ຂຽນໂດຍ: ແສງຄຳ ຈິດຕະວົງ 

ພາບ: ວິລະສະໄໝ ຍົດບຸນມີ

     ກອງປະຊຸມທາບທາມຄວາມເຊື່ອໝັ້ນໄວ້ວາງໃຈ ຕໍ່ການນຳພາລວມ ຂອງບັນດາສະຫາຍຄະນະບໍລິຫານງານສູນກາງພັກ ກາງສະໄໝທີ XI ຈຸດທາບທາມຂົງເຂດເສດຖະກິດ ໄດ້ຈັດຂຶ້ນໃນວັນທີ 28 ກໍລະກົດ 2023 ທີ່ທະນາຄານແຫ່ງ ສປປ ລາວ ໂດຍໃຫ້ກຽດເປັນປະທານຂອງສະຫາຍ ປອ ບຸນທອງ ຈິດມະນີ ກຳມະການກົມການເມືອງ, ຜູ້ປະຈຳການ ຄະນະເລຂາທິການສູນກາງພັກ, ຮອງປະທານປະເທດແຫ່ງ ສປປ ລາວ, ມີບັນດາກໍາມະການສູນກາງພັກ, ເລຂາຄະນະພັກ 8 ກະຊວງ, ຄະນະປະຈຳ ແລະ ຄະນະບໍລິຫານງານພັກ ມີ 9 ພາກສ່ວນ ໃນຂົງເຂດເສດຖະກິດ ແລະ ມີບັນດາພະນັກງານການນຳ ທີ່ມາຈາກພາກສ່ວນທີ່ກ່ຽວຂ້ອງຂອງສູນກາງພັກເຂົ້າຮ່ວມຢ່າງພ້ອມພຽງ.

     ກອງປະຊຸມໃນຄັ້ງນີ້ ສຸດທີ່ມີຄວາມໝາຍຄວາມສຳຄັນຫຼາຍ ຊຶ່ງຈັດຂຶ້ນພາຍຫຼັງທີ່ສຳເລັດກອງປະຊຸມກາງສະໄໝ ຂອງທຸກອົງຄະນະພັກໃນທົ່ວປະເທດ, ຈຸດປະສົງກອງປະຊຸມຄັ້ງນີ້ ຈະໄດ້ພ້ອມກັນຄົ້ນຄວ້າປະກອບຄຳຄິດຄຳເຫັນ ຕໍ່ການນຳພາລວມຂອງສູນກາງພັກ ແລະ ບັນດາສະຫາຍ ໃນຄະນະບໍລິຫານງານສູນກາງພັກ ໃນກາງສະໄໝຜ່ານມາ ແລະ ເພື່ອຕີລາຄາຄືນການນໍາພາລວມໃນການຈັດຕັ້ງຜັນຂະຫຍາຍປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 05 ປີ ຄັ້ງທີ IX ກາງສະໄໝຜ່ານມາ ຕໍ່ຂົງເຂດເສດຖະກິດ ໂດຍຍົກໃຫ້ເຫັນດ້ານຕັ້ງໜ້າ, ຂໍ້ຄົງຄ້າງ ເພື່ອໃຫ້ຄະນະບໍລິຫານງານສູນກາງພັກ ສືບຕໍ່ປັບປຸງແກ້ໄຂໃນຕໍ່ໜ້າ; ເພື່ອພ້ອມກັນຄົ້ນຄວ້າ ມີຄວາມເຫັນ ຕໍ່ບັນດາສະຫາຍຄະນະບໍລິຫານງານສູນກາງພັກ ເພື່ອເບິ່ງຄືນ ແລະ ຕີລາຄາບັນຫາຕ່າງໆ ທີ່ພົວພັນເຖິງຄຸນລັກສະນະ, ມາດຖານຂອງພະນັກງານນຳພາຄຸ້ມຄອງ (ມາດຖານຂອງສູນກາງພັກ).

     ນອກຈາກນັ້ນ, ກອງປະຊຸມຍັງໄດ້ເຜີຍແຜ່ຈຸດປະສົງ, ລະດັບຄາດໝາຍ ແລະ ຄວາມສຳຄັນຂອງຄຳສັ່ງ ຄະນະເລຂາທິການສູນກາງພັກ ສະບັບເລກທີ 268/ຄລສພ, ມາດຕະຖານລວມ, ມາດຕະຖານສະເພາະຂອງຄະນະບໍລິຫານງານສູນກາງພັກ ແລະ ໜ້າທີ່ຂອງຄະນະບໍລິຫານງານສູນກາງພັກ.

     ໃນໂອກາດນີ້, ສະຫາຍ ປອ. ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈຳການເລຂາທິການສູນກາງພັກ, ຮອງປະທານປະເທດແຫ່ງ ສປປ ລາວ ໄດ້ມີຄຳເຫັນຊີ້ນຳຕໍ່ກອງປະຊຸມທາບທາມດັ່ງກ່າວວ່າ: ການປະກອບຄຳເຫັນຕໍ່ການນຳພາລວມ: ສະເໜີໃຫ້ບັນດາສະຫາຍຜູ້ແທນກອງປະຊຸມ ອີງໃສ່ຈິດໃຈຊີ້ນໍາ "ສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ" ຂອງກອງປະຊຸມໃຫຍ່ ຄັ້ງທີ XI ຂອງພັກ, ອີງຕາມຜົນໄດ້ຮັບໃນການຫັນເອົາມະຕິດັ່ງກ່າວເຂົ້າສູ່ການຈັດຕັ້ງປະຕິບັດ ແລະ ການຫັນປ່ຽນທີ່ເກີດຂຶ້ນຕົວຈິງ ຈາກການນຳພາ-ຊີ້ນຳ ໃນການເຄື່ອນໄຫວຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ ແຫ່ງຊາດ 05 ປີ ຄັ້ງທີ IX ໃນກາງສະໄໝ ແລະ ການປະຕິບັດ 2 ວາລະແຫ່ງຊາດ; ສ່ວນການປະກອບຄໍາເຫັນ ຕໍ່ແຕ່ລະສະຫາຍໃນຄະນະບໍລິຫານງານສູນກາງພັກ:  ໃຫ້ເບິ່ງ ແລະ ຕີລາຄາຄືນ ດ້ານຄຸນທາດການເມືອງ, ຄຸນສົມບັດສິນທໍາປະຕິວັດ, ຄວາມຮັບຜິດຊອບ ຕໍ່ໜ້າທີ່ການເມືອງລວມ ຂອງສູນກາງພັກ; ເບິ່ງແບບແຜນນໍາພາ ແລະ ວິທີເຮັດວຽກ, ການເຄົາລົບ ແລະ ປະຕິບັດຫຼັກການນໍາພາຂອງພັກ; ເບິ່ງແນວຄິດ ແລະ ທັດສະນະ ໃນການຄົ້ນຄວ້າເບິ່ງບັນຫາຕ່າງໆ ມີຄວາມຮອບຄອບ, ຢ່າງເລິກເຊິ່ງ, ພາວະວິໄສ; ເບິ່ງຄວາມເອົາໃຈໃສ່ ແລະ ຖືສໍາຄັນຕໍ່ວຽກງານກໍ່ສ້າງພັກ, ພະນັກງານ, ວຽກງານຕິດຕາມ, ກວດກາ, ສະກັດກັ້ນ ແລະ ຕ້ານການສໍ້ລາດບັງຫຼວງ ໃນຂະແໜງການ ແລະ ທ້ອງຖິ່ນ ທີ່ຕົນຮັບຜິດຊອບ.