ຂ່າວ ແລະ ພາບ: ລັດດາວັນ ສີຫານຸວົງ
ກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ຫ້ອງວ່າການສໍານັກງານປະທານປະເທດ (ຫສປທ) ສະໄໝທີ I ໄດ້ຈັດຂຶ້ນລະຫວ່າງວັນທີ 3-4 ກໍລະກົດ 2023 ທີ່ທໍານຽບປະທານປະເທດ, ເປັນປະທານໂດຍ ສະຫາຍ ນ. ເຂັມມະນີພົນເສນາ ກຳມະການສູນກາງພັກ, ເລຂາຄະນະພັກ, ຫົວໜ້າຫ້ອງວ່າການສຳນັກງານປະທານປະເທດ, ເປັນກຽດເຂົ້າຮ່ວມຂອງ ສະຫາຍ ນ. ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ຮອງປະທານປະເທດແຫ່ງ ສປປ ລາວ ຜູູ້ຊີ້ນຳກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ຫສປທ, ມີບັນດາສະຫາຍຄະນະພັກ, ຄະນະໜ່ວຍພັກ, ສະມາຊິກພັກ ຫສປທ ພ້ອມດ້ວຍແຂກຖືກເຊີນເຂົ້າຮ່ວມ.
ກອງປະຊຸມຄັ້ງນີ້ໄດ້ໄຂຂຶ້ນທ່າມກາງບັນຍາກາດທີ່ທົ່ວພັກ, ທົ່ວລັດກໍາລັງສຸມໃສ່ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມ 5 ປີຄັ້ງທີ IX ຂອງລັດເວົ້າລວມ, ເວົ້າສະເພາະຢູ່ ຫສປທ ແມ່ນກໍາລັງຂຸ້ນຂ້ຽວຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ I ແລະ ແຜນພັດທະນາ 5 ປີ ຢູ່ ຫສປທ ໄລຍະກາງສະໄໝຜ່ານມາ ເຊິ່ງມີການສະຫຼຸບຕີລາຄາການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ I ຂອງອົງຄະນະພັກ ຫສປທ ໃນໄລຍະກາງສະໄໝ, ສະຫຼຸບການຈັດຕັ້ງປະຕິບັດແຜນພັດທະນາ 05 ປີ, ຜ່ານຮ່າງບົດສໍາຫຼວດການນໍາພາລວມຂອງຄະນະບໍລິຫານງານພັກ ຫສປທ, ສຳຄັນແມ່ນໄດ້ພ້ອມກັນວາງທິດທາງ, ແຜນການແຕ່ນີ້ຫາທ້າຍສະໄໝ ເພື່ອສືບຕໍ່ສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ ຂອງ ຫສປທ ຕາມກຳນົດ, ຈາກນັ້ນແມ່ນທາບທາມຄວາມໄວ້ວາງໃຈຕໍໍ່ການນໍາພາລວມ ແລະ ບຸກຄົນຄະນະບໍລິຫານງານພັກ ຫສປທ.
ໃນຕອນທ້າຍກອງປະຊຸມຍັງໄດ້ຮັບຟັງຄໍາເຫັນໂອ້ລົມຈາກສະຫາຍ ນ. ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ຮອງປະທານປະເທດ ແຫ່ງ ສປປ ລາວ ເຊິ່ງສະຫາຍໄດ້ສະແດງຄວາມຊົມເຊີຍຕໍ່ບັນດາສະຫາຍໃນຄະນະບໍລິຫານງານພັກ ຫສປທ ທີ່ຮ່ວມແຮງຮ່ວມໃຈນໍາພາ-ຊີ້ນໍາເຮັດໃຫ້ກອງປະຊຸມຄັ້ງນີ້ສຳເລັດຢ່າງຈົບງາມ, ພ້ອມນັ້ນ ຍັງໄດ້ເນັ້ນບາງບັນຫາທີ່ສໍາຄັນເປັນຕົ້ນແມ່ນເພີ່ມທະວີການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ I ຂອງອົງຄະນະພັກ ແລະ ແຜນພັດທະນາ 5 ປີ (2021-2025) ຂອງ ຫສປທ ຕິດພັນກັບມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ 2 ວາລະແຫ່ງຊາດ ໃຫ້ບັນລຸຕາມຈຸດປະສົງ ແລະ ລະດັບຄາດໝາຍທີ່ວາງໄວ້, ສືບຕໍ່ສຶກສາອົບຮົມການເມືອງ-ແນວຄິດໃຫ້ແກ່ສະມາຊິກພັກ, ພະນັກງານ-ລັດຖະກອນ ໃຫ້ມີຄວາມໜັກແໜ້ນ, ອຸ່ນອຽນທຸ່ນທ່ຽງ, ຫ້າວຫັນຕໍ່ໜ້າທີ່ວຽກງານ, ອົດທົນຜ່ານຜ່າຂໍ້ຫຍຸ້ງຍາກດ້ານເສດຖະກິດ-ການເງິນ, ສືບຕໍ່ປັບປຸງກົງຈັກການຈັດຕັ້ງໃຫ້ມີຄວາມເຂັ້ມແຂງ ແລະ ກະທັດຮັດ.
