ພາບ: ອາລັນ ພິມມະທອນ, ຂ່າວໂດຍ: ຈິດວິຊານ ວາງຊຶຊາງວ່າງ
ວັນທີ 28 ກຸມພາ 2023 ນີ້ ຄະນະຈັດຕັ້ງແຂວງຫົວພັນ ໄດ້ຈັດກອງປະຊຸມສະຫຼຸບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງທົ່ວແຂວງຫົວພັນ ປະຈຳປີ 2022 ແລະ ວາງທິດທາງແຜນການປີ 2023 ທີ່ຫ້ອງປະຊຸມຊັ້ນ 5 ຕຶກສຳນັກງານແຂວງຫຼັງເກົ່າ ໂດຍພາຍໃຕ້ການເປັນປະທານຂອງສະຫາຍ ວັນໄຊ ແພງຊຸມມາ ກຳມະການສູນກາງພັກ, ເລຂາພັກແຂວງ, ເຈົ້າແຂວງຫົວພັນ, ມີບັນດາສະຫາຍຄະນະປະຈຳພັກແຂວງ, ກຳມະການພັກແຂວງ, ຄະນະເລຂາທິການສະພາປະຊາຊົນແຂວງ, ບັນດາສະຫາຍເລຂາ, ຮອງເລຂາພັກເມືອງ, ຫົວໜ້າຄະນະຈັດຕັ້ງ 10 ເມືອງ, ຄະນະພັກຮາກຖານ ແລະ ຄະນະໜ່ວຍພັກເອກະລາດອ້ອມຂ້າງແຂວງເຂົ້າຮ່ວມທັງໝົດ 62 ສະຫາຍ, ຍິງ 8 ສະຫາຍ.
ໃນກອງປະຊຸມໄດ້ຜ່ານຮ່າງບົດສະຫຼຸບປະຈຳປີ 2022 ແລະ ທິດທາງແຜນການປີ 2023, ຜ່ານບົດປະກອບຄຳເຫັນການສ້າງແຜນກຳນົດພະນັກງານນຳພາ-ຄຸ້ມຄອງ, ບົດປະກອບຄຳເຫັນການດຳເນີນກອງປະຊຸມໃຫຍ່ຂອງໜ່ວຍພັກບ້ານຕິດພັນກັບການປັບປຸງກົງຈັກການຈັດຕັ້ງຂັ້ນບ້ານ ແລະ ພະແນກການ. ພ້ອມນີ້ ກໍຍັງໄດ້ຮັບຟັງການເຜີຍແຜ່ມະຕິຂອງກົມການເມືອງສູນກາງພັກ ສະບັບເລກທີ 21/ກມສພ ວ່າດ້ວຍການຕີລາຄາພະນັກງານ, ຄຳສັ່ງເລກທີ 268/ຄລສພ ວ່າດ້ວຍການດຳເນີນກອງປະຊຸມຄົບຄະນະກາງສະໄໝ, ຄຳແນະນຳຂອງຄະນະຈັດຕັ້ງສູນກາງພັກ ສະບັບເລກທີ 25/ຄຈສພ ວ່າດ້ວຍການດຳເນີນກອງປະຊຸມຄົບຄະນະກາງສະໄໝຂອງຄະນະພັກແຕ່ລະຂັ້ນ. ຈາກນັ້ນບັນດາສະຫາຍທີ່ເຂົ້າຮ່ວມກອງປະຊຸມໄດ້ປະກອບຄຳຄິດເຫັນ ເພື່ອແລກປ່ຽນຖອດຖອນບົດຮຽນກ່ຽວກັບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງໃນໄລຍະ 1 ປີຜ່ານມາ ແລະ ທິດທາງໃນຕໍ່ໜ້າ.
ກອງປະຊຸມ ໄດ້ເນັ້ນຢໍ້າໃຫ້ຄະນະພັກແຕ່ລະຂັ້ນນັບແຕ່ຮາກຖານພັກບັນດາພະແນກການຂອງແຂວງລົງຫາອົງຄະນະພັກເມືອງ ແລະ ຄະນະໜ່ວຍພັກບ້ານ ທີ່ເປັນເສນາທິການໃຫ້ກັບອົງຄະນະພັກແຂວງ ຕ້ອງໄດ້ເອົາໃຈໃສ່ຢູ່ 4 ບັນຫາຄື: ບັນຫາທີ 1 ການກໍ່ສ້າງພັກທາງດ້ານການເມືອງ-ແນວຄິດ ເປັນວຽກສຳຄັນ, ເປັນກົກຂອງທຸກວຽກງານ, ເພາະເປັນວຽກທີ່ກວມເອົາທັງການວາງແນວທາງການເມືອງ, ເມື່ອມີແນວທາງການເມືອງຖືກຕ້ອງ ຈຶ່ງຈະມີແນວທາງການຈັດຕັ້ງ, ມີແນວທາງພະນັກງານ ແລະ ວິທີຈັດຕັ້ງປະຕິບັດຖືກຕ້ອງ. ສະນັ້ນ, ຄະນະພັກແຕ່ລະຂັ້ນເວົ້າລວມ, ເວົ້າສະເພາະຄະນະຈັດຕັ້ງແຂວງ ແລະ ຄະນະຈັດຕັ້ງເມືອງທີ່ເປັນເສນາທິການ ຕ້ອງສືບຕໍ່ເອົາໃຈໃສ່ສຶກສາອົບຮົມສະມາຊິກພັກ-ພະນັກງານ ທີ່ຢູ່ໃນຄວາມຮັບຜິດຊອບ ໃຫ້ມີຄວາມຮັບຮູ້ເຂົ້າໃຈ ແລະ ເປັນເອກະພາບຕໍ່ແນວທາງນະໂຍບາຍຂອງພັກ, ເຂົ້າໃຈສະພາບຄວາມເປັນຈິງຂອງທ້ອງຖິ່ນ, ຂະແໜງການ ເພື່ອເປັນເອກະພາບໃນການຈັດຕັ້ງປະຕິບັດໃຫ້ປະກົດຜົນເປັນຈິງ ເຮັດໃຫ້ການເວົ້າໄປຄຽງຄູ່ກັບການຈັດຕັ້ງປະຕິບັດຕົວຈິງ. ພ້ອມກັບເອົາໃຈໃສ່ສຶກສາອົບຮົມຄຸນທາດການເມືອງ ເຮັດໃຫ້ສະມາຊິກພັກ-ພະນັກງານ ຕັ້ງໜ້າຝຶກຝົນຫຼໍ່ຫຼອມຕົນເອງ ໃຫ້ກາຍເປັນບຸກຄົນຜູ້ເຮັດແທ້ທຳຈິງ ແລະ ເປັນຜູ້ປອດໃສຂາວສະອາດ ເພື່ອຮັກສາ ແລະ ເສີມຂະຫຍາຍລັກສະນະນຳໜ້າຂອງພັກຢ່າງສະເໝີຕົ້ນສະເໝີປາຍ; ບັນຫາທີ 2 ເອົາໃຈໃສ່ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ການຂະຫຍາຍສະມາຊິກພັກ, ການປັບປຸງກົງຈັກການຈັດຕັ້ງຂັ້ນຕ່າງໆ; ບັນຫາທີ 3 ວຽກງານພະນັກງານ ຕ້ອງເອົາໃຈໃສ່ສ້າງພະນັກງານໃຫ້ມີຄຸນທາດການເມືອງໜັກແໜ້ນ, ມີຄວາມອົດທົນຜ່ານຜ່າອຸປະສັກຫຍຸ້ງຍາກ, ມີຈັນຍາບັນ, ຈັນຍາທໍາ, ມີຄວາມໂປ່ງໃສ, ທ່ຽງທໍາ ໃນການປະຕິບັດໜ້າທີ່ວຽກງານ; ຍົກສູງປະສິດທິພາບຂອງພະນັກງານນໍາພາ-ຄຸ້ມຄອງໃຫ້ກ້າວເຂົ້າສູ່ບາດກ້າວໃໝ່ດ້ວຍການຈັດຕັ້ງປ່ຽນແປງໃໝ່ເນື້ອໃນ ແລະ ວິທີການປະຕິບັດຕົວຈິງກ່ຽວກັບວຽກງານພະນັກງານ; ບັນຫາທີ 4 ວຽກງານກົງຈັກການຈັດຕັ້ງ ສໍາລັບດ້ານວຽກພັກ ແມ່ນໃຫ້ສືບຕໍ່ປະຕິບັດຕາມກົດລະບຽບຂອງພັກ ໝາຍວ່າລະບົບການຈັດຕັ້ງຂອງພັກແມ່ນໃຫ້ສ້າງຕາມລະບົບກົງຈັກບໍລິຫານລັດ, ສ່ວນການຈັດຕັ້ງຮາກຖານພັກນອກຈາກສ້າງຢູ່ບ້ານ, ສໍານັກງານອົງການຍັງສ້າງຕາມຫົວໜ່ວຍວິຊາການ, ການຜະລິດ ຫຼື ຕາມຫົວໜ່ວຍທຸລະກິດໃຫ້ມີໜ່ວຍພັກນໍາພາ, ຫຼີກເວັ້ນບໍ່ໃຫ້ມີໜ່ວຍພັກດຽວນໍາພາຫຼາຍບ້ານ, ນໍາພາຫຼາຍກົມກອງ, ສໍາຄັນທີ່ສຸດແມ່ນບັນຫາການປະສານງານໃຫ້ກົມກຽວ, ມີຄວາມເປັນເອກະພາບສູງລະຫວ່າງສາຍຕັ້ງ-ສາຍຂວາງກ່ຽວກັບການປັບປຸງກົງຈັກການຈັດຕັ້ງລວມທັງການສັບຊ້ອນ, ຈັດວາງພະນັກງານ.
ຕອນທ້າຍ ປະທານກອງປະຊຸມໄດ້ຮຽກຮ້ອງໃຫ້ຄະນະພັກທຸກຂັ້ນຈົ່ງເອົາໃຈໃສ່ເປັນເຈົ້າການໃນການນຳພາ-ຊີ້ນຳວຽກງານຕາມພາລະບົດບາດ, ຂອບເຂດສິດ ແລະ ໜ້າທີ່ຂອງຕົນດ້ວຍຄວາມຮັບຜິດຊອບສູງ, ຄະນະພັກ, ຄະນະນຳຕ້ອງຖືສຳຄັນຕໍ່ວຽກງານກໍ່ສ້າງພັກ-ພະນັກງານຖືເປັນຂອດຕັດສິນວ່າບ່ອນໃດທີ່ເຮັດວຽກງານກໍ່ສ້າງພັກ-ພະນັກງານໄດ້ດີບ່ອນນັ້ນແມ່ນມີຄວາມສະຫງົບ, ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນຕ້ອງຖືເອົາຄຸນນະພາບເປັນກົກ ແລະ ການສ້າງພະນັກງານ ເປັນຕົ້ນແມ່ນການປັບປຸງກົງຈັກການຈັດຕັ້ງແຕ່ລະພາກສ່ວນຕ້ອງຖືເອົາແຜນກຳນົດພະນັກງານນຳພາ-ຄຸ້ມຄອງມາເປັນບ່ອນອີງໃນການຄົ້ນຄວ້າ ແລະ ປະເມີນຜົນ. ທັງໝົດເຫຼົ່ານັ້ນບັນຫາສໍາຄັນແມ່ນຂຶ້ນກັບທຸກສະຫາຍທີ່ເປັນເສນາທິການໃຫ້ຄະນະພັກແຕ່ລະຂັ້ນ ຕ້ອງໄດ້ເອົາໃຈໃສ່ຄົ້ນຄວ້າ, ກວດຄືນບັນດານິຕິກໍາວຽກພັກ-ພະນັກງານ ແລະ ປັບປຸງກົງຈັກການຈັດຕັ້ງ, ກໍາໃຫ້ໄດ້, ເຂົ້າໃຈຢ່າງເລິກເຊິ່ງ ຖືກຕ້ອງກັບບັນດາກົດໝາຍທີ່ກ່ຽວຂ້ອງ, ບັນດາມະຕິ, ຂໍ້ຕົກລົງຕ່າງໆລວມທັງດໍາລັດກ່ຽວກັບການຈັດຕັ້ງ ແລະ ການເຄື່ອນໄຫວຂອງກະຊວງ ແລະ ທ້ອງຖິ່ນ, ລວມທັງນິຕິກໍາຂອງຄະນະຈັດຕັ້ງສູນກາງພັກໃນແຕ່ລະໄລຍະ ແລະ ຖືເອົານິຕິກໍາເຫຼົ່ານັ້ນເປັນບ່ອນອີງໃນການປະຕິບັດໜ້າທີ່ເປັນເສນາທິການໃຫ້ແກ່ຄະນະພັກທຸກຂັ້ນກ່ຽວກັບວຽກພັກ, ພະນັກງານ ແລະ ປັບປຸງກົງຈັກການຈັດຕັ້ງ ແລະ ນໍາເອົາເນື້ອໃນຈິດໃຈຂອງກອງປະຊຸມໄປຈັດຕັ້ງຜັນຂະຫຍາຍ, ນໍາເອົາຄໍາຄິດຄໍາເຫັນທີ່ໄດ້ແລກປ່ຽນເພື່ອໄປນໍາໃຊ້ເຂົ້າໃນການປະຕິບັດໜ້າທີ່ການເມືອງໃຫ້ມີຜົນສໍາເລັດຫຼາຍຂຶ້ນກວ່າເກົ່າ.
