ໂດຍ: ສົມໄຊ ຫຼ້າດວງມະນີ

     ວັນທີ 21 ກຸມພາ 2023 ຄະນະຈັດຕັ້ງແຂວງ ຊຽງຂວາງ ໄດ້ດໍາເນີນກອງປະຊຸມສະຫຼຸບວຽກງານຈັດຕັ້ງ, ກໍ່ສ້າງພັກ-ພະນັກງານ ແລະ ວຽກງານປັບປຸງກົງຈັກການຈັດຕັ້ງທົ່ວແຂວງ ປະຈຳປີ 2022 ແລະ ວາງທິດທາງແຜນການ ປີ 2023 ພາຍໃຕ້ການເປັນປະທານຂອງທ່ານ ສູນທອນ ພັນມີໄຊ ຄະນະປະຈຳພັກແຂວງ, ຫົວໜ້າຄະນະຈັດຕັ້ງແຂວງ,  ມີຮອງເລຂາພັກເມືອງຜູ້ຊີ້ນໍາວຽກງານພັກ-ພະນັກງານ, ຫົວໜ້າຄະນະຈັດຕັ້ງເມືອງ, ຄະນະພັກກອງບັນຊາການທະຫານແຂວງ, ຄະນະພັກກອງບັນຊາການປ້ອງກັນຄວາມສະຫງົບແຂວງ, ເລຂາຄະນະພັກຮາກຖານເລຂາ, ຮອງເລຂາໜ່ວຍພັກອ້ອມຂ້າງແຂວງ, ພະນັກງານທີ່ເຮັດວຽກງານຈັດຕັ້ງຢູ່ພະແນກການຂອງແຂວງ ແລະ ພະນັກ ງານຄະນະຈັດຕັ້ງແຂວງເຂົ້າຮ່ວມ ຈໍານວນ  99 ສະຫາຍ, ຍິງ 32 ສະຫາຍ.

     ກອງປະຊຸມຄັ້ງນີ້, ໄດ້ສະຫຼຸບການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ ແລະ ວຽກງານປັບປຸງ ກົງຈັກການຈັດຕັ້ງ ໃນໄລຍະປີ 2022 ແລະ ວາງທິດທາງແຜນການປີ 2023 ສະເໜີໂດຍສະຫາຍ ຄໍາສີ ວິໄລສັກ ເລຂາໜ່ວຍພັກ, ຮອງຫົວໜ້າຄະນະຈັດຕັ້ງແຂວງ ຊຽງຂວາງ ເຊິ່ງໄດ້ຍົກໃຫ້ເຫັນວຽກງານແຕ່ລະດ້ານ​ເປັນ​ຕົ້ນ​ແມ່ນ ການກໍ່ສ້າງພັກທາງດ້ານການເມືອງ-ແນວຄິດ ຄະນະພັກແຕ່ລະຂັ້ນ ໄດ້ເປັນເຈົ້າການຈັດຕັ້ງເຜີຍແຜ່, ຄົ້ນຄ້ວາ, ເຊື່ອມຊຶມມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ, ກົດລະບຽບພັກສະໄໝທີ XI, ມະຕິກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI, ມະຕິກອງປະຊຸມໃຫຍ່ ຄັ້ງທີ VIII ຂອງອົງຄະນະພັກແຂວງ ແລະ  ມະຕິວ່າດ້ວຍການເພີ່ມທະວີການນຳພາຂອງພັກ ເພື່ອສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງວຽກງານພະນັກງານ, ຄຳສັ່ງວ່າດ້ວຍການປັບປຸງກົງຈັກການຈັດຕັ້ງຂອງບັນດາພະແນກການ-ອົງການ, ເມືອງ ແລະ ມະຕິກອງປະຊຸມໃຫຍ່ຂັ້ນຂອງຕົນ. ພ້ອມກັນນັ້ນ, ກໍໄດ້ຜັນຂະຫຍາຍບັນດານິຕິກຳເຫຼົ່ານັ້ນ ມາຈັດຕັ້ງປະຕິບັດຢູ່ໃນຂັ້ນຂອງຕົນ. ການກໍ່ສ້າງພັກທາງດ້ານການຈັດຕັ້ງຄະນະພັກ, ຄະນະຈັດຕັ້ງແຕ່ລະຂັ້ນ ໄດ້ເອົາໃຈໃສ່ປັບປຸງການຈັດຕັ້ງພັກ ໂດຍຕິດພັນກັບການປັບປຸງກົງຈັກລັດໃຫ້ມີຄວາມສອດຄ່ອງ, ເຄື່ອນໄຫວມີປະສິດທິພາບ ແລະ ປະສິດທິຜົນ;  ສຸມໃສ່ການກໍ່ສ້າງໜ່ວຍພັກປອດໃສ,  ເຂັ້ມແຂງ, ໜັກແໜ້ນ; ໄດ້ແຕ່ງຕັ້ງຄະນະຮັບຜິດຊອບນຳພາປັບປຸງກໍ່ສ້າງການຈັດ ຕັ້ງຮາກຖານພັກ, ຊຸກຍູ້ບັນດາໜ່ວຍພັກສ້າງແຜນ, ປະເມີນຜົນ, ສະຫຼຸບຖອດຖອນບົດຮຽນ. ປີ 2022 ມີ 88 ຄະນະພັກຮາກຖານ, ມີ 1.076 ໜ່ວຍພັກ, ມີສະມາຊິກພັກທັງໝົດ 19,087 ສະຫາຍ, ຍິງ 5,787 ສະຫາຍ, ໄດ້ຮັບຮອງເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນມີ 790  ໜ່ວຍ, ໜ່ວຍພັກແຂງມີ 817 ໜ່ວຍ, ໜ່ວຍພັກກາງມີ  69 ໜ່ວຍ, ໜ່ວຍພັກອ່ອນ 1 ໜ່ວຍ ແລະ ບໍ່ໄດ້ຈັດປະເພດ 189  ໜ່ວຍ. ໃນນີ້ມີສະມາຊິກພັກແຂງ 15,909 ສະຫາຍ, ກາງ 756 ສະຫາຍ, ອ່ອນ 17 ສະຫາຍ, ບໍ່ໄດ້ຈັດປະເພດ 2,404 ສະຫາຍສະມາຊິກພັກຖືກວິ ໄນ 30 ສະຫາຍ. ການກໍ່ສ້າງພັກທາງດ້ານແບບແຜນນຳພາວິທີເຮັດວຽກ ສືບຕໍ່ຍຶດໝັ້ນລະບອບແບບແຜນນຳພາ ແລະ ວິທີເຮັດວຽກຕາມລະບຽບຫຼັກການຂອງພັກ ພ້ອມກັນສູ້ຊົນຈັດຕັ້ງປະຕິບັດວຽກງານຕົວຈິງ ໂດຍມີການຊຸກຍູ້, ຕິດຕາມ, ກວດກາຄວາມຮັບຜິດຊອບຂອງຄະນະພັກ, ສະມາຊິກພັກ, ມີການສະຫຼຸບຖອດຖອນບົດຮຽນແຕ່ລະໄລຍະ, ປະຕິບັດລະບອບສ່ອງແສງລາຍງານເປັນປົກກະຕິ. ວຽກງານພະນັກງານ ໄດ້ສົມທົບກັບພາກສ່ວນທີ່ກ່ຽວຂ້ອງສ້າງແຜນ ແລະ ປະເມີນແຜນການກໍານົດພະນັກງານນໍາພາ-ຄຸ້ມຄອງ ຂັ້ນຕົນຄຸ້ມຄອງສໍາເລັດຄື: ຂັ້ນແຂວງຄຸ້ມຄອງສ້າງແຜນກໍານົດໄດ້ 46 ພາກສ່ວນ, ຍັງ 2 ພາກສ່ວນ (ຍ້ອນລໍຖ້າປັບປຸງພາລະບົດບາດໃໝ່ຈາກກະຊວງທີ່ກ່ຽວຂ້ອງ) ຂັ້ນເມືອງໄດ້ 160 ພາກສ່ວນ, ຍັງ 6 ພາກສ່ວນ, ຂັ້ນບ້ານໄດ້ 406 ບ້ານ, ຍັງ 70 ບ້ານ; ປະເມີນແຜນກໍານົດພະນັກງານນໍາພາ-ຄຸ້ມຄອງຄື: ຂັ້ນແຂວງຄຸ້ມຄອງ ໄດ້ 41 ພາກສ່ວນ, ຍັງ 5 ພາກສ່ວນ, ຂັ້ນເມືອງຄຸ້ມຄອງໄດ້ 10 ພາກສ່ວນ, ຍັງ 111 ພາກສ່ວນ, ຂັ້ນບ້ານໄດ້ 147 ບ້ານ, ຍັງ 329 ບ້ານ. ຖືສຳຄັນການສ້າງພະນັກງານໃຫ້ມີຄວາມໜັກແໜ້ນທາງດ້ານການເມືອງ, ມີຄວາມຊໍານານງານວຽກງານວິຊາສະເພາະ; ມອບໝາຍໜ້າທີ່; ແນະນໍາວຽກງານໃຫ້ຮັບຜິດຊອບ; ສົມທົບການກໍ່ສ້າງ-ບໍາລຸງທາງດ້ານທິດສະດີການເມືອງ-ການປົກຄອງ ແລະ ວຽກງານວິຊາສະເພາະ ຢູ່ສະຖາບັນການສຶກສາ ທັງພາຍໃນ ແລະ ຕ່າງປະເທດ; ສະເພາະຄະນະຈັດຕັ້ງແຂວງ ສົມທົບກັບພາກສ່ວນກ່ຽວຂ້ອງສົ່ງໄປບໍາລຸງ-ກໍ່ສ້າງຢູ່ພາຍໃນປະເທດທັງໝົດ 820  ສະຫາຍ, ຍິງ 158 ສະຫາຍ. ຄະນະພັກ ກະຊວງ-ອົງການ ແລະ ທ້ອງຖິ່ນ ໄດ້ເອົາໃຈໃສ່ປັບປຸງ ກົງຈັກການຈັດຕັ້ງ ຕາມຄຳສັ່ງ 190 ຂອງຄະນະເລຂາທິການສູນກາງພັກ ແລະ ຄຳແນະນໍາ 01 ຂອງນາຍົກລັດຖະມົນຕີຕາມ ທິດກະທັດຮັດ, ສົມເຫດສົມຜົນ, ເຄື່ອນໄຫວມີປະ ສິດທິພາບ, ປະຕິບັດຕາມທິດ 3 ສ້າງ; ໄດ້ດໍາເນີນການປັບປຸງກົງຈັກ ແລະ ພາລະບົດບາດອົງການເສນາທິການຂອງພັກ, ແນວລາວສ້າງຊາດ ແລະ ອົງການຈັດຕັ້ງມະຫາຊົນ ສໍາເລັດ 24 ພາກສ່ວນ, ຍັງ 4 ພາກສ່ວນ,  ປັບປຸງພາລະບົດບາດໄດ້ 10 ພາກສ່ວນ (ຫຼຸດ 10 ຂະແໜງ) ຂັ້ນເມືອງໄດ້ 178 ພາກສ່ວນ,  ປັບປຸງພາລະບົດບາດໄດ້ 65 ພາກ ສ່ວນ (ຫຼຸດ 76 ໜ່ວຍງານ) ຍັງ 113 ພາກສ່ວນ.

     ຄຽງຄູ່​​ຜົນ​ສໍາ​ເລັດ​ທີ່​ກ່າວ​ມາ​ນັ້ນ, ຍັງ​ມີ​ບາງ​ດ້ານ​ທີ່​ຈະ​ຕ້ອງ​ໄດ້​ສືບຕໍ່​ຈັດ​ຕັ້ງ​ປະຕິບັດ​ໃນຕໍ່ໜ້າ ​ໂດຍ​ໄດ້​ກໍານົດ​ທິດ​ທາງໜ້າທີ່ປີ 2023 ຄະນະພັກແຕ່ລະຂັ້ນສືບຕໍ່ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI, ກົດ​ລະບຽບ​ຂອງ​ພັກ ໃຫ້​ເຂົ້າສູ່ລວງເລິກ ແລະ ມີຜົນສໍາເລັດກວ່າເກົ່າ;   ສຸມໃສ່ການດໍາເນີນຊີວິດການເມືອງປັບປຸງປົວແປງພັກຕິດພັນການດໍາເນີນກອງປະຊຸມຄົບຄະນະກາງສະໄໝຂອງຄະນະບໍລິຫານງານພັກແຕ່ລະຂັ້ນ ແລະ ກອງປະຊຸມຮາກຖານພັກ; ​ສືບຕໍ່ປັບປຸງ-ກໍ່ສ້າງພັກໃຫ້ປອດໃສ, ເຂັ້ມແຂງ, ໜັກແໜ້ນທາງດ້ານການເມືອງ, ແນວຄິດ, ການຈັດຕັ້ງ ແລະ ແບບແຜນການນໍາພາ ​ເພື່ອ​ຍົກ​ສູງບົດບາດຄວາມ​ສາມາດ​ນຳພາ​ຂອງ​ຄະນະ​ພັກ, ໜ່ວຍ​ພັກ ​ແລະ ຄວາມ​ເປັນ​ແບບຢ່າງ​ນຳ​ໜ້າ​ຂອງ​ຖັນ​ແຖວ​ສະມາຊິກ​ພັກ; ຈັດຕັ້ງປະຕິບັດວຽກ​ງານ​ພະນັກງານ​ໃຫ້​ມີ​ຄຸນ​ນະພາ​ບ​ໃໝ່,ໃຫ້​ຖືກຕ້ອງ​ສອດຄ່ອງ​ກັບ​ລະບຽບ​ການ​ທີ່​ກຳນົດ​ໄວ້; ຈໍາກັດ, ແກ້ໄຂປະກົດການຫຍໍ້ທໍ້ຕ່າງໆພາຍ​ໃນ​ການຈັດ​ຕັ້ງ, ຄະນະ​ພັກ ​ແລະ ຖັນແຖວສະມາຊິກພັກ-ພະນັກງານຢ່າງທັນການ. ປັບປຸງກົງຈັກການຈັດຕັ້ງຄະນະຂອງພັກ, ອົງການຈັດຕັ້ງມະຫາຊົນແຕ່ລະຂັ້ນໃຫ້ມີ​ຄວາມ​ເຂັ້ມ​ແຂງ, ​ເຄື່ອນ​ໄຫວ​ມີ​ປະສິດທິ​ຜົນ​ສູງ; ໃນຕອນທ້າຍກອງປະຊຸມໄດ້ຍ້ອງຍໍຜົນງານ 5 ປີ 2016-2020 ຂອງພະນັກງານຄະນະຈັດຕັ້ງແຂວງຕື່ມອີກ.