ຂ່າວ: ວິລະສະໄໝ

ພາບ: ບານ

     ວັນທີ 30 ມີນາ 2023 ທີ່ກະຊວງ ແຜນການ ແລະ ການລົງທຶນ ໄດ້ຈັດກອງປະຊຸມສະຫຼຸບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ, ພ້ອມທັງ ສະຫຼຸບວຽກງານກວດກາ ປະຈໍາປີ 2022, ທິດທາງແຜນການ ປີ 2023 ໂດຍການເປັນປະທານ ຂອງ ສະຫາຍ ນ. ຄໍາຈັນ ວົງແສນບູນ ຮອງເລຂາຄະນະບໍລິຫານງານພັກ, ຮອງລັດຖະມົນຕີ ກະຊວງແຜນການ ແລະ ການລົງທຶນ, ມີສະຫາຍ ປອ ດາວບົວລະພາ ບາວົງເພັດ ຄະນະປະຈໍາພັກ, ຮອງປະທານຄະນະກວດກາສູນກາງພັກ, ຮອງປະທານອົງການກວດກາແຫ່ງລັດ, ສະຫາຍ ພູຂົງ ພິລາເພັດ ກໍາມະການຄະນະພັກ, ຫົວໜ້າຫ້ອງການ ຄະນະຈັດຕັ້ງສູນກາງພັກ, ມີບັນດາສະຫາຍຄະນະປະຈໍາພັກ, ຄະນະບໍລິຫານງານພັກກະຊວງ, ເລຂາໜ່ວຍພັກ, ຮອງເລຂາໜ່ວຍພັກ, ຄະນະໜ່ວຍພັກ, ສະມາຊິກພັກ-ພະນັກງານ ຂັ້ນຮອງຫົວໜ້າພະແນກຂຶ້ນໄປເຂົ້າຮ່ວມ ທັງໝົດ 193 ຄົນ, ຍິງ 74 ຄົນ.

     ກອງປະຊຸມໄດ້ຮັບຟັງການຜ່ານບົດສະຫຼຸບ ວຽກງານຈັດຕັ້ງ, ກໍ່ສ້າງພັກ-ພະນັກງານ ແລະ ສະຫຼຸບວຽກງານກວດກາ ໃນໄລຍະ 01 ປີ ຜ່ານມາ ໂດຍສະຫາຍ ບຸນມີ ວິໄລຈິດ ກຳມະການຄະນະບໍລິຫານງານພັກ, ຫົວໜ້າກົມຈັດຕັ້ງ ແລະ ພະນັກງານ ຈາກນັ້ນໄດ້ມີການ ປະກອບຄຳຄິດຄຳເຫັນ​ເພື່ອເຮັດໃຫ້ເນື້ອໃນບົດສະຫຼຸບ ມີລັກສະນະຄົບຖ້ວນ ແລະ ມີຄວາມເປັນເອກະພາບສູງຕໍ່ບັນຫາຕ່າງໆ ລວມທັງທິດທາງແຜນການປີ 2023 ທີ່ກໍານົດໄວ້ ໃນຕໍ່ໜ້າ, ເພື່ອເຮັດໃຫ້ວຽກງານ​ກໍ່ສ້າງ​ພັກ​ໃຫ້ປອດ​ໃສ, ເຂັ້ມ​ແຂງ, ໜັ້ກ​ແໜ້ນ ​ແລະ ການ​ປັບປຸງ​ກົງຈັກ​ການຈັດຕັ້ງຕາມທິດ​ກະທັດ​ຮັດ, ​ໂປ່​ງ​ໃສ, ​ເຂັ້ມ​ແຂງ, ມີ​ປະສິດ​ທິພາບ ແລະ ​ປະສິດທິ​ຜົນ​ສູງ​ຂຶ້ນກວ່າເກົ່າ.​ ເຊິ່ງກອງປະຊຸມແມ່ນ ເປັນການສະຫຼຸບວຽກງານຈັດຕັ້ງ, ກໍ່ສ້າງພັກ-ພະນັກງານ ແລະ ສະຫຼຸບວຽກງານກວດກາ ໃນໄລຍະ 01 ປີ ຜ່ານມາ ແລະ ກຳນົດທິດທາງແຜນການປີ 2023.

     ນອກຈານນັ້ນ, ກອງປະຊຸມຍັງໄດ້ຮັບຟັງການເຜີຍແຜ່, ເຊື່ອມຊຶມເອກະສານສຳຄັນຄື: ຄໍາສັ່ງຂອງຄະນະເລຂາທິການພັກ ສະບັບເລກທີ 268/ຄລສພ, ລົງວັນທີ 20 ມັງກອນ 2023 ວ່າດ້ວຍການດໍາເນີນກອງປະຊຸມກາງສະໄໝ; ຄໍາແນະນໍາຂອງຄະນະຈັດຕັ້ງສູນກາງພັກ ສະບັບເລກທີ 25/ຄຈສພ, ລົງວັນທີ 24 ມັງກອນ 2023 ກ່ຽວກັບການຈັດຕັ້ງປະຕິບັດ ຄໍາສັ່ງຂອງຄະນະເລຂາທິການສູນກາງພັກ ວ່າດ້ວຍການດໍາເນີນກອງປະຊຸມຄົບຄະນະກາງສະໄໝ; ບົດໂອ້ລົມຂອງສະຫາຍຫົວໜ້າຄະນະຈັດຕັ້ງສູນກາງພັກ;  ຄໍາສັ່ງແນະນໍາເລກທີ 169/ຄລສພ ຂອງຄະນະເລຂາທິການສູນກາງພັກ ກ່ຽວກັບການເພີ່ມທະວີການນໍາພາ-ຊີ້ນໍາ ຕໍ່ການເຄື່ອນໄຫວວຽກງານກວດກາ ແລະ ແກ້ໄຂຜັນການກວດກາ; ມະຕິຂອງກົມການເມືອງສູນກາງພັກ ສະບັບເລກທີ 21/ກມສພ, ລົງວັນທີ 09 ພະຈິກ 2022 ວ່າດ້ວຍການຕີລາຄາພະນັກງານ; ຄໍາແນະນໍາ ຂອງຄະນະຈັດຕັ້ງສູນກາງພັກ ສະບັບເລກທີ 26/ຄຈສພ, ລົງວັນທີ 30 ມັງກອນ 2023 ການຈັດຕັ້ງຜັນຂະຫຍາຍເນື້ອໃນກອງປະຊຸມສະຫຼຸບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງທົ່ວປະເທດ ປະຈໍາປີ 2022 ແລະ ທິດທາງແຜນການ ປະຈໍາປີ 2023; ບົດສະຫຼຸບຫຍໍ້ວຽກງານກວດກາທົ່ວປະເທດ ປະຈໍາປີ 2022 ແລະ ທິດທາງຄາດໝາຍສູ້ຊົນວຽກງານ ກວດກາປະຈໍາປີ 2023 ຂອງຄະນະກວດກາສູນກາງພັກ ແລະ ອົງການກວດກາແຫ່ງລັດ; ບົດໂອ້ລົມ ຂອງສະຫາຍ ຄໍາພັນ ພົມມະທັດ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ປະທານຄະນະກວດກາພັກ, ອົງການກວດກາແຫ່ງລັດ ແລະ ຕ້ານການສໍ້ລາດບັງຫຼວງຕໍ່ກອງປະຊຸມວຽກງານກວດກາທົ່ວປະເທດ ປະຈໍາປີ 2022 (ຄັ້ງວັນທີ 23-24 ກຸມພາ 2022); ຂໍ້ຕົກລົງວ່າດ້ວຍການຕິດຕາມ, ກວດກາ ເລີ້ມແຕ່ຫົວທີ ເພື່ອສະກັດກັ້ນ ແລະ ຕ້ານການສໍ້ລາດບັງຫຼວງ ຂອງຂະແໜງແຜນການ ແລະ ການລົງທຶນ ສະບັບເລກທີ 0553/ກຜທ, ລົງວັນທີ 09 ມີນາ 2023.

     ໃນຕອນທ້າຍຂອງກອງປະຊຸມຜູ້ເຂົ້າຮ່ວມໄດ້ຮັບຟັງຄຳເຫັນໂອ້ລົມຈາກສະຫາຍ ນ. ຄໍາຈັນ ວົງແສນບູນ ຮອງເລຂາຄະນະບໍລິຫານງານພັກ, ຮອງລັດຖະມົນຕີ ກະຊວງແຜນການ ແລະ ການລົງທຶນ ສະຫາຍໄດ້ເນັ້ນຕື່ມບາງຈຸດ ກ່ຽວກັບທິດທາງລວມຄາດໝາຍສູ້ຊົນ ໃນວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງຄື: ໃຫ້ເພີ່ມທະວີການສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ-ພະນັກງານ ມີຄວາມໜັກແໜ້ນ, ເຂັ້ມແຂງ; ເອົາໃຈໃສ່ປັບປຸງກົງຈັກການຈັດຕັ້ງຂອງຂະແໜງແຜນການ ແລະ ການລົງທຶນ ແຕ່ລະຂັ້ນ ໃຫ້ມີຄວາມເຂັ້ມແຂງ, ໜັກແໜ້ນທາງດ້ານບຸກຄະລາກອນ ເພື່ອຮອງຮັບໜ້າທີ່ການເມືອງໃນໄລຍະໃໝ່; ຕ້ອງເປັນເຈົ້າການ ພ້ອມກັນກະກຽມດຳເນີນກອງປະຊຸມຄົບຄະນະກາງສະໄໝ ເພື່ອທົບທວນຄືນຜົນການປະຕິບັດມະຕິກອງປະຊຸມໃຫ່ຍ ຄັ້ງທີ IV ຂອງອົງຄະນະພັກ ກະຊວງແຜນການ ແລະ ການລົງທຶນ; ສ້າງ ແລະ ປະຕິບັດແຜນກຳນົດພະນັກງານ ຢ່າງເປັນລະບົບ; ປັບປຸງລະບອບເລືອກເຟັ້ນ ແລະ ສັບຊ້ອນພະນັກງານເອົາໃຈໃສ່ປັບປຸງບູລະນະມາດຕະຖານພະນັກງານນຳພາ-ຄຸ້ມຄອງແຕ່ລະປະເພດໃຫ້ລະອຽດ; ເອົາໃຈໃສ່ຄຸ້ມຄອງ, ຕິດຕາມ, ກວດກາ ບັນດາມາດຕະການທາງວິໄນ ຕໍ່ພະນັກງານຢ່າງເຂັ້ມງວດ; ສືບຕໍ່ຈັດຕັ້ງຜັນຂະຫຍາຍເນື້ອໃນກອງປະຊຸມວຽກງານກວດກາທົ່ວປະເທດ ຄັ້ງທີ IV ແລະ ວາງແຜນລະອຽດ ເພື່ອຈັດຕັ້ງປະຕິບັດເນື້ອໃນກອງປະຊຸມໃນຄັ້ງນີ້ໃຫ້ເປັນຂະບວນການຕົວຈິງຢ່າງແຂງແຮງ ໃຫ້ຖືເອົາວຽກງານກວດກາເປັນວຽກໜຶ່ງທີ່ສໍາຄັນ ໄປຄຽງຄູ່ກັບການຊີ້ນຳ-ນໍາພາ ເຄື່ອນໄຫວວຽກງານຕາມພາລະບົດບາດ, ຂອບເຂດສິດ ແລະ ໜ້າທີ່ຄວາມຮັບຜິດຊອບຂອງຕົນ ແລະ ພາຍຫຼັງສຳເລັດກອງປະຊຸມຄັ້ງນີ້ ຕ້ອງເຮັດໃຫ້ວຽກງານຈັດຕັ້ງ ແລະ ວຽກງານກວດກາ ຢູ່ກະຊວງແຜນການ ແລະ ການລົງທຶນ ກໍ່ຄືຂະແໜງແຜນການ ແລະ ການລົງທຶນ ໃນທົ່ວປະເທດ ມີການຫັນປ່ຽນໃໝ່ຢ່າງຕັ້ງໜ້າ, ສູ້ຊົນປະຕິບັດຄາດໝາຍທີ່ມະຕິກອງປະຊຸມໃຫຍ່ ຄັ້ງທີ XI ຂອງພັກ, ກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XI ແລະ ມະຕິກອງປະຊຸມຄັ້ງທີ IV ຂອງອົງຄະນະພັກ ກະຊວງແຜນການ ແລະ ການລົງທຶນ ໃຫ້ປະກົດຜົນເປັນຈິງ.