ໂດຍ: ທ. ບຸນຕາ ສີຫາລາດ
ວັນທີ 10 ກຸມພາ 2023 ຢູ່ທີ່ຫໍວັດທະນະທໍາແຂວງບໍ່ແກ້ວ ໄດ້ດໍາເນີນກອງປະຊຸມສະຫຼຸບວຽກງານກໍ່ສ້າງພັກ-ພະນັກງານ, ປັບປຸງກົງຈັກການຈັດຕັ້ງທົ່ວແຂວງບໍ່ແກ້ວ ປະຈຳປີ 2022 ແລະ ທິດທາງແຜນການ ປະຈຳປີ 2023 ໂດຍໃຫ້ກຽດເປັນປະທານຮ່ວມ ຂອງສະຫາຍ ປອ ບົວຄົງ ນາມມະວົງ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆບໍ່ແກ້ວ; ສະຫາຍ ເພັງສອນ ແກ້ວວີໄລ ຮອງເລຂາພັກແຂວງ ຜູ້ຊີ້ນຳວຽກງານການເມືອງ-ແນວຄິດ ວຽກພັກ-ພະນັກງານ ແລະ ສະຫາຍ ສົມພອນ ແກ້ວມະນີ ກຳມະການປະຈຳພັກແຂວງ, ຫົວໜ້າຄະນະຈັດຕັ້ງແຂວງ; ມີຄະນະປະຈຳພັກແຂວງ, ກຳມະການພັກແຂວງ, ເລຂາ-ຮອງເລຂາພັກເມືອງ, ຄະນະພັກຮາກຖານ, ໜ່ວຍພັກອ້ອມຂ້າງແຂວງ; ຫົວໜ້າ, ຮອງຫົວໜ້າພະແນກການອົງການອ້ອມຂ້າງແຂວງ; ຫົວໜ້າການເມືອງ, ການທະຫານກອງບັນຊາການ ປກຊ, ປກສ ແຂວງ; ຫົວໜ້າຄະນະຈັດຕັ້ງເມືອງ ແລະ ພະນັກງານຄະນະຈັດຕັ້ງແຂວງບໍ່ແກ້ວເຂົ້າຮ່ວມທັງໝົດຈຳນວນ 110 ສະຫາຍ ຍິງ 25 ສະຫາຍ.
ກອງປະຊຸມໄດ້ຕີລາຄາຄືນການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງທົ່ວແຂວງພ້ອມທັງກຳນົດທິດທາງແຜນການໃນຕໍ່ໜ້າ. ເຊິ່ງໄລຍະ 1 ປີຜ່ານມາສາມາດສະເໜີຄະນະພັກຂັ້ນເທິງເປັນໜ່ວຍພັກປອດໃສ, ເຂັ້ມແຂງ, ໜັກແໜັ້ນ ຈຳນວນ 302 ໜ່ວຍພັກ, ກວມເອົາ 48,63 % ຂອງໜ່ວຍພັກທີ່ໄດ້ຮັບຮອງແຜນປີ 2022; ຂະຫຍາຍສະມາຊິກພັກໄດ້ ຈໍານວນ 719 ສະຫາຍ, ຍິງ 189 ສະຫາຍ; ອອກບັດສະມາຊິກພັກ ໃຫ້ສະມາຊິກພັກສົມບູນໄດ້ 2 ຊຸດ ຈຳນວນ 938 ສະຫາຍ, ຍິງ 284 ສະຫາຍ, ຈັດຝຶກອົບຮົມໃຫ້ພະນັກງານຜູ້ທີ່ເຮັດວຽກງານຈັດຕັ້ງພະແນກການອ້ອມຂ້າງແຂວງໄດ້ ຈໍານວນ 47 ຄົນ, ຍິງ 18 ຄົນ ແລະ ສົ່ງພະນັກງານໄປຍົກລະດັບຢູ່ພາຍໃນ ແລະ ຕ່າງປະ ເທດທັງໜົດ 130 ສະຫາຍ, ຍິງ 36 ສະຫາຍ (ພາຍໃນປະເທດ 114 ສະຫາຍ, ຍິງ 30 ສະຫາຍ; ຕ່າງປະເທດ 15 ສະຫາຍ, ຍິງ 6 ສະຫາຍ. ຈາກນັ້ນ, ຜູ້ທີ່ເຂົ້າຮ່ວມກອງປະຊຸມໄດ້ປະກອບຄໍ າເຫັນ ແລະ ແລກປ່ຽນບົດຮຽນເປັນຕົ້ນແມ່ນ: ວຽກງານຂະຫຍາຍພັກ ແລະ ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ; ວຽກການສ້າງແຜນກຳນົດພະນັກງານນຳພາ-ຄຸ້ມຄອງ; ການຄຸ້ມຄອງ, ສັບຊ້ອນຍົກຍ້າຍພະນັກງານ ແລະ ການປັບປຸງກົງຈັກການຈັດຕັ້ງໃນເມືອງ ແລະ ກົມກອງຂອງຕົນ.
ກອງປະຊຸມຍັງໄດ້ເຜີຍແຜ່ມະຕິກອງປະຊຸມຂອງກົມການເມືອງສູນກາງພັກເລກທີ 21/ກມສພ, ລົງວັນທີ 9 ພະຈິກ 2022 ວ່າດ້ວຍການຕີລາຄາຂອງພະນັກງານ; ຄໍາສັ່ງຂອງຄະນະເລຂາທິການສູນກາງພັກ ສະບັບເລກທີ 268/ຄລສພ, ລົງວັນທີ 20 ມັງກອນ 2023 ວ່າດ້ວຍການດໍາເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຂວງ ແຕ່ລະຂັ້ນ; ຄຳແນະນຳຂອງຄະນະຈັດຕັ້ງສູນກາງ ສະບັບເລກທີ 25/ຄຈສພ, ລົງວັນທີ 24 ມັງກອນ 2023 ກ່ຽວກັບການຈັດຕັ້ງປະຕິບັດຄໍາສັ່ງຂອງຄະນະເລຂາທິການສູນກາງພັກ ວ່າດ້ວຍການດຳເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຂວງ ແຕ່ລະຂັ້ນ; ຄໍາແນະນໍາຂອງຄະນະຈັດຕັ້ງສູນກາງພັກ ສະບັບເລກທີ 26/ຄຈສພ, ລົງວັນທີ 30 ມັງກອນ 2023 ກ່ຽວກັບການຈັດຕັ້ງຜັນຂະຫຍາຍສະຫຼຸບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງທົ່ວປະເທດປະຈຳປີ 2022; ບົດສະຫຼຸບການຈັດຕັ້ງປະຕິບັດວຽກງານກໍ່ສ້າງພັກ-ພະ ນັກງານ ແລະ ປັບປຸງກົງຈັກການຈັດຕັ້ງ ປະຈຳປີ 2022 ແລະ ທິດທາງໜ້າທີ່ ປະຈຳປີ 2023 ຂອງຄະນະຈັດຕັ້ງສູນກາງໂດຍຫຍໍ້; ບາງຄຳເຫັນໂອ້ລົມຂອງສະຫາຍ ນາງ ສີໃສ ລືເດດມູນສອນ ກໍາມະການກົມການເມືອງສູນກາງພັກ ເລຂາທິການສູນກາງພັກ ຫົວໜ້າຄະນະຈັດຕັ້ງສູນກາງພັກຕໍ່ກອງປະຊຸມວຽກງານຈັດຕັ້ງທົ່ວປະເທດ ປະຈຳປີ 2022.
ໃນຕອນທ້າຍຂອງກອງປະຊຸມໄດ້ຮັບຟັງຄຳເຫັນໂອ້ລົມຂອງ ສະຫາຍ ປອ ບົວຄົງ ນາມມະວົງ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆບໍ່ແກ້ວ ເພື່ອເປັນທິດໃຫ້ແກ່ການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ, ປັບປຸງກົງຈັກການຈັດຕັ້ງໃນທົ່ວແຂວງບໍ່ແກ້ວໃນຕໍ່ໜ້າ ໃຫ້ບັນລຸຕາມຄາດໝາຍທີ່ໄດ້ກຳນົດໄວ້.
