ພາບ: ​ແສງ​ຄຳ; ຂ່າວໂດຍ: ພອນສະຫວັນ

     ໃນ​ວັນ​ທີ 09 ມິຖຸນາ 2023 ຢູ່​ທີ່​ສະໂມສອນ​ກະຊວງກະສິກຳ ແລະ ປ່າໄມ້ ​ໄດ້​ຈັດ​ກອງ​ປະຊຸມເຜີ​ຍ​ແຜ່, ​ເຊື່​ອມຊຶມ​ເນື້ອໃນກອງປະຊຸມວຽກງານການເມືອງ-ແນວຄິດ ທົ່ວປະເທດ ຄັ້ງທີ V ໃຫ້​ກຽດ ເປັນປະທານ ແລະ ​ເຜີຍ​ແຜ່​ໂດຍສະຫາຍ ທອງພັດ ວົງມະນີ ຮອງ​ເລຂາຄະນະ​ພັກ ຮອງລັດຖະມົນຕີກະຊວງກະສິກຳ-ປ່າໄມ້ ແລະ ສະຫາຍ ກິແກ້ວ ສິງນາວົງ ຄະນະ​ປະຈຳ​ພັກກະຊວງ, ​ຮອງລັດຖະມົນຕີກະຊວງກະສິກຳ-ປ່າໄມ້, ​ມີ​ຄະນະ​ພັກກະຊວງ, ມີເລຂາ-ຮອງເລຂາຄະນະພັກຮາກຖານ, ຄະນະໜ່ວຍພັກຮາກຖານ, ສະມາຊິກພັກ, ພະນັກງານ-ລັດຖະກອນ ທົ່ວກະຊວງເຂົ້າ​ຮ່ວມຢ່າງພ້ອມພຽງ.

     ກອງປະຊຸມ ຄັ້ງນີ້ ສະຫາຍ  ທອງພັດ ວົງມະນີ ໄດ້ກ່າວເນັ້ນບາງຈຸດ ເພື່ອນຳໄປຈັດຕັ້ງຜັນຂະຫຍາຍເນື້ອໃນ ກອງປະຊຸມວຽກງານການເມືອງ-ແນວຄິດ ທົ່ວປະເທດ ຄັ້ງທີ V ແລະ ມະຕິຂອງກົມການເມືອງສູນກາງພັກ ສະບັບເລກທີ 60/ກມສພ ວ່າດ້ວຍທິດທາງໜ້າທີ່ຕົ້ນຕໍ ແລະ ມາດຕະການຂອງວຽກງານການເມືອງ-ແນວຄິດ ໃນສະພາບການໃໝ່, ຕີລາຄາຄືນສະພາບວຽກງານການເມືອງ-ແນວຄິດ ແລະ ສຸມໃສ່ກຳນົດຍຸດທະສາດ, ທິດທາງໜ້າທີ່, ວິທີການ ແລະ ມາດຕະການເຄື່ອນໄຫວກ່ຽວກັບວຽກງານການເມືອງ-ແນວຄິດ ຂອງພັກເຮົາ ໂດຍຫັນເປັນນິຕິກຳລະອຽດ ແລະ ເປັນແຜນການເຄື່ອນໄຫວຕົວຈິງ ໃນການໂຄສະນາສຶກສາອົບຮົມການເມືອງ-ແນວຄິດ ເຮັດໃຫ້ບັນດາຄະນະພັກຮາກຖານ, ຄະນະໜ່ວຍພັກ, ສະມາຊິກພັກ, ພະນັກງານ-ລັດຖະກອນ ໄດ້ມີຄວາມຮັບຮູ້-ເຂົ້າໃຈ, ເຊື່ອມຊຶມ, ກຳແໜ້ນ ແລະ ເປັນເອກະພາບຕໍ່ເນື້ອໃນກອງປະຊຸມວຽກງານການເມືອງ-ແນວຄິດ ທົ່ວປະເທດ ຄັ້ງທີ V ຢ່າງກວ້າງຂວາງ, ທົ່ວເຖິງ ແລະ ເລິກ ເຊິ່ງ.  ຈາກນັ້ນ ສະຫາຍ ທອງພັດ ວົງມະນີ ໄດ້ເຜີຍແຜ່ເອກະສານມະຕິຂອງກົມການເມືອງສູນກາງພັກ ວ່າດ້ວຍການຍົກສູງຄຸນນະພາບວຽກງານການເມືອງ-ແນວຄິດ ສະບັບເລກທີ 206/ກມສພ, ລົງວັນທີ 07 ທັນວາ 2020 ແລະ ຮັບຟັງບົດຄຳເຫັນຊີ້ນຳ ຂອງສະຫາຍເລຂາທິການໃຫຍ່ ຕໍ່ກອງປະຊຸມວຽກງານການເມືອງ-ແນວຄິດ ທົ່ວປະເທດ ຄັ້ງທີ V.

     ວາລະຕໍ່ມາ ສະຫາຍ ກິແກ້ວ ສິງນາວົງ ກໍໄດ້ຂຶ້ນເຜີຍແຜ່ ເອກະສານການສະຫຼຸບຕີລາຄາສະພາບການຈັດຕັ້ງປະຕິບັດວຽກງານການເມືອງ-ແນວຄິດ ໄລຍະແຕ່ ປີ 2003-2022 ແລະ ທິດທາງແຜນການຮອດປີ 2025 ແລະ ກອງປະຊຸມວຽກງານການເມືອງ-ແນວຄິດ ທົ່ວປະເທດ ຄັ້ງທີ V.

     ການຈັດຕັ້ງເຜີຍແຜ່ ເຊື່ອມຊຶມ ເອກະສານຄັ້ງນີ້ກໍ່ເພື່ອເປັນບ່ອນອີງ, ເປັນທິດທາງໃນການນຳພາ-ຊີ້ນຳ ຂອງຄະນະພັກ, ສ້າງຄວາມເປັນເອກະພາບ, ຄວາມຕັດສິນໃຈໃໝ່, ຄວາມເປັນເຈົ້າການຕັ້ງໜ້າບຸກບືນເຮັດແທ້ທຳຈິງ ຂອງສະມາຊິກພັກ-ພະນັກງານ ແລະ ຍົກສູງຄວາມຮັບຜິດຊອບຂອງຕົນເຂົ້າໃນການຄົ້ນຄວ້າກຳນົດທິດທາງ, ມາດຕະການປັບປຸງແກ້ໄຂວຽກງານການເມືອງ-ແນວຄິດ ເຂົ້າໃນການເຄື່ອນໄຫວວຽກງານຕົວຈິງໃຫ້ມີປະສິດທິພາບ ແລະ ມີປະສິດທິຜົນ.