ແຫຼ່ງຂ່າວໂດຍ: ທິດລານີ ໂຄດໂຍທາ

     ວັນທີ 15 ກຸມພາ 2023 ພະແນກພະລັງງານ ແລະ ບໍ່ແຮ່ແຂວງ ສາລະວັນ ຈັດກອງປະຊຸມສ້າງແຜນກຳນົດພະນັກງານ-ນຳພາຄຸ້ມຄອງຂຶ້ນຢູ່ທີ່ພັດຕະຄານສິນສະໄໝ ໂດຍການເປັນປະທານຂອງສະຫາຍ ໂພທິຍາ ວົງຈອມສີ ເລຂາຄະນະພັກຮາກຖານຫົວໜ້າພະແນກພະລັງງານ ແລະ ບໍ່ແຮ່ແຂວງ. ເປັນກຽດເຂົ້າຮ່ວມຂອງ ສະຫາຍ ແຫວນພັດ ລັດດາວົງ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງ, ມີສະຫາຍ ມ້ອນ ເພັດພູໄທ ຮອງຫົວໜ້າກົມຈັດຕັ້ງພະ ນັກງານກະຊວງພະລັງງານ ແລະ ບໍ່ແຮ່, ມີຄະນະພັກ, ຄະນະພະແນກ, ເລຂາ-ຮອງເລຂາໜ່ວຍພັກ, ພະນັກງານລັດຖະ ກອນ ພ້ອມດ້ວຍແຂກທີ່ຖືກເຊີນຈາກພາກສ່ວນທີ່ກ່ຽວຂ້ອງເຂົ້າຮ່ວມ.

     ສະຫາຍ ໂພທິຍາ ວົງຈອມສີ ໄດ້ມີຄຳເຫັນກ່າວເປີດກອງປະຊຸມວ່າ: ການຂຶ້ນແຜນກຳນົດພະນັກງານນຳພາ-ຄຸ້ມຄອງ ເປັນວຽກຍຸດທະສາດ ທີ່ສຳຄັນ ແລະ ຈຳເປັນ ຕິດພັນກັບການປັບປຸງກົງຈັກການຈັດຕັ້ງ ແລະ ການຂຽນກຳນົດຕຳແໜ່ງງານ ຂອງແຕ່ລະຂະແໜງພາຍໃນພະແນກ ເພື່ອເຮັດໃຫ້ ມະຕິຂອງກົມການເມືອງສູນກາງພັກ ແລະ ດຳລັດຂອງລັດຖະບານ ໄດ້ຮັບການຈັດຕັ້ງຜັນຂະຫຍາຍ ແລະ ຈັດຕັ້ງປະຕິບັດໃນວຽກງານຕົວຈິງ ແຕ່ລະພະແນກການໃຫ້ໄດ້ຮັບຜົນດີ ເວົ້າລວມ, ເວົ້າສະເພາະກໍ່ຄືພະແນກພະລັງງານ ແລະ ບໍ່ແຮ່ແຂວງ ທັງເປັນບ່ອນອີງໃຫ້ຄະນະໜ່ວຍພັກ ໃນການຂຶ້ນແຜນກຳນົດພະນັກງານນຳພາ, ພະນັກງານຄຸ້ມຄອງໃນສະເພາະໜ້າ ແລະ ຍາວນານ ທີ່ຂື້ນກັບສິດຄຸ້ມຄອງຂອງຕົນ ແລະ ເພື່ອເຮັດໃຫ້ການຈັດຕັ້ງປະຕິບັດຖືກຕ້ອງ ແລະ ເປັນເອກະພາບ ໃນດ້ານວິຊາການສາມາດສ້າງໄດ້ແຜນກໍານົດພະນັກງານທີ່ມີຄຸນນະພາບ ແລະ ສອດຄ່ອງກັບແຜນພັດທະນາໃນແຕ່ລະຂະແໜງ ຂອງພະແນກ, ການສ້າງແຜນກໍານົດພະນັກງານ ແມ່ນການຄາດຄະເນເປົ້າໝາຍພະນັກງານທີ່ຈະຈັດວາງເຂົ້າໃນຕຳແໜ່ງນຳພາ-ຄຸ້ມຄອງແຕ່ລະຂັ້ນ, ແຕ່ລະຂະແໜງການ ແນ່ໃສ່ຮັບປະກັນລັກສະນະສືບທອດ, ປ່ຽນແທນ, ຕໍ່ເນື່ອງ ກະກຽມບຸກຄະລາກອນໃນລັກສະນະເປີດກວ້າງ ເພື່ອໃຫ້ມີແຫຼ່ງເລືອກເຟັ້ນພະນັກງານນຳພາ-ຄຸ້ມຄອງ ຕອບສະໜອງທາງດ້ານຈຳນວນ, ຄຸນນະພາບ, ໂຄງປະກອບບຸກຄະລາກອນໃຫ້ຄົບຊຸດຕາມຄວາມຮຽກຮ້ອງ ຕ້ອງການຂອງບັນດາຕຳແໜ່ງນຳພາ-ຄຸ້ມຄອງແຕ່ລະຂັ້ນ, ແຕ່ລະຂະແໜງການໃນລະບົບການເມືອງ ເພື່ອຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ຫັນເປັນອຸດສາຫະກຳ ແລະ ທັນສະໄໝ ເທື່ອລະກ້າວ ແນໃສ່ປົກປັກຮັກສາ ແລະ ສ້າງສາປະເທດຊາດ ຕາມຈຸດໝາຍສັງຄົມນິຍົມ. ນອກນັ້ນທ່ານກໍ່ໄດ້ຮຽກຮ້ອງມາຍັງບັນດາພະນັກງານຫຼັກແຫຼ່ງ, ພະນັກງານ-ລັດຖະກອນທັງໝົດ, ຈົ່ງຍົກສູງຄວາມຮັບຜິດຊອບ ໃນການຄົ້ນຄວ້າເຊື່ອມຊຶມຕໍ່ເນື້ອໃນເອກະສານຕ່າງໆຢ່າງເລິກເຊິ່ງເຖິງຖອງ ແລະ ຄັດເລືອກເອົາຜູ້ທີ່ມີຄວາມຮູ້, ຄວາມສາມາດ, ບົດຮຽນໃນພຶດຕິກຳຕົວຈິງ ແລະ ມີມາດຖານເງື່ອນໄຂຄົບຖ້ວນ.

     ຈາກນັ້ນ ຜູ້ເຂົ້າຮ່ວມກອງປະຊຸມກໍ່ໄດ້ຮັບຟັງການຜ່ານເອກະສານຕ່າງໆທີ່ກ່ຽວຂ້ອງ ແລະ ໃຊ້ສິດປະຊາທິປະໄຕຂອງຕົນໃນການປ່ອນບັດຄັດເລືອກເອົາພະນັກງານນຳພາ-ຄຸ້ມຄອງ ເພື່ອສືບທອດປ່ຽນແທນໃນການຊີ້ນຳໆພາວຽກງານຂອງຕົນຕາມຂົງເຂດຄວາມຮັບຜິດຊອບໃນຕໍ່ໜ້າ