ແຫຼ່ງຂ່າວ: ຄໍາປິງ

     ວັນທີ 31 ມັງກອນ 2023 ທີ່ສະໂມສອນຂອງເມືອງວຽງພູຄາ ໂດຍເປັນກຽດເຂົ້າຮ່ວມຂອງ ສະຫາຍ ຕຽງສະໝອນ ພອນປະເສີດ ກໍາມະການພັກແຂວງ ເລຂາພັກເມືອງ ເຈົ້າເມືອງໆວຽງພູຄາ, ສະຫາຍ  ປອ  ສຸລີວັນ ພົມມະຈິດ ຮອງຫົວໜ້າຫ້ອງວ່າການແຂວງ  ມີຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ-ຮອງຫົວໜ້າຫ້ອງການ ຄະນະພັກຮາກຖານເຂົ້າຮ່ວມ. ສະຫາຍ ພູມອນ ຄູນສີລິເຮືອງ ກໍາມະການປະຈໍາພັກເມືອງ ຮອງເຈົ້າເມືອງໄດ້ຜ່ານຮ່າງບົດສະຫຼຸບການຈັດຕັ້ງປະຕິບັດ ວຽກງານຮາກຖານການເມືອງ, ພັດທະນາຊົນນະບົດ, ແກ້ໄຂຄວາມທຸກຍາກ ແລະ ວຽກງານ 3 ສ້າງ ໃນໄລຍະ 5 ປີ ແຕ່ ປີ 2016-2021 ແລະ ທິດທາງແຜນການ ຮອດ ປີ 2025  ສະຫາຍໄດ້ຍົກໃຫ້ເຫັນວ່າ:  ເມືອງວຽງພູຄາ ໄດ້ຖືເອົາການພັດທະນາຊົນນະບົດ ແກ້ໄຂຄວາມທຸກຍາກໃຫ້ປະຊາຊົນ ບັນດາເຜົ່າເປັນວຽກງານບູລິມະສິດຂອງເມືອງ, ໄດ້ຊຸກຍູ້ ແລະ ສ້າງເງື່ອນໄຂໃຫ້ປະຊາຊົນ ເຂົ້າເຖິງສິນເຊື່ອ ໂດຍສະເພາະກອງທຶນພັດທະນາບ້ານ,  ທົ່ວເມືອງມີກອງທຶນພັດທະນາບ້ານທັງໝົດ 19 ກອງທຶນ, ມີທຶນໝູນວຽນທັງໝົດ 1.660.688.542 ກີບ ມີສະມາຊິກກອງທຶນທັງໝົດ 920 ຄອບຄົວ; ເອົາໃຈໃສ່ຊຸກຍູ້, ສົ່ງເສີມປະຊາຊົນ ຫັນຈາກການຜະລິດທຳມະຊາດໄປສູ່ການຜະລິດເປັນສິນຄ້າ ເປັນຕົ້ນແມ່ນການປູກຝັງ-ລ້ຽງສັດ, ການບໍລິການ ແລະ ການທ່ອງທ່ຽວ, ສ້າງຕະຫຼາດຢູ່ຊຸມຊົນ ເຮັດໃຫ້ປະຊາຊົນມີບ່ອນຊື້-ຂາຍສິນຄ້າ ເພື່ອສ້າງລາຍຮັບເພີ່ມ ແລະ ສາມາດປັບປຸງຊີວິດການເປັນຢູ່ໃຫ້ດີຂຶ້ນເທື່ອລະກ້າວ, ເຊິ່ງສະແດງອອກ; ປະຈຸບັນມີຄອບຄົວພົ້ນທຸກທັງໝົດ 4.042 ຄອບຄົວ, ກວມ 88,31%, ຂອງຄອບຄົວທັງໝົດ; ມີບ້ານພົ້ນທຸກທັງໝົດ 31 ບ້ານ, ກວມ​ 67,39% ຂອງຈໍານວນບ້ານທັງໝົດ, ມີບ້ານພັດທະນາທັງໝົດ 28 ບ້ານ, ກວມ 60,86​% ຂອງບ້ານທັງໝົດ, ຍັງມີບ້ານທຸກຍາກ 15 ບ້ານ, ກວມ 32,60%; ມີຄອບຄົວພັດທະນາທັງໝົດ 3.859 ຄອບຄົວ, ກວມ 84,31% ຂອງຄອບຄົວທັງໝົດ, ມີຄອບຄົວທຸກຍາກ 535 ຄອບຄົວ, ກວມ 11,69%, ສໍາເລັດການປະເມີນການສ້າງບ້ານໃຫຍ່ກາຍເປັນຕົວເມືອງນ້ອຍໃນຊົນນະບົດ 1 ຈຸດຄື: ຈຸດບ້ານນໍ້າຟ້າ ກຸ່ມບ້ານນໍ້າຟ້າ ແລະ ຜັນຂະຫຍາຍ ເນື້ອໃນມະຕິ 25/ກມສພ ແລະ ຄຳສັ່ງ 34/ນຍ  ແລະ ຂໍ້ຕົກລົງຂອງ ທ່ານເຈົ້າແຂວງ ເລກທີ 238/ຈຂ ກ່ຽວກັບການກຳນົດເອົາເມືອງ, ບ້ານເປົ້າໝາຍພັດທະນາ (ບ້ານ 3 ສ້າງ) ມາຮອດ ປີ 2020 ໄດ້ປະເມີນສ້າງເມືອງເປັນຫົວໜ່ວຍເຂັ້ມແຂງຮອບດ້ານຕາມ 5 ດ້ານ 47 ຕົວຊີ້ວັດ ແລະ ສ້າງບ້ານເປັນຫົວໜ່ວຍພັດທະນາຕາມ 4 ດ້ານ 30 ຕົວຊີ້ວັດ ສິ່ງທີ່ພົ້ນເດັ່ນແມ່ນການປັບປຸງແຕ່ງຕັ້ງໜ່ວຍງານຊ່ວຍວຽກຂັ້ນບ້ານ 5 ຫຼື 3 ໜ່ວຍງານ ຊ່ວຍວຽກຂັ້ນບ້ານ ໄດ້ 30 ບ້ານ, ປັບປຸງການປົກຄອງເລຂາໜ່ວຍພັກບ້ານຄວບຕໍາແໜ່ງນາຍບ້ານໄດ້ 140 ສະຫາຍ, ປັບປຸງກົດລະບຽບບ້ານ ໄດ້ 46 ບ້ານ ກວມ 100% ຝຶກອົບຮົມຄູ່ມື້ ແລະ ນິຕິກຳການບໍລິຫານບ້ານເພື່ອສ້າງຄວາມເຂັ້ມແຂງໃຫ້ອົງການປົກຄອງບ້ານ ໄດ້ 30 ບ້ານ, ຊຸກຍູ້ໃຫ້ບັນດາຂະແໜງການແບ່ງຂັ້ນການຄຸ້ມຄອງ, ເອົາໃຈໃສ່ຄຸ້ມຄອງການຈັດເກັບລາຍຮັບຢ່າງເຂັ້ມງວດ ເພື່ອໃຫ້ກຸ້ມຕົນເອງດ້ານການບໍລິຫານເທື່ອລະກ້າວ.  

     ກອງປະຊຸມຄັ້ງນີ້ມີຄວາມໝາຍສໍາຄັນຫຼາຍ ເປັນການຕີລາຄາຄືນບັນດາໜາກຜົນວຽກງານກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານແກ້ໄຂຄວາມທຸກຍາກ ແລະ ວຽກງານ 3 ສ້າງ ໃນໄລຍະຜ່ານມາ ເພື່ອຍົກໃຫ້ເຫັນດ້ານອ່ອນ ແລະ ຂໍ້ຄົງຄ້າງທີ່ຕ້ອງສືບຕໍ່ປັບປຸງແກ້ໄຂໃຫ້ດີຂື້ນໃນຕໍ່ໜ້າ ແນໃສ່ຍົກສູງຄຸນນະພາບການປັບປຸງຮາກຖານການເມືອງຂອງລະບອບປະຊາທິປະໄຕປະຊາຊົນໃນໄລຍະໃໝ່ໃຫ້ມີຄວາມເຂັ້ມແຂງ ແລະ ໜັກແໜ້ນ, ເພີ່ມທະວີບົດບາດການນໍາຮອບດ້ານຂອງຄະນະພັກ ຕິດພັນກັບການເສີມຂະຫຍາຍຄວາມເປັນເຈົ້າການ ແລະ ຍົກສູງຄວາມຮັບຜິດຊອບໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົົມຢູ່ທ້ອງຖີ່ນຮາກຖານໃຫ້ສູງຂື້ນ. ນອກນັ້ນ, ຜູ້ເຂົ້າຮ່ວມຍັງໄດ້ຮັບຟັງການລາຍງານສົງເສີມການປູກ-ການລ້ຽງ ຕິດພັນກັບການແກ້ໄຂຊີວິດການເປັນຢູຂອງປະຊາຊົນເຂດຊົນນະບົດຮາງໄກສອກຫຼີກ, ຜ່ານແຈ້ງການແນະນໍາກ່ຽວກັບການພັນຂະຫຍາຍຜົນສໍາເລັດກອງປະຊຸມວຽກງານກໍ່ສ້າງຮາກຖານການເມືອງ ຕິດພັນກັບວຽກງານພັກທະນາຊົນນະບົດຮອບດ້ານ ແກ້ໄຂຄວາມທຸກຍາກ ແລະ ວຽກງານ 3 ສ້າງ ສະບັບເລກທີ 01/ຄປພຂ ລົງວັນທີ 4 ມັງກອນ 2023, ຜ່ານແຈ້ງການຂອງຄະນະຈັດຕັ້ງສູນກາງພັກກ່ຽວກັບການປະຕິບັດແຜນກໍານົດພະນັກງານ ນໍາພາຄຸ້ມຄອງ ສະບັບເລກທີ 322/ ຄຈສພ ລົງວັນທີ 2 ພະຈິກ 2022, ແລະ ຮັບຟັງການຜ່ານ ບົດຄໍາເຫັນໂອລົມຂອງ ສະຫາຍທອງລຸນ ສີສຸລິດເລຂາທິການໃຫ່ຍ ຄະນະບໍລິຫານງານສູນກາງພັກ ປະທານປະເທດ ທີ່ໄດ້ກ່າວຕໍ່ກອງປະຊຸມສະຫຼຸບຕີລາຕາວຽກງານກໍ່ສ້າງຮາກຖານການເມືອງຕິດພັນວຽກງານພັດທະນາຊົນນະບົດ ແລະ ວຽກງ 3 ສ້າງ ແລະ ອື່ນໆອີກ.