ໂດຍ: ສົມໄຊ ຫຼ້າດວງມະນີ

     ເພື່ອເປັນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ VIII ຂອງອົງຄະນະພັກແຂວງ, ມະຕິກອງປະຊຸມໃຫຍ່ຂອງອົງຄະນະພັກເມືອງ ແລະ ຮັບປະກັນການຈັດຕັ້ງປະຕິບັດມະຕິ 04/ຄບສພ, ສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງທຸກຂອດໃນວຽກງານຂອງພັກ ໂດຍສະເພາະແມ່ນການຈັດຕັ້ງປະຕິບັດກົດລະບຽບຂອງພັກປະຊາຊົນປະຕິວັດລາວ ສະໄໝທີ XI ຂອງພັກຢ່າງເປັນລະບົບ ແລະ ສ່ອດຄ່ອງກັບຕົວຈິງ. ໃນລະຫວ່າງເດືອນມັງກອນ-ກຸມພາ 2023 ບັນດາເມືອງໃນແຂວງຊຽງຂວາງ ໄດ້ຈັດກອງປະຊຸມເປີດກວ້າງຄະນະບໍລິຫານງານພັກເມືອງ ເຊິ່ງຈັດຕັ້ງປະຕິບັດສໍາເລັດແລ້ວມີຄື: ເມືອງໜອງແຮດ, ເມືອງຜາໄຊ, ເມືອງຄູນ, ເມືອງໝອກ, ເມືອງພູກູດ, ເມືອງແປກ ແລະ ເມືອງຄຳ. ການດໍາເນີນຢູ່ແຕ່ລະພາກສ່ວນມີຜູ້ຕາງໜ້າຈາກຄະນະປະຈຳພັກແຂວງ, ຄະນະຈັດຕັ້ງແຂວງ, ຄະນະກວດກາພັກແຂວງ, ຄະນະໂຄສະນາອົບຮົມແຂວງ ມີຄະນະປະຈຳພັກເມືອງ, ກຳມະການພັກເມືອງ, ຄະນະພັກຮາກຖານ, ເລຂາໜ່ວຍພັກ ແລະ ແຂກຖືກເຊີນເຂົ້າຮ່ວມ.

     ໃນວາລະດໍາເນີນຢູ່ແຕ່ລະເມືອງຜູ້ເຂົ້າຮ່ວມໄດ້ຮັບຟັງການລາຍງານສະພາບການກະກຽມ ແລະ ການຈັດຕັ້ງປະຕິບັດວຽກງານດັ່ງກ່າວຢູ່ເມືອງຂອງຕົນໃນໄລຍະຜ່ານມາ ເປັນຕົ້ນແມ່ນການຈັດຕັ້ງປະຕິບັດວຽກງານຮອບດ້ານຂອງແຕ່ລະເມືອງ, ສະຫຼຸບແຜນພັດທະນາເສດຖະກິດ-ສັງຄົມ ປີ 2022, ລາຍງານການແກ້ໄຂສະພາບປະກົດການຫຍໍ້ທໍ້ທີ່ພົ້ນເດັ່ນໃນສັງຄົມຂອງແຕ່ລະເມືອງປີ 2022, ລາຍງານກ່ຽວກັບວຽກງານປູກຝັງ-ລ້ຽງສັດ ປະຈໍາປີ  2022, ສະກັດກັ້ນການບຸກລຸກຖາງປ່າເຮັດໄຮ່ປູກເຂົ້າ, ປູກຫຍ້າ ແລະ ຜ່ານບົດສະຫຼຸບການຈັດຕັ້ງປະຕິບັດການເກັບລາຍຮັບ-ຄຸ້ມຄອງລາຍຈ່າຍງົບປະມານ ແລະ ທິດທາງແຜນການ ປີ 2023. ພ້ອມນີ້ ກໍ່ຍັງໄດ້ດໍາເນີນຊີວິດການເມືອງ, ຜ່ານບົດສໍາຫຼວດການນໍາພາຂອງຄະນະບໍລິຫານງານພັກເມືອງ ແລະ ທາບທາມຫາງສຽງຄວາມໄວ້ວາງໃຈຂອງບັນດາຄະນະບໍລິຫານງານພັກເມືອງໃນແຕ່ລະເມືອງ ໃຫ້ຖືກຕ້ອງຕາມຮ່າງ ແລະ ນິຕິກໍາທີ່ກ່ຽວຂ້ອງແນໃສຮັບປະກັນລັກສະນະສືບທອດ, ປ່ຽນແທນຕໍ່ເນື່ອງໃນສະເພາະໜ້າ ແລະ ຍາວນານ ບົນພື້ນຖານຄວາມຮຽກຮ້ອງຕ້ອງການຂອງໜ້າທີ່ການເມືອງ; ແຜນພັດທະນາເສດຖະກິດ-ສັງຄົມແຫ່ງລັດຂອງຂະແໜງການ ແລະ ທ້ອງຖິ່ນ; ຄວາມໄວ້ວາງໃຈຂອງຄະນະພັກ, ສະມາຊິກພັກຕ້ອງເລີ່ມຈາກຄວາມເປັນຈິງຂອງຖັນແຖວສະມາຊິກພັກ; ຮັບປະກັນລັກສະນະເປີດກວ້າງ ແລະ ເຄື່ອນເໜັງ, ຮັບປະກັນຄວາມຖືກຕ້ອງໂປ່ງໃສ, ຮອບດ້ານ, ຍຸຕິທໍາ, ຄໍານຶງເຖິງໂຄງປະກອບເພດ, ເຜົ່າ ແລະ ແນໃສ່ພະນັກງານໜຸ່ມໃຫ້ກວມອັດຕາສ່ວນຫຼາຍ, ຍົກສູງຄວາມຮັບຜິດຊອບການເມືອງຂອງຕົນໃນການຄັດເລືອກເອົາບຸກຄະລາກອນເຂົ້າໃນຄະນະບໍລິຫານງານພັກແຕ່ລະຂັ້ນໃຫ້ຖືກຕ້ອງ, ຄົບຖ້ວນຕາມມາດຖານເງື່ອນໄຂທີ່ກໍານົດ; ໃນຕອນທ້າຍກອງປະຊຸມ ຍັງໄດ້ຍ້ອງຍໍຜົນງານ 5 ປີ 2016-2020.