ໂດຍ: ກິນດາວັນ ອ້ວນນາຄູ
ກອງປະຊຸມຄົບຄະນະບໍລິຫານງານພັກເມືອງສາລະວັນ ເປີດກວ້າງ ຄັ້ງທີ 11 ຕິດພັນກັບກອງປະຊຸມອົງການປົກຄອງ ຄັ້ງທີ 10 ສະໄໝທີ IX ໄດ້ຈັດໃນວັນທີ 14 ກຸມພາ 2023 ທີ່ສະໂມສອນເມືອງ ໂດຍການເປັນປະທານຂອງສະຫາຍ ຈັນສີລອນ ສີສົມບູນ ກໍາມະການພັກແຂວງ ເລຂາພັກເມືອງ, ເຈົ້າເມືອງໆສາລະວັນ, ມີບັນດາສະຫາຍຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການ, ເລຂາໜ່ວຍພັກບ້ານ, ນາຍບ້ານເຂົ້າຮ່ວມ.
ກອງປະຊຸມຄັ້ງນີ້ເປັນກອງປະຊຸມທີ່ມີຄວາມສໍາຄັນ ທັງແມ່ນຂີດໝາຍໜື່ງທີ່ຈະໄດ້ພ້ອມກັນສຸມສະຕິປັນຍາເຂົ້າໃນການຄົ້ນຄວ້າ-ວິເຄາະວິໄຈ ຕີລາຄາຄືນສະພາບການຕ່າງໆໃນ 1 ປີ ຜ່ານມາທຽບໃສ່ຄາດໝາຍຂອງແຕ່ລະຂະແໜງການ ແລະ ພ້ອມກັນປະກອບຄຳຄິດຄຳເຫັນຢ່າງກົງໄປກົງມາ ໂດຍຢຶດໝັ້ນຫຼັກການນຳພາຂອງພັກຕາມ 5 ຫຼັກການ 3 ທິດນຳ , ກອງປະຊຸມ ໄດ້ຮັບຟັງລາຍງານການຕີລາຄາການນຳພາຂອງອົງຄະນະພັກເມືອງຕະຫຼອດໄລຍະ 1 ປີຜ່ານມາ, ການຈັດຕັ້ງປະຕິບັດແຜນພັດທະນາເສດຖະກິດສັງຄົມ, ຕີລາຄາວຽກງານກໍ່ສ້າງຮາກຖານການເມືອງ ຕິດພັນກັບວຽກງານພັດທະນາຊົນນະບົດແກ້ໄຂຄວາມທຸກຍາກ ແລະ ວຽກງານ 3 ສ້າງ ພ້ອມທັງ ໄດ້ເຊື່ອມຊືມເອກະສານທີ່ສໍາຄັນຈາກສູນກາງ ແລະ ຂອງແຂວງຈໍານວນໜຶ່ງເຊັ່ນ: ມະຕິກອງປະຊຸມຄົບຄະນະ ຄັ້ງທີ5 ສະໄໝວິສາມັນຂອງຄະນະບໍລິຫານສູນກາງພັກ ສະໄໝທີ XI ສຸມໃສ່ຄົ້ນຄວ້າປຶກສາຫາລື ກ່ຽວກັບວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ ໄປພ້ອມໆກັບການປັບປຸງກົງຈັກການຈັດຕັ້ງໃນທົ່ວລະບົບການເມືອງແຕ່ລະຂັ້ນ ໃຫ້ປອດໃສ, ເຂັ້ມ ແຂງ ແລະ ໜັກແໜ້ນ ແນໃສ່ເຮັດໃຫ້ການຈັດຕັ້ງປະຕິບັດ ມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ໃຫ້ໄດ້ຮັບໝາກຜົນຕາມຄາດໝາຍທີ່ວາງໄວ້.
