ພາບ ແລະ ຂ່າວໂດຍ: ສ. ສົດໃສ
ວັນທີ 13 ກຸມພາ 2023 ທີ່ຫ້ອງປະຊຸມໃຫຍ່ ໂຮງໝໍມິດຕະພາບ ໄດ້ຈັດກອງປະຊຸມເຜີຍແຜ່, ເຊື່ອມຊຶມເອກະສານສຳຄັນຕ່າງໆ ຂອງພັກ-ຂອງຊາດຂຶ້ນ ໂດຍການເປັນປະທານ ແລະ ເຜີຍແຜ່ຂອງສະຫາຍ ປອ ດຣ ບຸນແຝງ ພູມມະໄລສິດ ກຳມະການສູນກາງພັກ, ເລຂາຄະນະພັກ, ລັດຖະມົນຕີກະຊວງສາທາລະນະສຸກ, ມີຄະນະພັກກະຊວງ, ມີເລຂາ, ຮອງເລຂາໜ່ວຍພັກຮາກຖານ ແລະ ເລຂາ, ຮອງເລຂາໜ່ວຍພັກທີ່ຂຶ້ນກັບຄະນະພັກຮາກຖານ ອ້ອມຂ້າງອົງຄະນະພັກກະຊວງສາທາລະນະສຸກເຂົ້າຮ່ວມ.
ເນື້ອໃນເອກະສານທີ່ເຜີຍແຜ່, ເຊື່ອມຊຶມຄັ້ງນີ້ມີຄື: ຄຳສັ່ງເລກທີ 268/ຄລສພ ວ່າດ້ວຍການດຳເນີນກອງປະຊຸມຄົບຄະນະກາງສະໄໝຂອງຄະນະບໍລິຫານງານພັກແຕ່ລະຂັ້ນ ລົງວັນທີ 20 ມັງກອນ 2023, ຄໍາແນະນໍາ ເລກທີ 25/ຄຈສພ, ລົງວັນທີ 24 ມັງກອນ 2023 ວ່າດ້ວຍການຈັດຕັ້ງປະຕິບັດຄໍາສັ່ງຂອງຄະນະເລຂາທິການສູນກາງພັກ ວ່າດ້ວຍການດຳເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຕ່ລະຂັ້ນ, ຖະແຫຼ່ງຂ່າວການຮ່ວມມືລາວ-ຈີນ ແລະ ມະຕິຂອງກົມວ່າດ້ວຍການຕີລາຄາພະນັກງານ ເລກທີ 21/ກມສພ, ລົງວັນທີ 09/11/2022 ເຊິ່ງການເຜີຍແຜ່, ເຊື່ອມຊຶມນີ້ ເພື່ອເປັນການສ້າງໃຫ້ຄະນະພັກທຸກຂັ້ນ, ສະມາຊິກພັກ-ພະນັກງານ ໄດ້ມີຄວາມຮັບຮູ້ເຂົ້າໃຈ ແລະ ມີຄວາມເປັນເອກະພາບກຳແໜ້ນເນື້ອໃນບັນດາມະຕິ, ຄຳສັ່ງ, ຄຳແນະນຳ ແລະ ການຮ່ວມມືສາກົນຢ່າງເລິກເຊິ່ງ ເປັນບ່ອນອີງໃຫ້ຄະນະພັກແຕ່ລະຂັ້ນນຳເອົາເນື້ອໃນຈິດໃຈດັ່ງກ່າວ ໄປຜັນຂະຫຍາຍໃຫ້ເປັນແຜນການ, ໂຄງການອັນລະອຽດ ຕິດພັນກັບວຽກງານຕົວຈິງໃນຂະແໜງການຂອງຕົນ ບົນຈິດໃຈຍູ້ແຮງການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຂອງພັກ ຄັ້ງທີ XI ແລະ ມະຕິກອງປະຊຸມໃຫຍ່ຈັດຕັ້ງທົ່ວປະເທດ ຄັ້ງທີ XI ໃຫ້ເປັນຂະບວນການຟົດຟື້ນ, ກວ້າງຂວາງ ແລະ ມີຜົນສຳເລັດ.
