ພາບ: ສໍສົດໃສ, ຂ່າວ: ອານຸລັກ

     ໃນວັນທີ 30 ມີນາ 2023 ທີ່ສໍານັກງານຄະນະຈັດຕັ້ງສູນກາງພັກ ໄດ້ຈັດພິທີມອບ-ຮັບປຶ້ມລະຫວ່າງສໍານັກພິມ ແລະ ຈໍາໜ່າຍປຶ້ມແຫ່ງລັດ ກັບ ຫ້ອງການ ຄະນະຈັດຕັ້ງສູນກາງພັກເພື່ອເປັນການຜັນຂະຫຍາຍທິດຊີ້ນໍາຂອງທ່ານ ທອງລຸນສີສຸລິດ ເລຂາທິການໃຫຍ່ ຄະນະບໍລິຫານສູນກາງພັກ ປະທານປະເທດແຫ່ງ ສປປ ລາວ ແລະ ການຜັນຂະຫຍາຍທິດຊີ້ນໍາ ຈຸດສຸມໃນຕໍ່ໜ້າ ຂອງກອງປະຊຸມວຽກງານການເມືອງ-ແນວຄິດ ຄັ້ງທີ 5 ກໍຄືການປະກອບສ່ວນຮັບຮູ້ບົດຮຽນຂອງຕ່າງປະເທດເຂົ້າໃນສະພາບຕົວຈິງຂອງປະເທດເຮົາ ແລະ ເພື່ອເປັນການເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ລາວ-ຫວຽດນາມ, ຫວຽດນາມ-ລາວ.

     ການມອບ-ຮັບປຶ້ມໃນຄັ້ງນີ້ ຕາງໜ້າໃຫ້ສໍານັກພິມ ແລະ ຈໍາໜ່າຍແຫ່ງລັດໂດຍທ່ານ ນາງ ສົມມະຖອນ ບັນນະວົງ ຮອງອໍານວຍການສໍານັກພິມ ແລະ ຈໍາໜ່າຍປຶ້ມແຫ່ງລັດ ພ້ອມຄະນະ ເປັນຜູ້ກ່າວມອບ ແລະ ຕາງໜ້າໃຫ້ຫ້ອງການ ຄະນະຈັດຕັ້ງສູນກາງພັກ ໂດຍທ່ານ ສີອໍາພອນ ຈັນລາຕີ ຮອງຫົວໜ້າຫ້ອງການ ຄະນະຈັດຕັ້ງສູນກາງພັກ ພ້ອມດ້ວຍຄະນະ ເປັນຜູ້ກ່າວຮັບ.

     ບັນດາປຶ້ມທີ່ມາມອບ-ຮັບໃນຄັ້ງນີ້ ປະກອບມີປຶ້ມ 15 ຫົວເລື່ອງ, ຫົວເລື່ອງລະ 3 ຫົວ, ລວມເປັນ 45 ຫົວ, ມີມູນຄ່າລວມທັງໝົດເປັນເງິນ 5.580.000 ກີບ, ປະກອບມີ: ສື່ມວນຊົນການສື່ສານທັນສະໄໝ, ການຄຸ້ມຄອງຂໍ້ມູນຂ່າວສານໃນສື່ສັງຄົມອອນລາຍ, ແນວຄິດທິດສະດີກັບການປ່ຽນແປງໃໝ່ ແລະ ພັດທະນາປະເທດ, ບາງບັນຫາທິດສະດີ ແລະ ພຶດຕິກໍາແຫ່ງການພັດທະນາປະເທດ, ເພື່ມທະວີວຽກງານກໍ່ສ້າງພັກຢູ່ໃນອົງການຂ່າວສານ.