ໂດຍ: ສ.ສົດໃສ
ໃນວັນທີ 24 ກຸມພາ 2023 ຢູ່ສູນກາງແນວລາວສ້າງຊາດ ໄດ້ຈັດກອງປະຊຸມແລກປ່ຽນບົດຮຽນວຽກງານສື່ມວນຊົນກັບອົງການພາຄີ ແລະ ອົງການການເມືອງ ໂດຍການເປັນປະທານຂອງທ່ານ ຈັນທະວົງ ແສນອາມາດມົນຕີ ຮອງປະທານສູນກາງແນວລາວສ້າງຊາດ, ຜູ້ຊີ້ນຳກົມໂຄສະນາສູນກາງແນວລາວສ້າງຊາດ, ມີບັນດາຮອງປະທານ, ຜູ້ຕາງໜ້າຄະນະກົມ-ພະນັກງານວິຊາການ ທີ່ມາຈາກກົມສື່ມວນຊົນກະຊວງຖະແຫຼ່ງຂ່າວ ແລະ ວັດທະນະທຳ, ພາກສ່ວນຄະນະຈັດຕັ້ງສູນກາງພັກ, ຄະນະໂຄສະນາອົບຮົມສູນກາງພັກ, ສະຫະພັນນັກຮົບເກົ່າແຫ່ງຊາດລາວ, ສູນກາງສະຫະພັນກຳມະບານລາວ, ສູນກາງຊາວໜຸ່ມປະຊາຊົນປະຕິວັດລາວ ແລະ ສູນກາງສະຫະພັນແມ່ຍິງລາວເຂົ້າຮ່ວມ.
ກອງປະຊຸມບັນດາຜູ້ເຂົ້າຮ່ວມໄດ້ຮັບຟັງການລາຍງານຫຍໍ້ກ່ຽວກັບວຽກງານສື່ມວນຊົນຂອງສູນກາງແນວລາວສ້າງຊາດ ເຊິ່ງໄດ້ຍົກໃຫ້ເຫັນຜົນສຳເລັດຕະຫຼອດ ໄລຍະ 26 ປີ ຂອງການເຕີບໃຫຍ່ຂະຫຍາຍຕົວທາງດ້ານປະລິມານ ແລະ ຄຸນນະພາບ ຕາມແຕ່ລະໄລຍະ ເປັນຕົ້ນແມ່ນໄດ້ປະກອບສ່ວນໃນການໂຄສະນາແນວທາງ, ນະໂຍບາຍ, ແຜນພັດທະນາເສດຖະກິດ-ສັງຄົມຂອງລັດ, ມະຕິກອງປະຊຸມໃຫຍ່ຂອງພັກ, ແນວລາວສ້າງຊາດ ແລະ ອົງການຈັດຕັ້ງພາຄີ ເຮັດໃຫ້ສັງຄົມຮັບຮູ້, ເຂົ້າໃຈພາລະບົດບາດແນວລາວສ້າງຊາດກວ້າງຂວາງ ແລະ ເລິກເຊິ່ງຂຶ້ນຕື່ມ. ຄຽງຄູ່ກັນນັ້ນ, ຍັງມີຂໍ້ຫຍຸ້ງຍາກ-ຂໍ້ຈຳກັດອີກຈຳນວນໜຶ່ງໃນໄລຍະຜ່ານມາ ພ້ອມທັງວາງທິດທາງແຜນການໃນຕໍ່ໜ້າຮອດປີ 2026. ຕໍ່ຈາກນັ້ນ, ໄດ້ຮັບຟັງການລາຍງານຫຍໍ້ກ່ຽວກັບວຽກງານສື່ມວນຊົນຈາກແຕ່ລະພາກສ່ວນ. ພ້ອມນີ້ ກອງປະຊຸມຍັງໄດ້ປະກອບຄຳເຫັນແລກປ່ຽນບົດຮຽນ ເພື່ອຊອກຫາວິທີແກ້ໄຂກ່ຽວກັບວຽກງານສື່ມວນຊົນໃນຕໍ່ໜ້າ. ໃນຕອນທ້າຍ, ປະທານກອງປະຊຸມ ໄດ້ສະຫຼຸບສັງລວມຄຳຄິດເຫັນຂອງບັນດາຜູ້ເຂົ້າຮ່ວມ ແລະ ສະແດງຄວາມຂອບໃຈຕໍ່ບັນດາພາກສ່ວນທີ່ໄດ້ເຂົ້າຮ່ວມປະກອບຄຳຄິດຄຳເຫັນແລກປ່ຽນບົດຮຽນເຊິ່ງກັນ ແລະ ກັນ.
