ວັນທີ 16 ກຸມພາ 2023 ສະຫາຍ ນ. ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັັກ ພ້ອມດ້ວຍຄະນະມາເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງບໍ່ແກ້ວ ໂດຍມີສະຫາຍ ສົມພອນ ແກ້ວມະນີ ຄະນະປະຈໍາພັກແຂວງ, ຫົວໜ້າຄະນະຈັດຕັ້ງແຂວງ ພ້ອມດ້ວຍຄະນະໃຫ້ການຕ້ອນຮັບ.

     ໃນໂອກາດທີ່ມາຢ້ຽມຢາມ ແລະ ເຮັດວຽກໃນຄັ້ງນີ້ ຫົວໜ້າຄະນະຈັດຕັ້ງແຂວງ ບໍ່ແກ້ວໄດ້ລາຍງານຜົນສຳເລັດການເຄື່ອນໄຫວວຽກງານກໍ່ສ້າງພັກ-ພະນັກງານ, ປັບປຸງກົງຈັກການຈັດຕັ້ງທົ່ວແຂວງບໍ່ແກ້ວ ໄລຍະຜ່ານມາ ເຊິ່ງໄດ້ຍົກໃຫ້ເຫັນດ້ານດີ-ຜົນງານ, ດ້ານອ່ອນ-ຂໍ້ຄົງຄ້າງ ແລະ ບາງຂໍ້ສະເໜີແລກປ່ຽນເພື່ອແກ້ໄຂໃນຕໍ່ໜ້າເປັນຕົ້ນແມ່ນ ວຽກງານກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ການນໍາສົ່ງພະນັກງານໄປຮຽນທິດສະດີການເມືອງແຕ່ລະຂັ້ນ ແລະ ສະເໜີຂໍອຸປະກອນຮັບໃຊ້ທີ່ຈຳເປັນເຂົ້າໃນການປະຕິບັດວຽກງານ ພ້ອມງົບປະມານສົມທົບເພື່ອໄປຝຶກອົບຮົມວຽກງານຈັດຕັ້ງຢູ່ບັນດາເມືອງຈຳນວນໜຶ່ງ ຄຽງຄູ່ກັນນັ້ນກໍ່ໄດ້ເປີດກວ້າງໃຫ້ບັນດາພະນັກງານມີຄວາມເຫັນແລກປ່ຽນຖອດຖອນບົດຮຽນເຊິ່ງກັນ ແລະ ກັນ ໃນການຈັດຕັ້ງປະຕິບັດວຽກງານຕົວຈິງໃນໄລຍະຜ່ານມາຢ່າງກົງໄປກົງມາ.

     ໃນຕອນທ້າຍ ສະຫາຍ ຫົວໜ້າຄະນະຈັດຕັ້ງສູນກາງພັກ ໄດ້ມີຄຳເຫັນໂອ້ລົມເຊິ່ງໄດ້ເນັ້ນໃຫ້ຄະນະພັກ-ຄະນະນຳຂອງຄະນະຈັດຕັ້ງແຂວງ ແລະ ເມືອງທຸກສະຫາຍໃຫ້ມີຄວາມຈົງຮັກພັກດີຕໍ່ພັກ, ມີຄວາມເປັນເອກກະພາບຕໍ່ແນວທາງຂອງພັກ, ມີຄວາມຊື່ສັດບໍລິສຸດບໍ່ເອົາອະຄະຕິສ່ວນຕົວມາຕັດສິນວຽກງານ, ເອົາໃຈໃສ່ສຶກສາຄົ້ນຄວ້າ ແລະ ກຳແໜ້ນນິຕິກຳຕ່າງໆ ທີ່ກ່ຽວຂ້ອງກັບໜ້າທີ່ວຽກງານຂອງຕົົນ, ພ້ອມກັນນັ້ນຍັງໃຫ້ແຕ່ລະສະຫາຍນໍາເອົາບັນຫາທີ່ແລກປ່ຽນໄປຜັນຂະຫຍາຍ ແລະ ຈັດຕັ້ງປະຕິບັດໃນໜ້າທີວຽກງານໃຫ້ປະກົດຜົນເປັນຈິງ.