ໂດຍ: ອານຸລັກ
ໜ່ວຍພັກ ຫ້ອງການ ກະຊວງແຜນການ ແລະ ການລົງທຶນ ໄດ້ເປີດກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານກາງສະໄໝ ໃນໄລຍະສົກປີ 2019-2023 ແລະ ທິດທາງແຜນວຽກຈຸດສຸມໃນຕໍ່ໜ້າ ຂອງຕົນຂຶ້ນໃນວັນທີ 06 ເມສາ 2023 ພາຍໃຕ້ການເປັນປະທານ ຂອງ ສະຫາຍ ອຸຕະແກ້ວ ແກ້ວດວງສິນ ເລຂາໜ່ວຍພັກ ຫ້ອງການ ກະຊວງ ຜທ, ໃຫ້ກຽດເຂົ້າຮ່ວມຂອງ ສະຫາຍ ນາງ ຄຳຈັນ ວົງແສນບຸນ, ຮອງເລຂາຄະນະບໍລິຫານງານພັກ ກະຊວງ ແຜນການ ແລະ ການລົງທຶນ ໂດຍມີ ເລຂາ, ຮອງເລຂາ ແລະ ຄະນະໜ່ວຍພັກ, ຕາງໜ້າຈາກໜ່ວຍພັກ ກົມຈັດຕັ້ງ ແລະ ພະນັກງານ, ກົມກວດກາ, ບັນດາສະຫາຍສະມາຊິກພັກສົມບູນ ແລະ ສຳຮອງພາຍໃນໜ່ວຍພັກເຂົ້າຮ່ວມ.
ກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານກາງສະໄໝ ໃນໄລຍະສົກປີ 2019-2023 ແລະ ທິດທາງຈຸດສຸມໃນຕໍ່ໜ້າ ຂອງໜ່ວຍພັກຫ້ອງການ ແລະ ພ້ອມກັນປະກອບຄໍາເຫັນໃສ່ຮ່າງບົດສະຫຼຸບຕີລາຄາການຈັດຕັ້ງປະຕິບັດວຽກງານຂອງໜ່ວຍພັກຫ້ອງການ ກາງສະໄໝໃນໄລຍະສົກປີ 2019-2023 ແລະ ທິດທາງຈຸດສຸມໃນຕໍ່ໜ້າ ແລະ ປະກອບຄໍາຄິດຄໍາເຫັນຕໍ່ຮ່າງບົດສໍາຫຼວດການນໍາພາລວມຂອງໜ່ວຍພັກ, ບຸກຄົນຄະນະໜ່ວຍພັກ ແລະ ຄະນະຫ້ອງການ ໃນການຈັດຕັ້ງປະຕິບັດໜ້າທີ່ໃນການນໍາພາ-ຊີ້ນໍາວຽກງານຫ້ອງການ ໃນໄລຍະຜ່ານມາ. ນອກນັ້ນ, ຍັງໄດ້ຮັບຟັງການເຜີຍແຜ່ 2 ເອກະສານສຳຄັນຄື: ຄຳສັ່ງຂອງຄະນະເລຂາທິການສູນກາງພັກ ວ່າດ້ວຍການດຳເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານພັກ ແຕ່ລະຂັ້ນ ສະບັບເລກທີ 268/ຄລສພ, ລົງວັນທີ 20 ມັງກອນ 2023 ແລະ ຄຳແນະນຳຂອງຄະນະຈັດຕັ້ງສູນກາງພັກວ່າດ້ວຍການດຳເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ແຕ່ລະຂັ້ນ ສະບັບເລກທີ 25/ຄຈສພ, ລົງວັນທີ 24 ມັງກອນ 2023.
ໃນຕອນທ້າຍຂອງກອງປະຊຸມ ຜູ້ເຂົ້າຮ່ວມກອງປະຊຸມໄດ້ຮັບຟັງການໂອ້ລົມຂອງສະຫາຍ ນາງ ຄໍາຈັນ ວົງແສນບຸນ, ຮອງເລຂາຄະນະບໍລິຫານງານພັກ, ກະຊວງແຜນການ ແລະ ການລົງທຶນ ສະຫາຍໄດ້ສະແດງຄວາມນ້ອງຊໍຊົມເຊີຍ ຕໍ່ບັນດາຜົນງານທີ່ ໜ່ວຍພັກຫ້ອງການ ສາມາດຍາດມາໄດ້ໃນຫຼາຍດ້ານ ເຊິ່ງສະຫາຍໄດ້ເນັ້ນໜັກຕື່ມໃຫ້ມີຄວາມສາມັກຄີ ແລະ ເປັນເອກະພາບໃນການຈັດຕັ້ງປະຕິບັດວຽກງານ ແມ່ນປັດໃຈຕັດສິນ ທີ່ສຸດໂດຍສະເພາະຢູ່ໃນການນຳຂອງຫ້ອງການ, ທຸກການຕັດສິນບັນຫາສຳຄັນໃດໆຕ້ອງໄດ້ປຶກສາຫາລື ແລະ ແຈ້ງໃຫ້ກັນຊາບຢ່າງເປັນປົກກະຕິ ແລະ ທັນການ, ການນັບຖືການຈັດຕັ້ງ ແລະ ລະບຽບວິໄນ ຖ້າມີການລະເມີດ ກໍຕ້ອງໄດ້ມີການສຳຫຼວດກວດກາ ແລະ ຕຳນິສົ່ງຂ່າວກັນຢ່າງກົງໄປກົງມາເອົາໃຈໃສ່ຕິດຕາມໃກ້ຊິດຕິດແທດກັບສະມາຊິກພັກ-ພະນັກງານຢ່າງເລິກເຊິ່ງ, ຢຶດໝັ້ນແບບແຜນວິທີເຮັດວຽກຕາມຫຼັກການລວມສູນປະຊາທິປະໄຕມີແບບແຜນທີ່ຈະແຈ້ງກະທັດຮັດ, ສາມາດເຂົ້າໃຈໄດ້ງ່າຍ, ຕ້ອງສ້າງລະບຽບການຕ່າງໆ ເພື່ອເປັນບ່ອນອີງ. ທຸກບັນຫາ, ຂໍ້ສະເໜີຕ່າງໆທີ່ສະເໜີເຂົ້າມາ ຈະຕ້ອງຖືກພິຈາລະນາ ໂດຍໄວ, ດ້ວຍຄວາມຮັບຜິດຊອບສູງ ແລະ ກົງໄປກົງມາ, ຍົກສູງຄວາມສາມາດໃນການເປັນເສນາທິການໃຫ້ການນຳໃນຂົງເຂດວຽກງານຕ່າງໆຕາມພາລະບົດບາດຂອງວຽກງານຫ້ອງການ. ໂດຍໃຫ້ຍົກສູງບົດ ບາດການເປັນເສນາທິການທີ່ເຂັ້ມແຂງ, ສາມາດໃນການສັງລວມລາຍງານສະພາບການໃຫ້ການນຳໄດ້ທັນເວລາ, ເພີມທະວີການຈັດຕັ້ງຜັນຂະຫຍາຍ, ຊຸກຍູ້ ແລະ ຕິດຕາມການຈັດຕັ້ງປະຕິ ບັດທິດຊີ້ນໍາຂອງຄະນະນໍາໃຫ້ເປັນລະບົບ, ເອົາໃຈໃສ່ສົມທົບກັບພາກສ່ວນກ່ຽວຂ້ອງ ລົງເລີກຄົ້ນຄວ້າ, ປັບປຸງ, ສ້າງ ແລະເຜີຍແຜ່ນິຕິກໍາຕ່າງໆ ທີ່ຕິດພັນກັບພາລະບົດບາດຂອງ ກຜທ, ຍົກສູງບົດບາດໃນການຄຸ້ມຄອງ, ຈັດສັນງົບປະມານ ໃຫ້ມີປະສິດທິພາບ, ສອດຄ່ອງກັບສະບຽບກົດໝາຍ ແລະ ທິດປະຢັດມັດທະຍັດ, ເພີ່ມປະສິດທິພາບໃນການເຮັດໜ້າທີ່ວຽກງານ ບໍລິການ, ບໍລິການປິ່່ນອ້ອມທົ່ວ ກຜທ ໃຫ້ສູງຂື້ນ, ຫັນເປັນທັນສະໄໝໃນການໂຄສະນາ, ປະຊາສຳພັນເຜີຍແຜ່ຂໍ້ມູນຂ່າວສານກ່ຽວກັບຜົນງານ ແລະ ການເຄື່ອນໄຫວຂອງກະຊວງແຜນການ ແລະ ການລົງທຶນ ຢ່າງເປັນປົກກະຕິ.
