ໂດຍ: ແສງຄຳ ຈິດຕະວົງ; ພາບ: ລັດດາວັນ ສີຫານຸວົງ

     ໃນວັນທີ 10 ກໍລະກົດ 2023  ຄະນະບໍລິຫານງານພັກກະຊວງແຜນການ ແລະ ການລົງທຶນ ໄດ້ໄຂກອງປະຊຸມຄົບຄະນະກາງສະໄໝ ຄັ້ງທີ IV ຂຶ້ນ ເພື່ອທາບທາມຄວາມໄວ້ວາງໃຈຕໍ່ການນຳພາລວມ ແລະ ບຸກຄົນ, ພາຍໃຕ້ການເປັນປະທານຂອງ ສະຫາຍ ຄຳເຈນ ວົງໂພສີ ກຳມະການສູນກາງພັກ, ເລຂາຄະນະບໍລິຫານງານພັກກະຊວງແຜນການ ແລະ ການລົງທຶນ, ເປັນກຽດເຂົ້າຮ່ວມ ແລະ ມີຄຳເຫັນຊີ້ນຳຕໍ່ກອງປະຊຸມໂດຍ ສະຫາຍ ປອ ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ ແລະ ມີຜູ້ຕາງໜ້າຈາກຄະນະຈັດຕັ້ງສູນກາງພັກ, ຄະນະກວດກາສູນກາງພັກ, ມີກຳມະການຄະນະປະຈຳພັກ, ກຳມະການຄະນະບໍລິຫານງານພັກ, ຄະນະພັກຮາກຖານ ແລະ ຄະນະໜ່ວຍພັກອ້ອມຂ້າງກະຊວງເຂົ້າຮ່ວມຢ່າງພ້ອມພຽງ.

     ກອງປະຊຸມ ໄດ້ຮັບຟັງຄຳສັ່ງຂອງຄະນະເລຂາທິການສູນກາງພັກ ສະບັບເລກທີ 268/ຄລສພ ລົງວັນທີ 20 ມັງກອນ 2023 ວ່າດ້ວຍການດໍາເນີນກອງປະຊຸມຄົບຄະນະບໍລິຫານງານພັກແຕ່ລະຂັ້ນ, ມາດຖານຄະນະບໍລິຫານງານພັກກະຊວງ,​ ສິດ ແລະ ໜ້າທີ່ຂອງຄະນະພັກ, ຂໍ້ຫ້າມຂອງສະມາຊິກພັກ; ຜ່ານຮ່າງບົດສະຫຼຸບຕີລາຄາການຈັດຕັ້ງປະຕິບັດບັນດາວຽກງານຂອງຄະນະບໍລິຫານງານພັກກະຊວງແຜນການ ແລະ ການລົງທຶນ ກາງສະໄໝ (2021-2023) ແລະ ວາງທິດທາງແຜນການທ້າຍສະໄໝ, ຮ່າງບົດສະຫຼຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຂອງຂະແໜງແຜນການ ແລະ ການລົງທຶນ ຕິດພັນກັບການຈັດຕັ້ງຜັນຂະຫຍາຍ ແລະ ການປະຕິບັດ 2 ວາລະແຫ່ງຊາດ ແລະ ຄາດໝາຍສູ້ຊົນໃນຕໍ່ໜ້າ, ຜ່ານບົດສຳຫຼວດການນຳພາລວມຂອງຄະນະບໍລິຫານງານພັກກະຊວງແຜນການ ແລະ ການລົງທຶນກາງສະໄໝໃນໄລຍະຜ່ານມາ ແລະ ກຳນົດມາດຕະການ, ວິທີແກ້ໄຂໃນຕໍ່ໜ້າ.

     ໃນໂອກາດນີ້, ສະຫາຍ ປອ ບຸນທອງ ຈິດມະນີ ກໍໄດ້ມີຄຳເຫັນຊົມເຊີຍຕໍ່ຜົນສຳເລັດຂອງການນຳພາວຽກງານໄລຍະຜ່ານມາຂອງຄະນະບໍລິຫານງານພັກກະຊວງ ແລະ ໄດ້ໃຫ້ທິດຊີ້ນຳຕໍ່ການທາບທາມຢັ່ງຫາງສຽງຄວາມເຊື່ອໝັ້ນໄວ້ວາງໃຈຕໍ່ການນຳພາລວມ ແລະ ບຸກຄົນຄະນະບໍລິຫານງານພັກກະຊວງ ໂດຍເນັ້ນໃຫ້ບັນດາຜູ້ແທນກອງປະຊຸມ ເຫັນແຈ້ງຄວາມສຳຄັນໃນກອງປະຊຸມຄົບຄະນະພັກກາງສະໄໝຄັ້ງນີ້ ເຊິ່ງຖືເປັນຂອດສຳຄັນຂອງການດຳເນີນຊີວິດການເມືອງໃນທົ່ວພັກ ແລະ ການທາບທາມໃນຄັ້ງນີ້ຈະເຫັນໄດ້ຜົນສຳເລັດການນຳພາລວມ ກໍ່ຄືການປະຕິບັດໜ້າທີ່ມີຄວາມຮັບຜິດຊອບຂອງບຸກຄົນໃນຄະນະນຳນັ້ນ. ຄຽງຄູ່ກັນນັ້ນ, ຍັງເນັ້ນໃຫ້ຜູ້ເຂົ້າຮ່ວມ ຈົ່ງກຳແໜ້ນຈຸດປະສົງຄາດໝາຍຈາກການທາບທາມລວມໝູ່ ແລະ ບຸກຄົນ ເຊິ່ງພົວພັນເຖິງຄຸນລັກສະນະ, ມາດຕະຖານດ້ານການເມືອງ, ຄຸນສົມບັດສິນທຳປະຕິວັດ, ຈັນຍາບັນ, ຈັນຍາທຳ, ຄວາມຮັບຜິດຊອບຕໍ່ໜ້າທີ່ການເມືອງ, ແບບແຜນການນຳພາວິທີເຮັດວຽກລວມໝູ່ຄະນະ ແລະ ສະແດງອອກໃນການປະຕິບັດໜ້າທີ່ ຄວາມຮັບຜິດຊອບທີ່ໄດ້ຮັບມອບໝາຍຂອງຄະນະ.