ພາບ - ຂ່າວ: ສຸລິໄຈ ຍອດສຳລິຄຳ
ກອງປະຊຸມສະຫຼຸບວຽກງານກໍ່ສ້າງພັກ-ພະນັກງານ, ປັບປຸງກົງຈັກການຈັດຕັ້ງທົ່ວແຂວງຜົ້ງສາລີ ປະຈຳປີ 2022 ແລະ ວາງທິດທາງແຜນການ ປະຈໍາປີ 2023 ຈັດຂຶ້ນໃນວັນທີ 16 ກຸມພາ 2023 ຢູ່ທີ່ສະໂມສອນໃຫຍ່ຂອງເມືອງບຸນເໜືອ ພາຍໃຕ້ການເປັນປະທານຂອງສະຫາຍ ຄຳຜອຍ ວັນນະສານ ກຳມະການສູນກາງພັກ, ເລຂາພັກແຂວງ, ເຈົ້າແຂວງ ຜົ້ງສາລີ, ມີຄະນະປະຈຳພັກແຂວງ, ກຳມະການພັກແຂວງ, ເລຂາຄະນະພັກຮາກຖານ, ເລຂາ-ຮອງເລຂາໜ່ວຍພັກ ພະແນກການອ້ອມຂ້າງແຂວງ, ກອງບັນຊາການປກຊ-ປກສ ແຂວງ, ເລຂາ-ຮອງເລຂາພັກເມືອງ, ຫົວໜ້າຄະນະຈັດຕັ້ງເມືອງ ແລະ ຜູ້ທີ່ເຮັດວຽກງານຈັດຕັ້ງທົ່ວແຂວງ ເຂົ້າຮ່ວມທັງໝົດ 154 ສະຫາຍ, ຍິງ 31 ສະຫາຍ.
ໃນກອງປະຊຸມ ສະຫາຍ ບຸນພອນ ວິລະກຽດ ຮອງຫົວໜ້າຄະນະຈັດຕັ້ງແຂວງໄດ້ຜ່ານຮ່າງບົດສະຫຼຸບວຽກງານກໍ່ສ້າງພັກ-ພະນັກງານ ແລະ ປັບປຸງກົງ ຈັກການຈັດຕັ້ງທົ່ວແຂວງ ປະຈຳປີ 2022 ແລະ ທິດທາງແຜນການ ປະຈໍາປີ2023 ເຊິ່ງໃນໄລຍະ 1 ປີຜ່ານມາ ຄະນະພັກ, ຄະນະຈັດຕັ້ງແຕ່ລະຂັ້ນໄດ້ເອົາໃຈໃສ່ບູລະນະ ແລະ ປັບປຸງການກໍ່ສ້າງພັກທາງດ້ານການຈັດຕັ້ງໃຫ້ມີຄວາມໜັກແໜ້ນ, ເຂັ້ມແຂງ ໃນທຸກຂົງເຂດວຽກງານ ແຕ່ຂັ້ນແຂວງຮອດຮາກຖານພັກຖືກຕ້ອງ, ສອດຄ່ອງຕາມ 5 ຫຼັກການ 3 ທິດນໍາຂອງພັກ; ປະຈຸບັນອົງຄະນະພັກແຂວງຜົ້ງສາລີ, ລວມມີ 954ການຈັດຕັ້ງຮາກຖານ, ມີ 90 ຄະນະພັກຮາກຖານສໍານັກງານ-ອົງການ ແລະ ຄະນະພັກຮາກຖານກຸ່ມບ້ານ, ທົ່ວແຂວງ ລວມມີ 864 ໜ່ວຍພັກ,ໃນນີ້: ມີ 306 ໜ່ວຍພັກຮາກຖານ ແລະ 558 ໜ່ວຍພັກທີ່ຂຶ້ນກັບຄະນະພັກຮາກຖານ; ໄດ້ເອົາໃຈໃສ່ໃນການຕິດຕາມກໍ່ສ້າງມະຫາຊົນກ້າວໜ້າຂະຫຍາຍເຂົ້າພັກ. ປັດຈຸບັນທົ່ວແຂວງມີສະມາພັກທັງໝົດ 13,832 ສະຫາຍ; ຍິງ 4,206 ສະຫາຍ; ໃນນີ້ສະມາຊິກພັກສົມບູນ 12,681 ສະຫາຍ; ຍິງ3,865 ສະຫາຍ; ສະມາຊິກພັກສຳຮອງ 1,151 ສະຫາຍ; ຍິງ 341 ສະຫາຍ; ມີພະນັກງານ-ລັດຖະກອນທັງໝົດ 6,114 ຄົນ, ຍິງ 3,306 ຄົນ ແລະ ໃນປີ 2022 ໄດ້ປະຕິບັດວິໄນຕໍ່ສະມາຊິກພັກ, ພະນັກງານທີ່ກະທຳຜິດ ໄດ້ທັງໝົດ 32 ທ່ານ, ຍິງ 04 ທ່ານ ຈາກນັ້ນ, ບັນດາພະແນກການ, ອົງການ ແລະ ບັນດາເມືອງໄດ້ຂຶ້ນປະກອບຄຳເຫັນໃນຫຼາຍຫົວຂໍ້ເປັນຕົ້ນ: ການກໍ່ສ້າງພັກທາງດ້ານການເມືອງ - ແນວຄິດ, ການບໍາລຸງ-ກໍ່ສ້າງພະນັກງານ, ວຽກງານປັບປຸງກົງຈັກການຈັດຕັ້ງ ແລະ ການກໍານົດຕໍາແໜ່ງງານ, ການກໍ່ສ້າງພັກທາງດ້ານການຈັດຕັ້ງ ແລະ ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ການກໍ່ສ້າງພັກທາງດ້ານແບບແຜນວິທີນຳພາ, ການສ້າງ ແລະ ປະຕິບັດແຜນກໍານົດພະນັກງານ; ວຽກງານຄຸ້ມຄອງ-ປ້ອງກັນພະນັກງານ, ການແຕ່ງຕັ້ງ, ສັບຊ້ອນ, ຈັດວາງພະນັກງານ ທາງນີ້ກໍ່ເພື່ອຍົກໃຫ້ເຫັນດ້ານດີ ອັນຕັ້ງໜ້າ ແລະ ດ້ານອ່ອນ ຂໍ້ຄົງຄ້າງທີ່ຈະຕ້ອງໄດ້ສືບຕໍ່ປັບປຸງແກ້ໄຂໃນສຸມປີຕໍ່ໜ້າໃຫ້ໄດ້ຮັບຜົນສຳເລັດ.
ໃນໂອກາດນີ້, ສະຫາຍ ຄໍາຜອຍ ວັນນະສານ ໄດ້ມີຄຳເຫັນໂອ້ລົມຊີ້ນຳຕໍ່ກອງປະຊຸມ ເຊິ່ງກ່ອນອື່ນສະຫາຍໄດ້ກ່າວສະແດງຄວາມຍ້ອງຍໍຊົມເຊີຍມາຍັງຄະນະພັກແຕ່ລະຂັ້ນທີ່ໄດ້ເອົາໃຈໃສ່ຊີ້ນຳ ແລະ ຈັດຕັ້ງປະຕິບັດວຽກງານກໍ່ສ້າງພັກ - ພະນັກງານປັບປຸງກົງຈັກການຈັດຕັ້ງໃນໄລຍະທີ່ຜ່ານມາ ພ້ອມກັນນັ້ນສະຫາຍຍັງໄດ້ຮຽກຮ້ອງໃຫ້ຄະນະພັກ, ຄະນະນຳແຕ່ລະຂັ້ນ ຈົ່ງຍົກສູງສະຕິຄວາມເປັນເຈົ້າການ ແລະ ກຳໄດ້ແນວທາງນະໂຍບາຍ, ກົດລະບຽບຂອງພັກ, ມະຕິ, ຄຳສັ່ງ, ລະບຽບກົດໝາຍ ແລະ ນິກຳຕ່າງໆ ກ່ຽວກັບວຽກພັກ, ວຽກພະນັກງານ ໃຫ້ໜັກແໜ້ນ ແລະ ເລິກເຊິ່ງ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານໃຫ້ຖືກຕ້ອງ, ສອດຄ່ອງ ແລະ ມີປະສິດທິຜົນ.
