ໂດຍ: ນັກຂ່າວແຂວງໄຊສົມບູນ

    ວັນທີ 9 ກຸມພາ 2023 ທີ່ຫ້ອງປະຊຸມບໍລິສັດລາວໂທລະຄົມມະນາຄົມ ມະຫາຊົນ ຈຳກັດ ສາຂາແຂວງໄຊສົມບູນ ໄດ້ຈັດພິທີຮັບເອົາມະຫາຊົນກ້າວໜ້າ ເຂົ້າເປັນສະມາຊິກພັກສໍາຮອງ ຂອງໜ່ວຍພັກພະແນກເຕັກໂນໂລຊີ ແລະ ການສື່ສານແຂວງໄຊສົມບູນ ໂດຍການເປັນປະທານຂອງສະຫາຍ ພູແກ້ວ ອິນທະວົງ ເລຂາໜ່ວຍພັກ ຫົວໜ້າພະແນກເຕັກໂນໂລຊີ ແລະ ການສື່ສານແຂວງ, ມີຕາງໜ້າບັນດາໜ່ວຍພັກ ຈາກຂົງເຂດກຸ່ມເສດຖະກິດ ພ້ອມດ້ວຍສະມາຊິກພັກ ພາຍໃນໜ່ວຍເຂົ້າຮ່ວມ.

   ໃນພິທີ ໄດ້ຜ່ານມະຕິຕົກລົງ ຂອງຄະນະປະຈຳພັກແຂວງ ວ່າດ້ວຍການອະນຸມັດຮັບເອົາມະຫາຊົນຜູ້ກ້າວໜ້າ ເຂົ້າເປັນສະມາຊິກພັກສຳຮອງ ສະບັບເລກທີ 0064/ຄພ.ຊບ ຂອງໜ່ວຍພັກພະແນກເຕັກໂນໂລຊີ ແລະ ການສື່ສານ ຈຳນວນ 6 ສະຫາຍ, ຍິງ 2 ສະຫາຍ. ຈາກນັ້ນ, ສະຫາຍ ເລຂາໜ່ວຍພັກ ໄດ້ຂຶ້ນມອບ​-ຮັບໃບມະຕິຕົກລົງໃຫ້ແກ່ທັງ 6 ສະຫາຍ ເພື່ອເປັນການຢັ້ງຢືນເຂົ້າເປັນສະມາຊິກພັກສໍາຮອງຢ່າງເປັນທາງການ.

    ຕອນ​ທ້າຍ​ພີ​ທີ​ດັ່ງກ່າວ ສະຫາຍ ພູແກ້ວ ອິນທະວົງ ໄດ້ມີຄໍາເຫັນໂອ້ລົມຕໍ່ສະມາຊິກພັກສໍາຮອງ ຈົ່ງເອົາໃຈໃສ່ຝຶກຝົນຫລໍ່ຫຼອມຕົນເອງ ໃຫ້ມີຄວາມຫ້າວຫັນຕໍ່ໜ້າທີ່ວຽກງານໃນທຸກດ້ານ, ມີຄວາມໜັກແໜ້ນຕໍ່ອຸດົມການຂອງພັກ, ເປັນເຈົ້າການຈັດຕັ້ງປະຕິບັດໜ້າທີ່ດ້ວຍຄວາມຮັບຜິດຊອບສູງ, ເປັນແບບຢ່າງຈັດຕັ້ງປະຕິບັດແນວທາງນະໂຍບາຍຂອງພັກ-ລັດ. ພ້ອມນັ້ນ, ສະຫາຍຍັງໄດ້ເນັ້ນໜັກໃຫ້ໜ່ວຍພັກຕະຫຼອດຮອດສະມາຊິກພັກທຸກສະຫາຍ ຈົ່ງເອົາໃຈໃສ່ສຶກສາອົບຮົບການເມືອງ-ແນວຄິດເປັນປົກກະຕິ, ມີຄວາມສາມັກຄີເປັນປຶກແຜ່ນ, ມີຄວາມຫ້າວຫັນຕໍ່ໜ້າທີ່ວຽກງານທີ່ພັກ-ລັດມອບໝາຍໃຫ້ໄດ້ຮັບຜົນສຳເລັດຕາມແຜນການທີ່ວາງໄວ້.