ໂດຍ: ສົມໄຊ ຫຼ້າດວງມະນີ
ໃນລະຫວ່າງວັນທີ 9-10 ກຸມພາ 2023 ທີ່ຫ້ອງປະຊຸມໃຫຍ່ຫ້ອງວ່າການແຂວງ ຊຽງຂວາງ ໄດ້ຈັດກອງປະ ຊຸມເປີດກ້ວາງຄະນະບໍລິຫານງານພັກແຂວງ ຊຽງຂວາງ ຄັ້ງທີ 6 ສະໄໝທີ VIII ໂດຍເປັນປະທານຂອງສະຫາຍ ບຸນຈັນ ສີວົງພັນ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງຊຽງຂວາງ, ມີຄະນະປະ ຈຳພັກແຂວງ, ກຳມະການພັກແຂວງ, ຄະນະພັກຮາກຖານ, ເລຂາໜ່ວຍພັກພະແນກການອ້ອມຂ້າງແຂວງ ແລະ ແຂກຖືກເຊີນເຂົ້າຮ່ວມຈຳນວນ 50 ສະຫາຍ, ຍິງ 4 ສະຫາຍ.
ກອງປະຊຸມຄັ້ງນີ້ ສະຫາຍ ໜໍບີຫາ ຕົ່ງປາວ ຮອງເລຂາພັກແຂວງ, ຜູ້ຊີ້ນຳວຽກງານພັກ-ພະນັກງານ ແລະ ວຽກງານການເມືອງ-ແນວຄິດ ຂັ້ນແຂວງ ໄດ້ລາຍງານການສະຫຼຸບຕີລາຄາການນຳພາ-ຊີ້ນຳ ວຽກງານຮອບດ້ານ ຂອງຄະນະບໍລິຫານງານພັກແຂວງ ປະຈໍາປີ 2022 ແລະ ທິດທາງແຜນການ ປະຈໍາປີ 2023 ເຊິ່ງໄດ້ຍົກໃຫ້ເຫັນ ສະມາຊິກພັກມີຄວາມຕື່ນຕົວເປັນເຈົ້າການປະຕິບັດແນວທາງຂອງພັກ, ມີສະຕິຕໍ່ກົດລະບຽບຂອງພັກ ແລະ ກົດໝາຍຂອງລັດ, ຄະນະພັກແຕ່ລະຂັ້ນໄດ້ຢຶດໝັ້ນຕາມແນວທາງປ້ອງກັນຊາດ-ປ້ອງກັນຄວາມສະຫງົບໄດ້ເຮັດໃຫ້ທົ່ວແຂວງມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ເສດຖະກິດມີການຂະຫຍາຍຕົວຢ່າງຕໍ່ເນື່ອງປະຕິບັດໄດ້ 4% ທຽບໃສ່ແຜນການ (6%) ຫຼຸດຄາດໝາຍ 2%; ລວມຍອດຜະລິດຕະພັນພາຍໃນ GDP ປະຕິບັດໄດ້ 4.651,33 ຕື້ກີບ; ລາຍຮັບສະເລ່ຍຕໍ່ຫົວຄົນ 1.112 ໂດລາ/ຄົນ/ປີ (ພົນລະເມືອງ 278,776 ຄົນ); ສາມາດເກັບລາຍຮັບທ້ອງຖິ່ນເຂົ້າງົບປະມານໄດ້ 185,51 ຕື້ກີບ ລື່ນແຜນການປີ 23,60%, ປະຕິບັດຄຸ້ມຄອງລາຍຈ່າຍງົບປະມານໄດ້ 496,34 ຕື້ກີບ ເທົ່າກັບ 98% ຂອງແຜນການປີ, ແຂວງຍັງຂາດດຸນງົບປະມານ 308,83 ຕື້ກີບ, ຊຸກຍູ້ການສົ່ງເສີມການປູກຝັງ-ລ້ຽງສັດເປັນຂະບວນການກ້ວາງຂວາງສາມາດປັກດຳເຂົ້ານາປີ ແລະ ນາແຊງໄດ້ 27,899 ເຮັກຕາ, ຄຸ້ມຄອງ ແລະ ສົ່ງເສີມວຽກງານພະລັງງານ ແລະ ບໍ່ແຮ່ ໃຫ້ຖືກຕ້ອງສອດຄ່ອງກັບລະບຽບກົດໝາຍ, ສຸ່ມໃສການປ່ອຍສິນເຊື່ອ ເພື່ອສົ່ງເສີມການຜະລິດເປັນສິນຄ້າຂອງກຸ່ມຜະລິດ. ເອົາໃຈໃສ່ກະກຽມຄວາມພ້ອມການເປັນເຈົ້າພາບຈັດງານມະຫາກຳກິລາຄົນພິການ ຄັ້ງທີ III ຄຸ້ມຄອງ, ປັບປຸງບັນດາແຫຼ່ງທ່ອງທ່ຽວທີ່ໄດ້ເປີດບໍລິການ,ປັບປຸງກົງຈັກບໍລິຫານ-ຄຸ້ມຄອງລັດດ້ວຍກົດໝາຍ ໃຫ້ມີຄວາມສັກສິດເປັນກ້າວໆ ເຕົ້າໂຮມຄວາມສາມັກຄີ, ເອົາໃຈໃສ່ປັບປຸງແບບແຜນນຳພາ ແລະ ວິທີເຮັດວຽກ ເພື່ອຍົກສູງບົດບາດການນຳພາຂອງພັກໃຫ້ໜັກແໜ້ນ, ຢຶດໝັ້ນແນວທາງການຕ່າງປະເທດທີ່ພັກວາງອອກຢ່າງສະເໝີຕົ້ນສະເໝີປາຍ, ເສີມຂະຫຍາຍສິດເປັນເຈົ້າ, ຫົວຄິດປະດິດສ້າງ ແລະ ພົວພັນຮ່ວມມືກັບແຂວງແຮກສ່ຽວເພື່ອນມິດຍຸດທະສາດ.
ກອງປະຊຸມໄດ້ດຳເນີນຊີວິດການເມືອງພາຍໃນພັກ ເພື່ອກະກຽມໃຫ້ແກ່ກອງປະຊຸມໃຫຍ່ 3 ຂັ້ນຕິດພັນກັບການປັບປຸງແບບແຜນວິທີເຮັດວຽກ, ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ການກໍ່ສ້າງ-ບໍາລຸງ, ຄຸ້ມຄອງ ແລະ ນຳໃຊ້ພະນັກງານໃນຕໍ່ໜ້າ, ການຊີ້ນຳ-ນຳພາວຽກງານອົງການແນວລາວສ້າງຊາດ, ອົງການຈັດຕັ້ງມະ ຫາຊົນ ແລະ ອົງການຈັດຕັ້ງສັງຄົມ, ວຽກງານການແກ້ໄຂສະພາບການຫຍໍ້ທໍ້ໃນສັງຄົມພາຍໃນແຂວງຊຽງຂວາງ. ຈາກນັ້ນ ກອງປະຊຸມຍັງໄດ້ຮັບຟັງການມີຄຳເຫັນໂອ້ລົມຂອງ ສະຫາຍ ບຸນຈັນ ສີວົງພັນ ເຊິ່ງໄດ້ເນັ້ນໜັກໃຫ້ເອົາໃຈ ໃສ່ຜັນຂະຫຍາຍຜົນຂອງກອງປະຊຸມໃນຄັ້ງນີ້ເຂົ້າສູ່ລົງເລິກວຽກງານຕົວຈິງ, ສຶກສາອົບຮົບວຽກງານການເມືອງ-ແນວຄິດ, ເຕົ້າໂຮມຄວາມສາມັກຄີພາຍໃນ, ພາຍນອກໃຫ້ກວ້າງຂວາງ, ສືບຕໍ່ການຈັດຕັ້ງປະຕິບັດແຜນພັດທະນາເສດຖະກິດສັງຄົມ, ແຜນງົບປະມານ ປີ 2023; ຕິດພັນກັບການຈັດຕັ້ງປະຕິບັດສອງວາລະແຫ່ງຊາດໃຫ້ບັນລຸຜົນຕາມຄາດໝາຍທີ່ວາງໄວ້; ຊີ້ນຳການກະກຽມ ແລະ ດຳເນີນກອງປະຊຸມສາມັນເທື່ອທີສີ່, ຂອງສະພາປະ ຊາຊົນແຂວງຊຸດທີສອງ, ສຸ່ມໃສ່ກະກຽມຄວາມພ້ອມຮອບດ້ານການເປັນເຈົ້າພາບຈັດງານມະຫາກຳກິລາຄົນພິການຄັ້ງທີ III, ການສະເຫຼີມສະຫຼອງພຣະເຈົ້າອົງຫຼວງວັດໄຫຫີນໄຊຍະຣາມ, ສຸ່ມໃສ່ແກ້ໄຂບັນຫາເຄັ່ງຮ້ອນທີ່ກະທົບໂດຍກົງຕໍ່ຊີວິດການເປັນຢູ່ຂອງປະຊາຊົນໃນປັດຈຸບັນ ເປັນຕົ້ນແມ່ນບັນຫາການເພີ່ມຂຶ້ນຂອງລາຄາສິນຄ້າ, ລາຄານໍ້າມັນ ແລະ ອັດຕາແລກປ່ຽນ ທີ່ໄດ້ສົ່ງຜົນກະທົບຕໍ່ການເປັນຢູ່ຂອງປະຊາຊົນເຮັດໃຫ້ຄ່າຄອງຊີບສູງ ແລະ ບັນຫາອື່ນໆ.
