ຂ່າວ: ພອນສະຫວັນ ລາດຊະບັນເທົາ
ພາບ: ພິດສະໄໝ ວິໄລຮັກ
ກອງປະຊຸມຄົບຄະນະບໍລິຫານງານພັກກາງສະໄໝທີ IX ຂອງອົງຄະນະພັກກະຊວງສາທາລະນະສຸກ ໄດ້ຈັດຂຶ້ນຢ່າງເປັນທາງການ ໃນວັນທີ 5 ກໍລະກົດ 2023 ທີ່ສະໂມສອນມະຫາວິທະຍາໄລວິທະຍາສາດ ສຸຂະພາບ (ວິທະຍາໄລເຂດດົງໂພສີ) ເປັນປະທານໂດຍ ສະຫາຍ ປອ. ດຣ ບຸນແຝງ ພູມມະໄລສິດ ກໍາມະການສູນກາງພັກ, ເລຂາຄະນະພັກ ລັດຖະມົນຕີກະຊວງສາທາລະນະສຸກ, ເປັນກຽດເຂົ້າຮ່ວມຂອງ ສະຫາຍ ຄໍາພັນ ພົມມະທັດ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ປະທານຄະນະກວດກາສູນກາງພັກ ແລະ ມີສະຫາຍ ວິໄລວັນ ບຸດດາຄໍາ ກໍາມະການພັກສໍາຮອງສູນກາງພັກ, ຮອງປະທານກວດກາສູນກາງພັກ ພ້ອມດ້ວຍຄະນະຮັບຜິດຊອບກອງປະຊຸມກາງສະໄໝຈາກຄະນະຈັດຕັ້ງສູນກາງພັກ, ມີຮອງເລຂາຄະນະພັກ, ຄະນະປະຈໍາພັກ, ກໍາມະການຄະນະພັກ, ຄະນະພັກຮາກຖານ, ຄະນະໜ່ວຍພັກຮາກຖານ, ເລຂາ ແລະ ປະທານອົງການຈັດຕັ້ງມະຫາຊົນ, ບັນດາສະຫາຍສະມາຊິກພັກສົມບຸນທີ່ມີຕໍາແໜ່ງຂັ້ນບໍລິຫານ ແລະ ທຽບເທົ່າຂຶ້ນໄປ ຂອງກະຊວງສາທາລະນະສຸກເຂົ້າຮ່ວມຈຳນວນ 200 ສະຫາຍ, ຍິງ 78 ສະຫາຍ.
ໃນວາລະດໍາເນີນກອງປະຊຸມທີ່ມີຄວາມສໍາຄັນນີ້ ສະຫາຍ ປອ. ດຣ ບຸນແຝງ ພູມມະໄລສິດ ໄດ້ມີຄໍາເຫັນໃນການດຳເນີນຊີວິດການເມືອງພາຍໃນອົງຄະນະພັກກະຊວງສາທາລະນະສຸກ ແລະ ກ່າວເປິດກອງປະຊຸມຢ່າງເປັນທາງການ. ຈາກນັ້ນ ກອງປະຊຸມຍັງໄດ້ເຜີຍແຜ່-ເຊື່ອມຊຶມເອກະສານຄໍາສັ່ງ 268 ຂອງຄະນະເລຂາ ທິການສູນກາງພັກ, ມາດຕະຖານ, ສິດ ແລະ ໜ້າທີ່ຂອງຄະນະບໍລິຫານງານພັກ, ຂອງຄະນະພັກກະຊວງ-ອົງການ ແລະ ຂໍ້ຫ້າມສໍາລັບສະມາຊິກພັກ. ຜ່ານຮ່າງບົດສະຫຼຸບຕີລາຄາການຈັດຕັັ້ງປະຕິບັດມະຕິກອງປະຊຸມໃຫຍ່ ຄັັ້ງທີ IX ອົງຄະນະພັກກະຊວງ ຕິດພັນກັບການຈັດຕັັ້ງປະຕິບັດມະຕິກອງປະຊຸມໃຫຍ່ ຄັັ້ງທີ XI ຂອງພັກກາງສະໄໝຜ່ານມາ ແລະ ທິດທາງຄາດໝາຍສູ້ຊົນແຕ່ລະດ້ານໃນຕໍໍ່ໜ້າ.
ໃນໂອກາດດັ່ງກ່າວ ສະຫາຍ ຄໍາພັນ ພົມມະທັດ ກໍາມະການກົມການເມືອງສູນກາງພັກ, ເລຂາທິການສຸນການພັກ, ປະທານຄະນະກວດກາສູນກາງພັກ ໄດ້ມີຄໍາເຫັນຕໍ່ການທາມທາບຄວາມໄວ້ວາງໃຈຕໍ່ຄະນະພັກກະຊວງ, ບົດສະຫຼຸບ ແລະ ໃຫ້ທິດຊີ້ນໍາ ເຊິ່ງກອງປະຊຸມກາງສະໄໝໃນຄັ້ງນີ້ ມີຄວາມໝາຍສໍາຄັນຍິ່ງ, ເພາະມັນເປັນການສໍາຫຼວດກວດກາຄືນໝາກຜົນຂອງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກກະຊວງສາທາລະນະສຸກ ເຄິ່ງສະໄໝຂອງກອງປະຊຸມໃຫຍ່ຜ່ານມາ ຢ່າງພາວະວິໄສ ແລະ ຖືກຕ້ອງກັບສະພາບຕົວຈິງ.
