ຂ່າວ: ຈໍາປາ

     ກອງປະຊຸມທາບທາມຄວາມເຊື່ອໝັ້ນ ໄວ້ວາງໃຈຕໍ່ການນໍາພາຂອງຄະນະບໍລິຫານງານສູນກາງພັກສະໄໝທີ XI ໄດ້ຈັດຂຶ້ນໃນວັນທີ 24 ກໍລະກົດ 2023 ທີ່ຫໍປະຊຸມໃຫຍ່ຫ້ອງວ່າການປົກຄອງແຂວງຫລວງພະບາງ, ໂດຍການເປັນປະທານຂອງ ສະຫາຍ ນາງ ວຽງທອງ ສີພັນດອນ ຄະນະເລຂາທິການສູນກາງພັກ, ປະທານສານປະຊາຊົນສູງສຸດ, ມີຄະນະຮັບຜິດຊອບທາບທາມຂັ້ນສູນກາງ, ພ້ອມດ້ວຍການນໍາຫຼັກແຫຼ່ງແຂວງຫລວງພະບາງ ແລະ ແຂວງໄຊຍະບູລີເຂົ້າຮ່ວມ.

     ກອງປະຊຸມ ສະຫາຍ ນາງ ບຸດສະດີ ທະນະເມືອງ ກຳມະການສູນກາງພັກ, ຮອງຫົວຫນ້າຄະນະຈັດຕັ້ງສູນກາງພັກ ໄດ້ຂຶ້ນສະເໜີຈຸດປະສົງລະດັບຄາດໜາຍ ແລະ ຄວາມສໍາຄັນຂອງຄໍາສັ່ງຂອງຄະນະເລຂາທິການສູນກາງພັກວ່າດ້ວຍການກະກຽມ ແລະ ດໍາເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ແຕ່ລະຂັ້ນ, ເຜີຍແຜ່ມາດຕະຖານລວມຂອງພະນັກງານນໍາພາ-ຄຸ້ມຄອງປະກອບດ້ວຍ 5 ມາດຕະຖານຄື: ດ້ານຄຸນທາດການເມືອງ, ດ້ານຄຸນສົມບັດສິນທໍາປະຕິວັດ ແລະ ແບບແຜນດໍາລົງຊີວິດ, ດ້ານຄວາມຮູ້ຄວາມສາມາດ, ດ້ານແບບແຜນນໍາພາ ແລະ ວິທີເຮັດວຽກ, ດ້ານສຸຂະພາບ ລວມທັງມາດຕະຖານສະເພາະ ແລະ ໜ້າທີຂອງຄະນະບໍລິຫານງານສູນກາງພັກ ເຊິ່ງປະກອບມີ : ວິໄສທັດເບິ່ງກວ້າງເຫັນໄກ, ສາມາດຄົ້ນຄວ້າປະກອບຄໍາເຫັນໃນການປັບປຸງແນວທາງນະໂຍບາຍຂອງພັກ, ກົດໜາຍຂອງລັດ ແລະ ແຜນພັດທະນາເສດຖະກິດ-ສັງຄົມ, ສາມາດຄົ້ນຄວ້າກໍາແໝ້ນແນວທາງນະໂຍບາຍ, ມະຕິ, ຄໍາສັ່ງຂອງຂັ້ນເທິງ ແລະ ສະພາບຄວາມເປັນຈິງຂອງຂະແໜງການ ຫຼື ທ້ອງຖິ່ນຂອງຕົນ, ຫັນເປັນອັນລະອຽດ, ສາມາດນໍາພາເຕົ້າໂຮມກໍາລັງແຮງສັງລວມຊີ້ນໍາ ເພື່ອຈັດຕັ້ງປະຕິບັດແນວທາງ-ນະໂຍບາຍ, ແຜນພັດທະນາເສດຖະກິດສັງຄົມຂອງຕົນ, ມີຄວາມກ້າຫານເດັດຂາດ, ຕໍ່ສູ້ກັບທັດສະນະທີ່ຜິດເຂວ, ປະກົດການຫຍໍ້ທໍ້ໃນການຈັດຕັ້ງ ແລະ ສັງຄົມ, ເພື່ອປົກປ້ອງແນວທາງຂອງພັກ, ລະບຽບ-ກົດໜາຍຂອງລັດ ແລະ ຮັບປະກັນຄວາມຍຸຕິທໍາໃນສັງຄົມ.

     ເພື່ອເຮັດໃຫ້ກອງປະຊຸມຄັ້ງນີ້ມີຄວາມສໍາຄັນ ທັງບັນລຸຜົນສຳເລັດຕາມຄາດໝາຍ ສະຫາຍ ນາງ ວຽງທອງ ສີພັນດອນ ໄດ້ມີຄໍາເຫັນເນັ້ນໃຫ້ຜູ້ເຂົ້າຮ່ວມເອົາໃຈໃສ່ເພີ່ມທະວີຄວາມຮັບຜິດຊອບຕໍ່ກັບການຄົ້ນຄວ້າບຸກຄົນທີ່ມີມາດຕະຖານເງື່ອນໄຂຄົບຖ້ວນ ເພື່ອປະກອບສ່ວນການພັດທະນາວຽກງານກໍ່ສ້າງພັກ, ວຽກງານພະນັກງານ ແລະ ກົງຈັກການຈັດຕັ້ງແຕ່ລະຂັ້ນ ໃຫ້ມີຄວາມພັດທະນາ ແລະ ກ້າວໜ້າຕາມທິດນຳຂອງພັກ. ຈາກນັ້ນ ຜູ້ເຂົ້າຮ່ວມກໍໄດ້ດຳເນີນການປ່ອນບັດທາບທາມຄວາມໄວ້ວາງໃຈຕໍ່ການນໍາພາລວມ ແລະ ບຸກຄົນ ໃນຄະນະບໍລິຫານງານສູນກາງພັກສະໄໝທີ XI.