ໂດຍ : ລັດດາວັນ ສີຫານຸວົງ

     ໃນວັນທີ 22 ມິຖຸນາ 2023 ຢູ່ທີ່ທະນາຄານແຫ່ງ ສປປ ລາວ (ທຫລ) ໄດ້ຈັດພິທີມອບ-ຮັບໃບຢັ້ງຢືນໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈຳປີ 2022 ແລະ ມອບບັດໃຫ້ສະມາຊິກພັກສົມບູນ ໃຫ້ບັນດາໜ່ວຍພັກ ແລະ ສະມາຊິກພັກທີ່ຂຶ້ນກັບອົງຄະນະພັກ ທະນາຄານແຫ່ງ ສປປ ລາວ ໂດຍການເປັນປະທານຂອງ ສະຫາຍ ບຸນເຫລືອ ສິນໄຊວໍຣະວົງ ເລຂາຄະນະບໍລິຫານງານພັກ, ຜູ້ວ່າການທະນາຄານແຫ່ງ ສປປ ລາວ, ມີ ສະຫາຍ ນາງ ສີບານ ສີສະອາດ ກຳມະການພັກ, ຫົວໜ້າກົມກໍ່ສ້າງພັກ ຄະນະຈັດຕັ້ງສູນກາງພັກເຂົ້າຮ່ວມ, ມີຄະນະປະຈຳພັກ, ບັນດາເລຂາຄະນະພັກຮາກຖານ, ເລຂາ, ຮອງເລຂາໜ່ວຍພັກ ແລະ ຕາງໜ້າສະມາຊິກພັກ ທະນາຄານແຫ່ງ ສປປ ລາວ ເຂົ້່າຮ່ວມ ທັງໝົດ 100 ກວ່າສະຫາຍ.

     ໃນພິທີ, ສະຫາຍ ວຽງສະຫວັນ ໄຊຍະວົງ ກຳມະການພັກ, ຮອງປະທານຄະນະກວດກາພັກ ທຫລ, ຫົວໜ້າກົມກວດກາ ໄດ້ຜ່ານບົດສະຫລຸບຕີລາຄາການກໍໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈຳປີ 2022 ໂດຍສັງເຂບ ຊຶ່ງໄດ້ຍົກໃຫ້ເຫັນດ້ານດີ, ດ້ານອ່ອນ-ຂໍ້ຄົງຄ້າງ, ສາເຫດ, ບົດຮຽນທີ່ຖອດຖອນໄດ້ ແລະ ວາງທິດທາງແຜນການໃນຕໍ່ໜ້າ; ຈາກນັ້ນ ສະຫາຍ ພານຸສັກ ແກ່ນວົງພະຈັນ ກຳມະການພັກ, ຫົວໜ້າກົມຈັດຕັ້ງ-ພະນັກງານ ໄດ້ຜ່ານຂໍໍ້ຕົກລົງວ່າດ້ວຍການຈັດຕັ້ງປະຕິບັດວຽກງານມອບບັດສະມາ ຊິກພັກ. ໃນປີ 2022 ມີໜ່ວຍພັກທີີ່ໄດ້ຮັບການຈັດປະເພດ ປອດໃສ ເຂັ້ມແຂງ ໜັກແໜ້ນ ຈຳນວນ 24 ໜ່ວຍພັກ, ເປັນໜ່ວຍພັກຮາກຖານ 11 ໜ່ວຍ ແລະ ໜ່ວຍພັກທີ່ຂຶ້ນກັບຄະນະພັກຮາກຖານ 13 ໜ່ວຍ, ຈັດປະເພດເປັນໜ່ວຍພັກແຂງ ຈຳນວນ 22 ໜ່ວຍພັກ, ຊຶ່ງເປັນໜ່ວຍພັກຮາກຖານ 11 ໜ່ວຍ ແລະ ເປັນໜ່ວຍພັກທີ່ຂຶ້ນກັບຄະນະພັກຮາກຖານ 11 ໜ່ວຍ ແລະ ມີໜ່ວຍພັກທີ່ຈັດເປັນປະເພດກາງ ຈຳນວນ 2 ໜ່ວຍພັກ. ສຳລັບການຈັດຕັ້ງປະຕິບັດວຽກງານອອກບັດມອບບັດ ໃຫ້ສະມາຊິກພັກສົມບູນ ຊຸດທີ VIII ນີ້ມີ 25 ຮາກຖານພັກ ລວມທັງໝົດ 176 ສະຫາຍ.

     ໃນໂອກາດທີ່ມີຄວາມໝາຍສຳຄັນນີ້, ສະຫາຍເລຂາຄະນະບໍລິຫານງານພັກ ທຫລ ໄດ້ໃຫ້ກຽດໂອ້ລົມ ແລະ ຮຽກຮ້ອງມາຍັງບັນດາເລຂາຄະນະພັກຮາກຖານ, ເລຂາໜ່ວຍພັກ ໃຫ້ຍົກສູງຄວາມຮູ້ທາງດ້ານແນວຄິດ-ການເມືອງໃຫ້ແກ່ສະມາຊິກພັກ ແລະ ພະນັກງານຂອງຕົນ ໃຫ້ມີຄວາມເຊື່ອໝັ້ນຕໍ່ແນວທາງນະໂຍບາຍຂອງພັກ-ລັດ ຕໍ່ສູ້ກັບອິດທິກຳລັງປໍລະປັກໂດຍສັນຕິຂອງສັດຕູ ທີ່ສ້າງຂ່າວໂຈມຕີ ແລະ ບິດເບືອນຂໍ້ມູນສ້າງຄວາມເສຍຫາຍໃຫ້ພັກ-ລັດ ກໍຄືປະເທດຊາດ, ພ້ອມທັງຍົກສູງຄວາມຮັບຜິດຊອບຂອງຕົນໃຫ້ສຳເລັດທຸກໜ້າທີ່ວຽກງານ, ແກ້ໄຂຂໍ້ຄົງຄ້າງ ແລະ ບຸກບືນກໍ່ສ້າງຂອງຕົນໃຫ້ກາຍເປັນໜ່ວຍພັກ ປອດໃສ ເຂັ້ມແຂງ ໜັກແໜ້ນ ຕໍ່ໄປ.