ໂດຍ: ພອນສະຫວັນ ລາຊະບັນເທົາ

     ໃນວັນທີ 25 ກໍລະກົດ 2023 ທີ່ປະຊຸມກະຊວງພະລັງງານ ແລະບໍ່ແຮ່ ໄດ້ເປີດກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ກະຊວງພະລັງງານ ແລະ ບໍ່ແຮ່ ສະໄໝທີ III, ພາຍໃຕ້ການເປັນປະທານຂອງ ສະຫາຍ ໂພໄຊ ໄຊຍະສອນ ກໍາມະການສູນກາງພັກ, ເລ​ຂາ​ຄະ​ນະ​​ພັກ​ກະ​ຊວງ, ລັດຖະມົນຕີກະຊວງພະລັງງານ ແລະ ບໍ່ແຮ່, ເປັນກຽດເຂົ້າຮ່ວມ ແລະ ມີຄຳເຫັນຊີ້ນຳຕໍ່ກອງປະຊຸມໂດຍ ສະຫາຍ ຄໍາພັນ ພົມມະທັດ ກໍາມະການກົມການ ເມືອງສູນກາງພັກ, ເລຂາທິການສູນກາງພັກ, ປະທານຄະນະກວດກາສູນກາງພັກ, ມີສະຫາຍຄະນະຮັບຜິດຊອບກອງປະຊຸມ ກາງສະໄໝຈາກຄະນະຈັດຕັ້ງສູນກາງພັກ, ມີຮອງເລຂາຄະນະພັກ, ຄະນະປະຈໍາພັກ, ກໍາມະການຄະນະພັກ, ຄະນະພັກຮາກຖານ, ຄະນະໜ່ວຍພັກຮາກຖານ, ເລຂາ ແລະ ປະທານອົງການຈັດຕັ້ງມະຫາຊົນ ແລະ ສະມາຊິກພັກ-ພະນັກງານຫຼັກແຫຼ່ງ-ນຳພາຂອງກະຊວງພະລັງງານ ແລະ ບໍ່ແຮ່ ເຂົ້າຮ່ວມຢ່າງພ້ອມພຽງ.

     ກອງປະຊຸມໄດ້ຮັບຟັງ ການເຜີຍແຜ່-ເຊື່ອມຊຶມ ຄຳສັ່ງຂອງຄະນະເລຂາທິການສູນກາງພັກ ສະບັບເລກທີ 268 ລົງວັນທີ 20 ມັງກອນ 2023 ວ່າດ້ວຍການດຳເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຕ່ລະຂັ້ນ ພ້ອມທັງຜ່ານ ມາດຖານຄະນະບໍລິຫານງານພັກກະຊວງ,​ ສິດ ແລະ ໜ້າທີ່ຂອງຄະນະພັກ, ຂໍ້ຫ້າມຂອງສະມາຊິກພັກ, ຮ່າງບົດສະຫຼຸບຕີລາຄາການນຳພາຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ III ຂອງອົງຄະນະພັກກະຊວງພະລັງງານ ແລະ ບໍ່ແຮ່ ໃນໄລຍະເຄິ່ງສະໄໝຜ່ານມາ ແລະ ຮ່າງບົດສະຫຼຸບຕີລາຄາການຈັດຕັ້ງປະຕິບັດແຜນຍຸດທະສາດພັດທະນາ ອຸດສາຫະກຳ ພະລັງງານ ແລະ ບໍ່ແຮ່ 5 ປີ (2021-2025) ໃນໄລຍະເຄິ່ງສະໄໝ. ພ້ອມດຽວກັນນີ້, ຜູ້ເຂົ້າຮ່ວມກອງປະຊຸມຍັງໄດ້ປະກອບຄຳເຫັນ ຕໍ່ 2 ຮ່າງບົດສະຫຼຸບ ແລະ ທາບທາມຄວາມໄວ້ວາງໃຈຕໍ່ການນຳພາລວມ ແລະ ບຸກຄົນໃນຄະນະບໍລິຫານງານພັກ ກາງສະໄໝ ຂອງອົງຄະນະພັກກະຊວງ ພະລັງງານ ແລະ ບໍ່ແຮ່.

     ຕອນທ້າຍກອງປະຊຸມ ສະຫາຍ ຄໍາພັນ ພົມມະທັດ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ປະທານຄະນະກວດກາສູນກາງພັກ, ໄດ້ມີຄຳເຫັນໂອ້ລົມ ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດໃນການນຳພາ-ຊີ້ນຳຂອງຄະນະບໍລິຫານງານພັກ ກະຊວງພະລັງງານ ແລະ ບໍ່ແຮ່ ຕະຫຼອດໄລຍະກາງສະໄໝ ແລະ ສະຫາຍໄດ້ມີຄຳເຫັນເໜັນບາງຈຸດ ເພື່ອເປັນພື້ນຖານສຳຄັນ ໃນການຍົກລະດັບທິດສະດີ ປະຕີບັດແນວທາງການເມືອງຂອງພັກ-ກົດໝາຍຂອງລັດໃຫ້ ແຂງແຮງ, ໜັກແໜ້ນ, ສຶກສາອົບຮົມທາງດ້ານແນວຄິດ, ວິໄສທັດ ແລະ ຈິນຕະນາ ການໃຫ້ເລີກເຊິ່ງ. ພ້ອມທັງດັດແປງ, ປັບປຸງແບບແຜນນຳພາ ແລະ ວິທີເຮັດວຽກຂອງ ຄະນະພັກ ແຕ່ລະ ຂັ້ນໃຫ້ມີຄຸນ ນະພາບເປັນກົກ, ຍົກສູງຄຸນນະພາບ ໃນການພັດທະນາວຽກງານພະລັງງານ ແລະ ບໍ່ແຮ່, ມີການກວດກາ ແລະ ປະເມີນຜົນຄືນບັນດາແຜນງານທີ່ລະບຸໄວ້ ໃນມະຕິກອງປະຊຸມໃຫຍ່ ແຜນພັດທະນາພະລັງງານ ແລະ ບໍ່ແຮ່ 5 ປີ, ພ້ອມທັງປັບປຸງຄຸນນະພາບຂອງການດຳເນີນທຸລະກິດຂອງບັນດາລັດວິສາຫະກິດທີ່ຂຶ້ນກັບອົງຄະນະພັກ ໃຫ້ມີປະສິດທິ ຜົນກວ່າເກົ່າ ແລະ ປັບປຸງຂະບວນການກໍ່ສ້າງອົງຄະນະພັກ, ຄະນະພັກຮາກຖານ ແລະ ໜ່ວຍພັກ ໃຫ້ປອດໃສ, ເຂັ້ມ ແຂງ, ໜັກແໜ້ນ ບົນຂະບວນການທີ່ຕໍ່ເນື່ອງ ແລະ ມີຄຸນນະພາບສູງຍິ່ງຂຶ້ນ.