ໂດຍ: ວິລະສະໄໝ ຍົດບຸນມີ
ໃນວັນທີ 19 ກໍລະກົດ 2023 ທີ່ສະໂມສອນສະຖາບັນການທະນາຄານໄດ້ ເປີດກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກທະນາຄານແຫ່ງ ສປປ ລາວ ສະໄໝທີ Ⅳ, ພາຍໃຕ້ການເປັນປະທານຂອງ ສະຫາຍ ບຸນເຫຼືອ ສິນໄຊວໍຣະວົງ ເລຂາຄະນະບໍລິຫານງານພັກທະນາຄານແຫ່ງ ສປປລາວ, ເປັນກຽດເຂົ້າຮ່ວມ ແລະ ມີຄຳເຫັນຊີ້ນຳຕໍ່ກອງປະຊຸມໂດຍ ສະຫາຍ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ, ມີສະຫາຍ ນ. ບຸດສະດີ ທະນະເມືອງ ກຳມະການສູນກາງພັກ, ຮອງຫົວໜ້າຄະນະຈັດຕັ້ງສູນກາງພັກ, ມີສະຫາຍຮອງເລຂາຄະນະບໍລິຫານງານພັກ ທຫລ, ກຳມະການປະຈຳພັກ-ຄະນະບໍລິຫານງານພັກ ທຫລ, ຄະນະພັກຮາກຖານ-ຄະນະໜ່ວຍພັກຮາກຖານ, ເລຂາ/ປະທານອົົງການຈັດຕັ້ງມະຫາຊົນ ທຫລ ແລະ ສະມາຊິກພັກ-ພະນັກງານຫຼັກແຫຼ່ງ-ນຳພາຂອງຂະແໜງທະນາຄານ ເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ຮັບຟັງ ຄຳສັ່ງຂອງຄະນະເລຂາທິການສູນກາງພັກ ສະບັບເລກທີ 268 ລົງວັນທີ 20 ມັງກອນ 2023 ວ່າດ້ວຍການດຳເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຕ່ລະຂັ້ນ ພ້ອມທັງຜ່ານ ມາດຖານຄະນະບໍລິຫານງານພັກກະຊວງ, ສິດ ແລະ ໜ້າທີ່ຂອງຄະນະພັກ, ຂໍ້ຫ້າມຂອງສະມາຊິກພັກ, ຮ່າງບົດສະຫຼຸບຕີລາຄາການນຳພາຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນ ຄັ້ງທີ Ⅳ ຂອງອົງຄະນະພັກ ທຫລ ໃນໄລຍະເຄິ່່ງສະໄໝຜ່ານມາ ແລະ ຮ່າງບົດສະຫຼຸບຕີລາຄາການຈັດຕັ້ງປະຕິບັດຍຸດທະສາດພັດທະນາລະບົບສະຖາບັນການເງິນ-ເງິນຕາ 5 ປີ(2021-20250) ໃນໄລຍະເຄິ່່ງສະໄໝຜ່ານມາ. ພ້ອມດຽວກັນນີ້, ຜູ້ເຂົ້າຮ່ວມກອງປະຊຸມຍັງໄດ້ປະກອບຄຳເຫັນ ຕໍ່ 2 ຮ່າງບົດສະຫຼຸບ ແລະ ທາບທາມຄວາມໄວ້ວາງໃຈຕໍ່ການນຳພາລວມ ແລະ ບຸກຄົນໃນຄະນະບໍລິຫານງານພັກ ທຫລ ສະໄໝທີ Ⅳ.
ໃນກອງປະຊຸມ ສະຫາຍ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດໄດ້ມີຄຳເຫັນໂອ້ລົມ ໂດຍສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດໃນການນຳພາ-ຊີ້ນຳຂອງຄະນະບໍລິ ຫານງານພັກ ທຫລ ຕະຫຼອດໄລຍະກາງສະໄໝ, ການທາບທາມຄວາມໄວ້ວາງໃຈຕໍ່ການນຳພາລວມ ແລະ ບຸກຄົນໃນຄະນະບໍລິຫານງານພັກ ທຫລ ແມ່ນເປັນເນື້ອໃນສຳຄັນທັງເປັນການດຳເນີນຊີວິດການເມືອງ, ເປັນການສຳຫຼວດກວດກາກາງສະໄໝໃນຄະນະພັກ ເພື່ອເຮັດໃຫ້ບັນດາສະມາຊິກພັກ, ບັນດາສະຫາຍກຳມະການໃນຄະນະພັກ ເປັນບ່ອນອີງໃນການປັບປຸງຄຸນທາດການເມືອງ, ຄຸນສົມບັດສິນທຳປະຕິວັດ, ແບບແຜນດຳລົງຊີວິດ, ແບບແຜນນຳພາວິທີເຮັດວຽກໃຫ້ຖືກຕ້ອງ, ໜັກແໜ້ນ ທັງຮັບປະກັນຄວາມເປັນແບບຢ່າງນຳໜ້າ ເພື່ອສ້າງຄວາມເຊື່ອໝັ້ນ ໃຫ້ແກ່ບັນດາສະຫາຍສະມາຊິກພັກ-ພະນັກງານ ຕໍ່ຄວາມຮັບຜິດຊອບໜ້າທີ່ການເມືອງຂອງບັນດາສະຫາຍໃນຄະນະພັກ. ການທາບທາມຄວາມໄວ້ວາງໃຈໃນຄັ້ງນີ້ແມ່ນມີຄວາມສຳຄັນຫຼາຍ ເພື່ອເປັນການຍົກສູງຄວາມຮັບຜິດຊອບທາງດ້ານການເມືອງ, ບັນດາຈຸດດີທີ່ຄວນສົ່ງເສີມ, ບັນດາຈຸດອ່ອນທີ່ຄວນປັບປຸງແກ້ໄຂ. ພ້ອມນັ້ນ, ເພື່ອສ້າງການຫັນປ່ຽນຂອງແຕ່ລະສະຫາຍໃນຄະນະພັກໃຫ້ແຂງແຮງຂຶ້ນຕື່ມ. ກອງປະຊຸມຄັ້ງນີ້ຈະດຳເນີນເປັນເວລາ 3 ວັນ 19-21 ກໍລະກົດ 2023
