ໂດຍ: ສົມໄຊ ຫຼ້າດວງມະນີ
ນັກຂ່າວ ຄຈຂ ຊຽງຂວາງ
ໃນລະຫວ່າງວັນທີ 26-28 ຕຸລາ 2022 ທ່ານ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ພ້ອມດ້ວຍຄະນະໄດ້ເຄື່ອນໄຫວເຮັດວຽກ ແລະ ພົບປະໂອ້ລົມພະນັກງານການນຳຫຼັກແຫຼ່ງຢູ່ແຂວງຊຽງຂວາງ ໂດຍໃຫ້ການຕ້ອນຮັບຂອງທ່ານ ບຸນຈັນ ສີວົງພັນ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງຊຽງຂວາງ ພ້ອມດ້ວຍຄະນະ; ໃນໂອກາດດັ່ງກ່າວ ຫົວໜ້າຄະນະຈັດຕັ້ງສູນກາງພັກໄດ້ຮັບຟັງການລາຍງານສະພາບລວມການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ກໍ່ຄືມະຕິກອງປະຊຸມໃຫຍ່ຂອງອົງຄະນະພັກແຂວງ ແລະ ແຜນພັດທະນາເສດຖະກິດ-ສັງຄົມຂອງແຂວງຈາກທ່ານເຈົ້າແຂວງ ແລະ ໄດ້ຮັບຟັງການລາຍງານສະພາບການຈັດຕັ້ງຜັນຂະຫຍາຍມະຕິກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI ກໍ່ຄືວຽກງານຈັດຕັ້ງຂອງແຂວງຈາກທ່ານ ສູນທອນ ພັນມີໄຊ ກຳມະການປະຈຳພັກແຂວງ, ຫົວໜ້າຄະນະຈັດຕັ້ງແຂວງຊຽງຂວາງ ເຊິ່ງໃນປີ 2022 ຄະນະພັກແຕ່ລະຂັ້ນໄດ້ເປັນເຈົ້າການໂຄສະນາເຜີຍແຜ່, ເຊື່ອມຊຶມບັນດານິຕິກຳຂອງພັກ-ລັດຖະບານ, ອົງການຕຸລາການ ແລະ ອົງການນິຕິບັນຍັດ ໃຫ້ຖັນແຖວສະມາຊິກພັກ-ພະນັກງານຢ່າງເປັນປົກກະຕິ; ປັດຈຸບັນທົ່ວແຂວງມີ 7 ເມືອງ, ມີ 88 ຄະນະພັກຮາກຖານ, ມີໜ່ວຍພັກທັງໝົດ 1,071 ໜ່ວຍ, ສືບຕໍ່ກໍ່ສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ ຕາມຄຳສັ່ງເລກທີ 01/ກມສພ ໄດ້ 745 ໜ່ວຍ, ກວມ 69,56%. ທົ່ວອົງຄະນະພັກແຂວງມີສະມາຊິກພັກທັງໝົດ 18,731 ສະຫາຍ, ຍິງ 5,602 ສະຫາຍ, ອອກບັດ-ມອບບັດໃຫ້ສະມາຊິກພັກສົມບູນໄດ້ທັງໝົດ 17.006 ສະຫາຍ, ກວມ 90,79%; ຍິງ 4,639 ສະຫາຍ, ກວມ 82,80%; ໃນນັ້ນ ປີ 2022 ໄດ້ອອກບັດ-ມອບບັດໃຫ້ສະມາຊິກພັກສົມບູນໄດ້ 1 ຊຸດ; ມີ 479 ສະຫາຍ, ຍິງ 147 ສະຫາຍ (ສະຖິຕິ 6 ເດືອນຕົ້ນປີ 2022).
ໃນໂອກາດເຄື່ອນໄຫວເຮັດວຽກຄັ້ງນີ້ ທ່ານ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ໄດ້ມີຄຳເຫັນໂອ້ລົມຕໍ່ການນຳຫຼັກແຫຼ່ງຂອງແຂວງ ເຊິ່ງກ່ອນອື່ນທ່ານໄດ້ຕີລາຄາສູງ ແລະ ສະແດງຄວາມຍ້ອງຍໍຊົມເຊີຍຕໍ່ຄະນະພັກ-ອົງການປົກຄອງແຂວງແຕ່ລະຂັ້ນ, ສະມາຊິກພັກ-ພະນັກງານ, ປະຊາຊົນບັນດາເຜົ່າ ທີ່ມີຄວາມຫ້າວຫັນ, ບຸກບືນສູ້ຊົນເຂົ້າໃນການປະຕິບັດພາລະກິດປົກປັກຮັກສາ ແລະ ສ້າງສາປະເທດຊາດ ກໍ່ຄືການພັດທະນາແຂວງຂອງຕົນໃຫ້ນັບມື້ມີບາດກ້າວຂະຫຍາຍຕົວສູ່ໂສມໜ້າໃໝ່, ພ້ອມນີ້ທ່ານຍັງໄດ້ເນັ້ນໜັກໃຫ້ຄະນະພັກ, ຄະນະຈັດຕັ້ງແຂວງ, ຄະນະຈັດຕັ້ງເມືອງ, ສະມາຊິກພັກ-ພະນັກງານ ຈົ່ງສືບຕໍ່ຈັດຕັ້ງຜັນຂະຫຍາຍແນວທາງນະໂຍບາຍການຫັນປ່ຽນຢ່າງແຂງແຮງເລິກເຊິ່ງ ແລະ ຮອບດ້ານວຽກງານຈັດຕັ້ງ, ພັກ-ພະນັກງານ ແລະ ວຽກງານປັບປຸງກົງຈັກການຈັດຕັ້ງໃຫ້ເຂັ້ມແຂງ ໜັກແໜ້ນ ສ້າງພະນັກງານໃຫ້ມີຄວາມສັດຊື່ບໍລິສຸດ, ມີນ້ຳໃຈຮັບໃຊ້ຊາດ, ຮັບໃຊ້ປະຊາຊົນຢ່າງແທ້ຈິງ, ປັບປຸງແບບແຜນວິທີເຮັດວຽກ, ແບບແຜນວິທີນຳພາ ແລະ ແບບແຜນການດຳລົງຊີວິດໃຫ້ສອດຄ່ອງ, ສ້າງຄວາມມີລະບຽບວິໄນ, ຈຸດໃດທີ່ຍັງອ່ອນ ແລະ ຄົງຄ້າງຕ້ອງໄປແກ້ໄຂຢ່າງເດັດດ່ຽວ, ແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ສ້າງຄວາມເຂັ້ມແຂງໃຫ້ແກ່ເສດຖະກິດຂອງແຂວງ, ເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ, ຕີຖອຍການສ້າງກະແສຄວາມແຕກແຍກຄວາມສາມັກຄີພາຍໃນສັງຄົມ, ຍົກສູງຄຸນນະພາບການສຶກສາ, ສາທາລະນະສຸກ, ແກ້ໄຂຄວາມທຸກຍາກຂອງປະຊາຊົນບັນດາເຜົ່າໃຫ້ກ້າວໄປສູ່ຄວາມຢູ່ດີກິນດີ ແລະ ມີຄວາມຜາສຸກ.
ບັນດາທ່ານທີ່ຮັບຜິດຊອບວຽກງານຈັດຕັ້ງທຸກຂັ້ນຕ້ອງສືບຕໍ່ສ້າງຄວາມເຂັ້ມແຂງໃນການປະຕິບັດໜ້າທີ່, ເປັນຕົ້ນແມ່ນຕ້ອງເຝິກຝົນຫຼໍ່ຫຼອມຕົນເອງໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ມີຈັນຍາບັນ, ຈັນຍາທຳ, ຕ້ອງເປັນຜູ້ທີ່ມີຄວາມອົດທົນ, ດຸໝັ່ນຄົ້ນຄວ້າບັນດານິຕິກຳຕ່າງໆ ໂດຍສະເພາະກຳແໜ້ນນິຕິກຳໃນການວຽກງານກໍ່ສ້າງພັກ, ມະຕິ, ຄຳສັ່ງ, ຄຳແນະນຳ, ແຈ້ງການຂອງກົມການເມືອງສູນກາງພັກ, ຄະນະເລຂາທິການສູນກາງພັກ ແລະ ຜັນຂະຫຍາຍອອກເປັນນິຕິກຳຂອງແຂວງ, ຂອງເມືອງ ຕາມຄວາມເໝາະສົມ; ຕ້ອງກຳປະຫວັດຕົ້ນກຳເນີດ, ປະຫວັດການເຄື່ອນໄຫວ, ສະພາບຈຸດພິເສດ ແລະ ຜົນງານຂອງພະນັກງານ-ລັດຖະກອນທີ່ຂຶ້ນກັບສິດຄຸ້ມຄອງຂອງແຂວງ, ຂອງເມືອງເປັນແຕ່ລະໄລຍະ, ຕ້ອງເອົາໃຈໃສ່ປະຕິບັດລະບອບຊຸກຍູ້, ຕິດຕາມກວດກາການປະຕິບັດສິດ, ໜ້າທີ່ຂອງຄະນະພັກ, ສະມາຊິກພັກ ໂດຍສົມທົບກັບພາກສ່ວນກ່ຽວຂ້ອງເພື່ອຕິຕາມກວດກາໃຫ້ເປັນປົກກະຕິ.
ໃນໄລຍະເຄື່ອນໄຫວເຮັດວຽກຢູ່ແຂວງດັ່ງກ່າວ, ຫົວໜ້າຄະນະຈັດຕັ້ງສູນກາງພັກ ພ້ອມດ້ວຍຄະນະຍັງໄດ້ຢ້ຽມຊົມຫ້ອງວາງສະແດງສິນຄ້າພູມປັນຍາຂອງທ້ອງຖິ່ນ ແລະ ຢ້ຽມຢາມຄອບຄົວຜະລິດເຫຼົ້າວາຍເຂົ້າໄກ່ນ້ອຍ ຢູ່ບ້ານຍວນ ເມືອງແປກ ແຂວງຊຽງຂວາງ, ກວດກາ ແລະ ທັດສະນະຢ້ຽມຊົມສະໜາມກິລາທີ່ຈະໃຊ້ໃນພິທີເປີດ-ປິດງານມະຫາກຳກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງໄດ້ຮັບກຽດເປັນເຈົ້າພາບ ໃນທ້າຍປີ 2022 ແລະ ຢ້ຽມຢາມຮາກຖານຫົວໜ່ວຍທຸລະກິດຈຳນວນໜຶ່ງຕື່ມອີກ...ຯ
