ຂ່າວ: ອານຸລັກ, ພາບ: ວິລະສະໄໝ

     ໃນວັນທີ 13 ກໍລະກົດ 2023 ທີ່ສຳນັກງານສູນກາງແນວລາວສ້າງຊາດ ໄດ້ໄຂກອງປະຊຸມຄົບຄະນະບໍລິຫານງານພັກກາງສະໄໝຂອງອົງຄະນະພັກສູນກາງແນວລາວສ້າງຊາດ ສະໄໝທີ V, ພາຍໃຕ້ການເປັນປະທານ ແລະ ໂອ້ລົມຕໍ່ກອງປະຊຸມໂດຍ  ສະຫາຍ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ເລຂາຄະນະພັກ, ປະທານສູນກາງແນວລາວສ້າງຊາດ, ມີ ສະຫາຍ ນ. ບຸດສະດີ ທະນະເມືອງ ກຳມະການສູນກາງພັກ, ຮອງຫົວໜ້າຄະນະຈັດຕັ້ງສູນກາງພັກ, ມີບັນດາສະຫາຍຄະນະປະຈໍາພັກ, ກຳມະການພັກ, ຄະນະໜ່ວຍພັກສູນກາງແນວລາວສ້າງຊາດເຂົ້າຮ່ວມຢ່າງພ້ອມພຽງ.

     ກອງປະຊຸມຄັ້ງນີ້ ຈະດໍາເນີນເປັນເວລາ 2 ວັນເຕັມ, ເຊິ່ງໄດ້ທາບທາມຄວາມໄວ້ວາງໃຈຕໍ່ການນໍາພາລວມ ແລະ ບຸກຄົນໃນຄະນະບໍລິຫານງານສູນກາງແນວລາວສ້າງຊາດ, ຮັບຟັງການເຜີຍແຜ່, ເຊື່ອມຊຶມຄໍາສັ່ງຂອງຄະນະເລຂາທິການສູນກາງພັກ ວ່າດ້ວຍການດໍາເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຕ່ລະຂັ້ນ ສະບັບເລກທີ 268/ຄລສພ, ລົງວັນທີ 20 ມັງກອນ 2023; ຜ່ານມາດຖານ, ສິດ ແລະ ໜ້າທີ່ ຂອງຄະນະບໍລິຫານງານພັກກະຊວງ ແລະ ຂໍ້ຫ້າມສໍາລັບສະມາຊິກພັກ. ຈາກນັ້ນ, ໄດ້ຮັບຟັງບົດສະຫຼຸບການຕີລາຄາການຈັດຕັ້ງປະຕິບັດແຜນພັດທະນາອົງການແນວລາວສ້າງຊາດ, ທິດທາງທ້າຍສະໄໝ ແລະ ການປະຕິບັດ 2 ວາລະແຫ່ງຊາດໂດຍສະເພາະຂົງເຂດແນວລາວສ້າງຊາດ, ພ້ອມນັ້ນ ຍັງໄດ້ຜ່ານບົດສໍາຫຼວດການນໍາພາລວມຂອງຄະນະບໍລິຫານງານພັກ ພ້ອມກັນປະກອບຄໍາເຫັນຕໍ່ບັນດາເນື້ອໃນບົດສະຫຼຸບຜ່ານມາ ເພື່ອພ້ອມກັນສ້າງພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ.

     ໃນໂອກາດດັ່ງກ່າວ, ສະຫາຍ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ ປະທານສູນກາງແນວລາວສ້າງຊາດ ມີຄໍາເຫັນໂອລົມຕໍ່ກອງປະຊຸມວ່າ: ຄະນະພັກແຕ່ລະຂັ້ນຕ້ອງເພີ່ມທະວີຄວາມຮັບຜິດຊອບຂອງຕົນຈົນສຸດຄວາມສາມາດ, ຕັ້ງໜ້ານໍາພາ, ຈັດຕັ້ງພັກໃຫ້ປອດໃສ, ເຂັ້ມແຂງ, ໜັກແໜ້ນ; ປະຕິບັດກົດລະບຽບບົນພື້ນຖານ ແລະ ຫຼັກການຂອງພັກ ທີ່ໄດ້ກໍານົດໄວ້ໃຫ້ສໍາເລັດຕາມການຄາດໝາຍ; ຊ່ວຍເຫຼືອ, ສາມັກຄີຮັກແພງເຊິ່ງກັນ ແລະ ກັນ, ມີຄວາມຄິດໃຫ້ເປັນທໍາ, ເປັນກາງ, ຕັດສິນເປັນຫມູ່ຄະນະ, ຍົກສູງຄວາມຮັບຜິດຊອບຕໍ່ວຽກງານພັກ ແລະ ວຽກງານ ແນວໂຮມໃຫ້ມີຄວາມເຂັ້ມແຂງຄວບຄູ່ກັນໄປຢ່າງບໍ່ຢຸດຢັ້ງ.