ໂດຍ: ໄຊຍະວົງ
ໃນລະຫວ່າງວັນທີ 13-14 ມີນາ 2023 ທີ່ສະໂມສອນແຂວງຄໍາມ່ວນ ໄດ້ຈັດກອງປະຊຸມສະຫຼຸບວຽກງານຈັດຕັ້ງ ກໍ່ສ້າງພັກ-ພະນັກງານ, ປັບປຸງກົງຈັກການຈັດຕັ້ງ, ວຽກງານການເມືອງ-ແນວຄິດ ປະຈໍາປີ 2022 ແລະ ທິດທາງແຜນການປີ 2023 ທົ່ວແຂວງ ແລະ ຜັນຂະຫຍາຍເນື້ອໃນກອງປະຊຸມວຽກງານການເມືອງ-ແນວຄິດ ທົ່ວປະເທດ ໂດຍເປັນກຽດເຂົ້າຮ່ວມຂອງ ສະຫາຍ ຄໍາພັນ ເຜີຍຍະວົງ ຄະນະເລຂາທິການສູນກາງພັກ, ປະທານສະພາທິດສະດີສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ສະຫາຍ ວັນໄຊ ພອງສະຫວັນ ກຳມະການສູນກາງພັກ, ເລຂາພັກແຂວງ, ເຈົ້າແຂວງຄຳມ່ວນ, ມີບັນດາສະຫາຍຮອງເລຂາພັກແຂວງ, ຄະນະປະຈໍາພັກແຂວງ, ກໍາມະການພັກແຂວງ, ພະນັກງານອາວຸດໂສບຳນານ, ເລຂາ-ຮອງເລຂາຄະນະພັກຮາກຖານ, ເລຂາ-ຮອງເລຂາພັກເມືອງ, ໜ່ວຍພັກຮາກຖານ, ພະແນກການ, ອົງການຈັດຕັ້ງທຽບເທົ່າເຂົ້າຮ່ວມ.
ສະຫາຍ ວັນໄຊ ພອງສະຫວັນ ໄດ້ກ່າວມີຄໍາເຫັນຕໍ່ກອງປະຊຸມວ່າ: ກອງປະຊຸມໃນຄັ້ງນີ້ ໄດ້ລວມສອງກອງປະຊຸມ ເຂົ້າເປັນກອງປະຊຸມດຽວກັນ ເຊິ່ງເປັນກອງປະຊຸມທີ່ມີຄວາມໝາຍຄວາມສໍາຄັນຢ່າງຍິ່ງ ຕໍ່ກັບວຽກງານກໍ່ສ້າງພັກ-ພະນັກງານ ແລະ ວຽກງານການເມືອງ-ແນວຄິດຂອງແຂວງຄໍາມ່ວນ, ຜູ້ແທນກອງປະຊຸມຈະໄດ້ພ້ອມກັນສະຫຼຸບຕີລາຄາຄືນໝາກຜົນການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ, ປັບປຸງກົງຈັກການ ຈັດຕັ້ງ ແລະ ວຽກງານການເມືອງ-ແນວຄິດຕິດພັນກັບການຈັດຕັ້ງຜັນຂະຫຍາຍເນື້ອໃນ ກອງປະຊຸມວຽກງານຈັດຕັ້ງ ທົ່ວປະເທດ ຄັ້ງທີ XI ແລະ ກອງປະຊຸມວຽກງານການເມືອງ-ແນວຄິດ ທົ່ວປະເທດ ຄັ້ງທີ V ໃນໄລຍະ1 ປີຜ່ານມາ, ຜ່ານການຈັດຕັ້ງປະຕິບັດມີຜົນສຳເລັດ, ດ້ານດີ-ຂໍ້ສະດວກທີ່ຕ້ອງສືບຕໍ່ສົ່ງເສີມ, ດ້ານອ່ອນ-ຂໍ້ຫຍຸ້ງຍາກທີ່ຕ້ອງປັບປຸງແກ້ໄຂ, ສາເຫດ ແລະ ບົດຮຽນທີ່ຖອດຖອນໄດ້ ເພື່ອສືບຕໍ່ວາງທິດທາງແຜນການ ແລະ ວຽກງານຈຸດສຸມໃນປີ 2023 ນີ້, ສະນັ້ນ ເພື່ອໃຫ້ກອງປະຊຸມຄັ້ງນີ້ບັນລຸຕາມຈຸດປະສົງຄາດໝາຍທີ່ວາງໄວ້ນັ້ນ ຕ້ອງໄດ້ພ້ອມກັນປຶກສາຫາລືຄົ້ນຄວ້າບັນຫາຕ່າງໆນຳກັນ. ຍົກສູງຄວາມຮັບຜິດຊອບຂອງຕົນ ເປັນເຈົ້າການໃນການຕິດຕາມ, ຮັບຟັງ ແລະ ປະກອບຄໍາຄິດ-ຄຳເຫັນຢ່າງຕັ້ງໜ້າ, ສ້າງສັນ, ບັນຫາໃດບໍ່ທັນລະອຽດຈະແຈ້ງແມ່ນໃຫ້ແລກປ່ຽນຄຳເຫັນໃຫ້ລະອຽດ, ຈະແຈ້ງ ເພື່ອສ້າງຄວາມຮັບຮູ້, ເຂົ້າໃຈ ແລະ ສ້າງຄວາມເປັນເອກະພາບສູງຕໍ່ເນື້ອໃນບົດສະຫຼຸບຕີລາຄາຜົນການຈັດຕັ້ງປະຕິບັດວຽກງານ ໃນປີ 2022 ແລະ ທິດທາງແຜນການ ປີ 2023 ພ້ອມກັນນຳໄປຈັດຕັ້ງປະຕິບັດໃຫ້ມີປະສິດທິພາບ-ປະສິດທິຜົນສູງ.
ຈາກນັ້ນ, ສະຫາຍ ສົມໃຈ ພານີຈັນ ກຳມະການປະຈຳພັກແຂວງ, ຫົວໜ້າຄະນະຈັດຕັ້ງແຂວງໄດ້ຜ່ານຮ່າງບົດສະຫລຸບຕີລາຄາການຈັດຕັ້ງປະຕິບັດວຽກງານດັ່ງກ່າວ ໂດຍໄດ້ຍົກໃຫ້ເຫັນຜົນສຳເລັດທີ່ສຳຄັນໃນຫລາຍດ້ານ ເປັນຕົ້ນວຽກງານກໍ່ສ້າງພັກ, ການກໍ່ສ້າງພັກດ້ານການຈັດຕັ້ງ ໄດ້ເອົາໃຈໃສ່ການປັບປຸງການຈັດຕັ້ງຂອງພັກ ຕິດພັນກັບການປັບປຸງກົງຈັກລັດໃຫ້ມີຄວາມສອດຄ່ອງ, ເຄື່ອນໄຫວມີປະສິດທິພາບ ແລະ ປະສິດທິຜົນ. ໃນປີ 2022 ຮັບຮອງໜ່ວຍພັກປອດໃສ, ເຂັ້ມແຂງ, ໜັກແໜ້ນ 732 ໜ່ວຍ, ເທົ່າກັບ 61,60% ຂອງໜ່ວຍພັກທັງໝົດ, ທົ່ວແຂວງມີ 10 ອົງຄະນະພັກເມືອງ, ມີ 2 ອົງຄະນະພັກ ປກຊ-ປກສ, ມີການຈັດຕັ້ງຮາກຖານພັກທັງໝົດ 1.000 ກວ່າຮາກຖານ, ໃນນັ້ນມີຄະນະພັກຮາກຖານ 103 ຮາກຖານ, ມີໜ່ວຍພັກທີ່ຂຶ້ນກັບຄະນະພັກຮາກຖານ 1.000 ກວ່າໜ່ວຍ, ໜ່ວຍພັກເອກະລາດ 688 ໜ່ວຍພັກ, ເພີ່ມຂຶ້ນ 10 ໜ່ວຍ ເທົ່າກັບ 0,84% ຂອງໜ່ວຍພັກທັງໝົດ, ມີສະມາຊິກພັກທັງໝົດ 22.000 ກວ່າສະຫາຍ, ຍິງ 6.000 ກວ່າສະຫາຍ. ປະຈຸບັນແຂວງຄໍາມ່ວນ ມີພະນັກງານ-ລັດຖະກອນ ທັງໝົດ 9.000 ກວ່າສະຫາຍ,ຍິງ 4.000 ກວ່າສະຫາຍ, ໄດ້ປັບປຸງກົງຈັກການຈັດຕັ້ງຂັ້ນແຂວງ ສໍາເລັດ 11 ພະແນກການ, 7 ອົງການທຽບເທົ່າພະແນກການ, ຂັ້ນເມືອງ ສໍາເລັດ 5 ເມືອງ ໃນນັ້ນ, ຮັບຮອງພາລະບົດບາດຂອງບັນດາຫ້ອງການຂັ້ນເມືອງແລ້ວ 54 ຫ້ອງການ, ປັບປຸງກົງຈັກການຈັດຕັ້ງ ແລະ ການເຄື່ອນໄຫວ, ຄົ້ນຄວ້າກໍານົດຕໍາແໜ່ງງານ, ພາລະບົດບາດຂອງຄະນະຈັດຕັ້ງແຂວງຈາກ 5 ຂະແໜງ ມາເປັນ 4 ຂະແໜງ, ຄະນະຈັດຕັ້ງເມືອງຈາກ 4 ໜ່ວຍງານມາເປັນ 3 ໜ່ວຍງານ.
ຄຽງຄູ່ກັບຜົນສໍາເລັດດັ່ງກ່າວຍັງໄດ້ຍົກໃຫ້ເຫັນດ້ານອ່ອນ ຂໍ້ຄົງຄ້າງ ລວມເຖິງວຽກງານຈຸດສຸມທີ່ຕ້ອງໄດ້ສືບຕໍ່ປັບປຸງແກ້ໄຂໃນຕໍ່ໜ້າເປັນຕົ້ນແມ່ນ ການຈັດຕັ້ງເຊື່ອມຊຶມແນວທາງ, ແຜນນະໂຍບາຍຂອງພັກ, ກົດໝາຍ, ລະບຽບ ແລະ ນິຕິກໍາຕ່າງໆຂອງພັກ-ລັດ ເຖິງວ່າໄດ້ເຮັດຫຼາຍ ແຕ່ຮູບການ, ວິທີການ ແລະ ເນື້ອໃນຍັງເປັນແບບລວມໆ, ບໍ່ທົ່ວເຖິງທຸກເປົ້າໝາຍ, ການຈັດຕັ້ງບາງພາກສ່ວນຂາດຄວາມເອົາໃຈໃສ່ຕໍ່ວຽກງານດັ່ງກ່າວເຮັດໃຫ້ຄວາມຮັບຮູ້, ຄວາມເຂົ້າໃຈຂອງສະມາຊິກພັກ, ພະນັກງານ-ລັດຖະກອນ, ທະຫານ, ຕໍາຫຼວດ ແລະ ປະຊາຊົນ ບໍ່ທັນເລິກເຊິ່ງ, ບໍ່ທັນມີການຫັນປ່ຽນຢ່າງຕັ້ງໜ້າທາງດ້ານແນວຄິດ; ບໍ່ທັນເອົາໃຈໃສ່ກໍາແໜ້ນສະພາບແນວຄິດຈິດໃຈ ແລະ ຫາງສຽງຕ່າງໆ ຂອງສັງຄົມ, ຈໍານວນໜຶ່ງເສື່ອມຖອຍທາງດ້ານຄຸນທາດການເມືອງ ແລະ ຄຸນສົມບັດສິນທໍາປະຕິວັດ, ສວຍໃຊ້ໜ້າທີ່ຕໍາແໜ່ງເພື່ອຫາຜົນປະໂຫຍດສ່ວນຕົວ, ການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນເຖິງແມ່ນວ່າຈະມີຄວາມເອົາໃຈໃສ່ ແຕ່ຄະນະພັກບາງບ່ອນຍັງຖືເບົາ ແລະ ມີຄວາມຊັກຊ້າບໍ່ທັນຫັນເອົາແຜນການກໍ່ສ້າງໜ່ວຍພັກ ມາເປັນແຜນການເຄື່ອນໄຫວປະຈຳເດືອນຂອງຕົນ, ບໍ່ທັນຜັນຂະຫຍາຍເນື້ອໃນຕົວຊີ້ບອກໃຫ້ແທດເໝາະກັບຮາກຖານຕົນ. ຈາກນັ້ນ, ກອງປະຊຸມໃນຄັ້ງນີ້ ບັນດາຜູ້ແທນກໍໄດ້ປະກອບຄໍາເຫັນແລກປ່ຽນຢ່າງສ້າງສັນຕໍ່ບັນດາເນື້ອໃນບົດສະຫຼຸບຕີລາຄາຜົນການຈັດຕັ້ງປະຕິບັດວຽກງານ ໃນປີ 2022 ແລະ ທິດທາງແຜນການ ປີ 2023 ແລະ ມີເປັນເອກະພາບການພ້ອມກັນນຳໄປຈັດຕັ້ງປະຕິບັດໃຫ້ມີປະສິດທິພາບ-ປະສິດທິຜົນສູງ.
ໃນຕອນທ້າຍ ຜູ້ແທນກອງປະຊຸມໄດ້ຮັບຟັງຄໍາເຫັນໂອ້ລົມຂອງສະຫາຍ ຄຳພັນ ເຜີຍຍາວົງ ຄະນະເລຂາທິການສູນກາງພັກ, ປະທານສະພາທິດສະດີສູນກາງພັກ, ຫົວໜ້າຄະນະໂຄສະນາອົບຮົມສູນກາງ ສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ແລະ ຜົນສໍາເລັດທີ່ຄະນະພັກຍາດມາໄດ້ທີ່ສະແດງອອກໃນບົດສະຫຼຸບຂອງກອງປະຊຸມ ພ້ອມກັນນັ້ນ ຍັງມີບາງຄໍາເຫັນຊີ້ນໍາຕໍ່ຜູ້ແທນກອງປະຊຸມຈົ່ງເພີ່ມທະວີຄວາມເອົາໃຈໃສ່ນໍາພາ-ຊີ້ນໍາວຽກງານວຽກງານຈັດຕັ້ງ, ກໍ່ສ້າງພັກ-ພະນັກງານ, ປັບປຸງກົງຈັກການຈັດຕັ້ງ, ການເມືອງ- ແນວຄິດ, ຍົກສູງບົດບາດຄວາມຮັບຜິດຊອບລວມ ຂອງຫມູ່ຄະນະ ແລະ ຂອງແຕ່ລະສະຫາຍໃນຄະນະ, ເປັນເຈົ້າການຕິດຕາມກໍາສະພາບບັນຫາເລັ່ງທວງຂອງຂະແຫນງການ ແລະ ທ້ອງຖິ່ນຕົນ ເພື່ອສະຫນອງຂໍ້ມູນທີ່ຊັດເຈນ ແລະ ຈັດຕັ້ງແກ້ໄຂບັນຫາໃຫ້ເປັນຮູບປະທໍາ, ສ້າງຄວາມເຂົ້າໃຈເປັນເອກະພາບພາຍໃນການຈັດຕັ້ງ ແລະ ໃນສັງຄົມ; ບັນດາອົງການຈັດຕັ້ງທີ່ເປັນເສນາທິການໃຫ້ຄະນະພັກ ຕ້ອງເປັນເຈົ້າການຍົກລະດັບຄວາມສາມາດໃນການເຄື່ອນໄຫວປະຕິບັດພາລະບົດບາດຂອງຕົນ ເພື່ອສາມາດເປັນເສນາທິການທີ່ເຂັ້ມແຂງຊ່ວຍຄະນະພັກຂັ້ນຂອງຕົນໃນການຄົ້ນຄວ້າຈັດຕັ້ງເຊື່ອມຊຶມບັນດາເນື້ອໃນເອກະສານສໍາຄັນຕ່າງໆ, ອົງການເສນາທິການ ຂອງຄະນະພັກຂັ້ນພະແນກການ, ອົງການທຽບເທົ່າຂັ້ນແຂວງ ແລະ ເມືອງຕ້ອງເພີ່ມທະວີຄວາມເປັນເຈົ້າການຊ່ວຍຄະນະພັກ ຕິດຕາມ, ຊຸກຍູ້, ແນະນໍາ, ກວດກາການຈັດຕັ້ງປະຕິບັດວຽກງານ ແລະ ບັນດາສະຫາຍຜູ້ແທນທີ່ເຂົ້າຮ່ວມກອງປະຊຸມ ຈົ່ງນໍາເອົາບັນດາເນື້ອໃນຈິດໃຈຂອງກອງປະຊຸມໃນຄັ້ງນີ້ ພ້ອມກັນສືບຕໍ່ຈັດຕັ້ງປະຕິບັດໃຫ້ບັນລຸຕາມຈຸດປະສົງຄາດໝາຍທີ່ກຳນົດໄວ້.
