງ, ຮອງຫົວໜ້າພະແນກພາຍໃນແຂວງ ແລະ ຮອງຫົວໜ້າຄະນະຈັດຕັ້ງເມືອງ 07 ເມືອງພາຍໃນແຂວງ ພ້ອມດ້ວຍພະນັກງານພາຍໃນຄະນະຈັດຕັ້ງແຂວງ, ຄະນະຈັດຕັ້ງເມືອງເທດສະບານເຂົ້າຮ່ວມຢ່າງພ້ອມພຽງ.

     ໃນກອງປະຊຸມໄດ້ຮັບຟັງການລາຍງານສະພາບການຈັດຕັ້ງປະຕິບັດວຽກງານກົງຈັກການຈັດຕັ້ງຂອງຄະນະຈັດຕັ້ງແຂວງ, ຄະນະຈັດຕັ້ງເມືອງໃນໄລຍະຜ່ານມາ. ຈາກນັ້ນ, ໄດ້ພ້ອມກັນວິເຄາະບັນດາກຸ່ມວຽກ, ໜ້າວຽກຍ່ອຍ ແລະ ປະກອບຄໍາຄິດຄໍາເຫັນຢ່າງກົງໄປກົງມາຕໍ່ກັບບັນດາໜ້າວຽກ, ບັນດາຕໍາແໜ່ງງານຕ່າງໆ ຢ່າງລະອຽດຈະແຈ້ງ ແລະ ແທດເໝາະກັບສະພາບຕົວຈິງ.

     ກອງປະຊຸມໄດ້ດໍາເນີນເປັນເວລາ 02 ວັນ ດ້ວຍຜົນສໍາເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້. ການວິເຄາະ ແລະ ກໍານົດຕໍາແໜ່ງງານຄືດັ່ງກ່າວຈະເປັນບ່ອນອີງໃຫ້ແກ່ການຮັບເອົາພະນັກງານ ແລະ ການບັນຈຸ-ສັບຊ້ອນພະນັກງານຕາມຕຳແໜ່ງງານຢ່າງຖືກຕ້ອງ ແລະ ສອດຄ່ອງກັບຄວາມເປັນຈິງໃນແຕ່ລະໄລຍະ.