ໂດຍ: ນາງ ອານຸລັກ ຈິດຕິລາດ

ພາບ: ກະຊວງກະສິກໍາ-ປ່າໄມ້

     ກະຊວງກະສິກໍາ ແລະ ປ່າໄມ້  ໄດ້ຈັດກອງປະຊຸມຄົບຄະນະບໍລິຫານງານພັກກາງສະໄໝທີ VI ຂອງອົງຄະນະພັກກະຊວງກະສິກໍາ ແລະ ປ່າໄມ້ ໃນລະຫວ່າງວັນທີ 10-12 ກໍລະກົດ 2023 ທີ່ສະໂມສອນກະຊວງກະສິກໍາ ແລະ ປ່າໄມ້ ພາຍໃຕ້ການເປັນປະທານໂດຍ ສະຫາຍ ປອ. ເພັດ ພົມພິພັກ ກໍາມະການສູນກາງພັກ, ເລຂາຄະນະພັກ, ລັດຖະມົນຕີກະຊວງກະສິກໍາ ແລະ ປ່າໄມ້,  ເປັນກຽດເຂົ້າຮ່ວມ ສະຫາຍ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ, ມີບັນດາສະຫາຍຄະນະພັກ, ມີອໍານວຍການວິທະຍາໄລ ກະສິກໍາ ແລະ ປ່າໄມ້, ໂຮງຮຽນຊົນລະປະທານຊັ້ນສູງທ່າງ່ອນ, ຄະນະໜ່ວຍພັກ, ສະມາຊິກພັກສົມບູນ ພ້ອມດ້ວຍແຂກຖືກເຊີນເຂົ້າຮ່ວມ.

     ໃນວາລະກອງປະຊຸມ ໄດ້ດໍາເນີນການທາບທາມ ຄວາມໄວ້ວາງໃຈຕໍ່ການນໍາພາລວມ ຂອງຄະນະບໍລິຫານງານພັກ ແລະ ບຸກຄົນໃນຄະນະບໍລິຫານງານພັກກາງສະໄໝ ຂອງອົງຄະນະພັກ ກະຊວງກະສິກຳ ແລະ ປ່າໄມ້, ຮັບຟັງການເຜີຍແຜ່-ເຊື່ອມຊຶມເອກະສານຄໍາສັ່ງຂອງຄະນະເລຂາທິການສູນກາງພັກ ວ່າດ້ວຍການດໍາເນີນກອງປະຊຸມຄົບຄະນະກາງສະໄໝຂອງ ຄະນະບໍລິຫານງານພັກ ແຕ່ລະຂັ້ນ ສະບັບເລກທີ 268/ຄລສພ, ລົງວັນທີ 20 ມັງກອນ 2023, ຜ່ານມາດຖານ, ສິດ ແລະ ໜ້າທີ່ ຂອງຄະນະບໍລິຫານງານພັກກະຊວງ, ຂໍ້ຫ້າມສໍາລັບສະມາຊິກພັກ; ພ້ອມທັງຜ່ານຮ່າງບົດສະຫຼຸບຕີລາຄາ ການຊີ້ນໍາ-ນໍາພາຮອບດ້ານ ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VI ຂອງອົງຄະນະພັກກະຊວງກະສິກໍາ-ປ່າໄມ້ ຕິດພັນກັບການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ, ຮ່າງບົດສະຫຼຸບການຈັດຕັ້ງປະຕິບັດແຜນພັດທະນາກະສິກໍາ, ປ່າໄມ້ ແລະ ພັດທະນາຊົນນະບົດ 5 ປີ ຄັ້ງທີ IX (2021-2025) ແລະ ຮ່າງບົດສະຫຼຸບການຈັດຕັ້ງປະຕິບັດ 2 ວາລະແຫ່ງຊາດ ພ້ອມນັ້ນບັນດາສະຫາຍທີ່ ເຂົ້າຮ່ວມກໍໄດ້ພ້ອມກັນຄົ້ນຄວ້າປະກອບຄໍາເຫັນໃສ່ທັງ 3 ຮ່າງບົດສະຫຼຸບດັ່ງກ່າວ ເພື່ອກໍານົດວິທີການສືບຕໍ່ຈັດຕັ້ງປະຕິບັດໃນຕໍ່ໜ້າ

     ໃນໂອກາດດັ່ງກ່າວ, ສະຫາຍ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ ປະທານສູນກາງແນວລາວສ້າງຊາດ ໄດ້ມີຄໍາເຫັນຕໍ່ກອງປະຊຸມ ເຊິ່ງມີຄວາມເຊື່ອໝັ້ນວ່າບັນດາສະຫາຍທີ່ເຂົ້າຮ່ວມກອງປະຊຸມຄັ້ງນີ້, ຈະຍົກສູງຄວາມຮັບຜິດຊອບຂອງຕົນ ເຂົ້າໃນການຄົ້ນຄວ້າປະກອບຄໍາເຫັນຢ່າງເລິກເຊິ່ງ ແລະ ກົງໄປ-ກົງມາ, ກ້າເວົ້າຄວາມຈິງ ເຫັນບັນຫາແລ້ວຕ້ອງພ້ອມກັນແກ້ໄຂ, ພ້ອມກັນຕີລາຄາດ້ານດີຕັ້ງໜ້າ ເພື່ອເສີມຂະຫຍາຍ ແລະ ຕີລາຄາດ້ານອ່ອນ-ຂໍ້ຄົງຄ້າງ, ສາເຫດ ແລະ ກໍານົດຈຸດສຸມ ແລະ ມາດຕະການແກ້ໄຂ ໃຫ້ຖືກຕ້ອງເໝາະສົມ.