ບົດຂ່າວ: ສົມໄຊ ຫຼ້າດວງມະນີ
ຄະນະຈັດຕັ້ງແຂວງຊຽງຂວາງ
ເພື່ອເປັນການເສີມຂະຫຍາຍສາຍສາຍພົວພັນຮ່ວມມືລະຫວ່າງແຂວງຫົວພັນ ແລະ ແຂວງຊຽງຂວາງ ທີ່ມີຊາຍ ແດນຕິດຈອດກັນ ກໍ່ຄືລະຫວ່າງສອງຄະນະຈັດຕັ້ງແຂວງ ທັງເປັນການປະຕິບັດຕາມບົດບັນທຶກການຮ່ວມມືລະຫວ່າງຄະນະຈັດຕັ້ງແຂວງຫົວພັນ ແລະ ຄະນະຈັດຕັ້ງແຂວງຊຽງຂວາງ ໃນລະຫວ່າງວັນທີ 17-19 ສິງຫາ 2023 ຄະນະຈັດຕັ້ງແຂວງ-ຄະນະຈັດຕັ້ງເມືອງແຂວງຫົວພັນ ແລະ ຄະນະຈັດຕັ້ງແຂວງ-ຄະນະຈັດຕັ້ງເມືອງແຂວງຊຽງຂວາງ ໄດ້ພົບປະແລກປ່ຽນບົດຮຽນຮ່ວມກັນທີ່ຫ້ອງປະຊຸມຊັ້ນ 2 ຫ້ອງວ່າການແຂວງຊຽງຂວາງ ມີບັນດາຫົວໜ້າ-ຮອງຫົວໜ້າຄະນະຈັດຕັ້ງແຂວງ, ຜູ້ຕາງໜ້າຄະນະຈັດຕັ້ງເມືອງ, ຫົວໜ້າຂະແໜງ, ຮອງຫົວໜ້າຂະແໜງພ້ອມດ້ວຍພະນັກງານວິຊາການຄະນະຈັດຕັ້ງແຂວງທັງສອງແຂວງເຂົ້າ ຮ່ວມທັງໝົດ 58 ສະຫາຍ, ຍິງ 17 ສະຫາຍ, ຄະນະຜູ້ແທນຄະນະຈັດຕັ້ງແຂວງຫົວພັນນຳໂດຍ ສະຫາຍ ນາງ ລ້ອງຄຳ ພອນມີໄຊ ກໍາມະການປະຈຳພັກແຂວງ, ຫົວໜ້າຄະນະຈັດຕັ້ງແຂວງຫົວພັນ ຄະນະຜູ້ແທນຄະນະຈັດຕັ້ງແຂວງຊຽງຂວາງນຳໂດຍ ສະຫາຍ ສູນທອນ ພັນມີໄຊ ກຳມະການປະຈຳພັກແຂວງ, ຫົວໜ້າຄະນະຈັດຕັ້ງແຂວງຊຽງຂວາງ.
ການພົບປະແລກປ່ຽນບົດຮຽນໃນຄັ້ງນີ້ແມ່ນ ເພື່ອທົບທວນຄືນຜົນການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ແລະ ພາລະບົດບາດໜ້າທີ່ເປັນເສນາທິການໃຫ້ຄະນະພັກຂັ້ນເທິງເພື່ອຕີລາຄາ ແລະ ຖອນຖອນແລກປ່ຽນບົດຮຽນ; ຫົວຂໍ້ນໍາມາແລກປ່ຽນໃນຄັ້ງນີ້ແມ່ນ: “ການກະກຽມດໍາເນີນກອງປະຊຸມໃຫຍ່ 3 ຂັ້ນຂອງພັກ ແລະ ວຽກງານປັບປຸງກົງຈັກການຈັດຕັ້ງຂອງແຂວງຊຽງຂວາງ”. ໂດຍຄະນະຈັດຕັ້ງທັງສອງແຂວງໄດ້ພັດປ່ຽນກັນຂຶ້ນລາຍງານສະພາບພົ້ນເດັ່ນໃນການຈັດຕັ້ງປະຕິບັດວຽກງານຂອງຕົນໃນໄລຍະ 1 ປີຜ່ານມາ ທັງດ້ານດີຕັ້ງໜ້າ ແລະ ຈຸດອ່ອນຂໍ້ຄົງຄ້າງທີ່ຈະຕ້ອງແກ້ໄຂ, ພ້ອມທັງ ສະເໜີກ່ຽວກັບທິດທາງແຜນການສືບຕໍ່ຮ່ວມມືໃນຕໍ່ໜ້າ. ຈາກນັ້ນ, ຄະນະຜູ້ແທນທັງສອງແຂວງກໍໄດ້ສົນທະນາແລກປ່ຽນບົດຮຽນເຊິ່ງກັນ ແລະ ກັນເປັນຕົ້ນແມ່ນ: ວຽກງານປັບປຸງກົງຈັກການຈັດຕັ້ງ, ວຽກງານກໍ່ສ້າງພັກ, ວຽກງານສ້າງແຜນກຳນົດພະນັກງານນຳພາ-ຄຸ້ມຄອງ, ວຽກງານນະໂຍບາຍຕໍ່ສະມາຊິກພັກ; ໃນນັ້ນວຽກງານທີ່ພົ້ນເດັ່ນກວ່າໝູ່ແມ່ນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຕາມຄໍາສັ່ງຂອງກົມການເມືອງສູນກາງພັກ ສະບັບເລກທີ 01/ກມສພ, ລົງວັນທີ 03 ມັງກອນ 2018, ວຽກງານການຂະຫຍາຍສະມາຊິກພັກຢູ່ສຳນັກງານອົງການອ້ອມຂ້າງເມືອງ-ແຂວງ ແລະ ຂັ້ນຮາກຖານບ້ານ, ການອອກບັດ-ມອບບັດສະມາຊິກພັກສົມບູນ, ວຽກງານກອງປະຊຸມໃຫຍ່ໜ່ວຍພັກບ້ານ, ຄະນະປົກຄອງບ້ານ, ການປັບປຸງແກ້ໄຂປະກົດການຫຍໍ້ທໍ້ຕ່າງໆຢູ່ຮາກຖານພັກບ້ານ, ການຢັ້ງຢືນ ແລະ ທຽບລະດັບທິດສະດີ, ການຍົກຍ້າຍສະມາຊິກພັກ-ພະນັກງານ, ນະໂຍບາຍຕໍ່ພະນັກງານທີ່ໄປຍົກລະດັບວິຊາສະເພາະ, ຮຽນທິດສະດີທັງພາຍໃນ ແລະ ຕ່າງປະເທດ, ການປະຕິບັດນະໂຍບາຍຕໍ່ພະນັກງານທີ່ເສຍຊີວິດທັງຜູ້ປະຈຳການ ແລະ ພະນັກງານບໍານານ.
ກອງປະຊຸມພົບປະແລກປ່ຽນບົດຮຽນຄັ້ງນີ້ຜູ້ແທນທັງສອງຝ່າຍໄດ້ຕົກລົງເຫັນດີເປັນເອກະພາບໃນບົດບັນທຶກການຮ່ວມມືລະຫວ່າງຄະນະຈັດຕັ້ງແຂວງຫົວພັນ ກັບ ຄະນະຈັດຕັ້ງແຂວງຊຽງຂວາງເພື່ອແລກປ່ຽນບົດຮຽນເຊິ່ງກັນ ແລະ ກັນ; ເຊິ່ງຄະນະຈັດຕັ້ງແຂວງຫົວພັນ ຈະເປັນເຈົ້າພາບໃນປີ 2024.
ໂອກາດດັ່ງກ່າວ ຄະນະຈັດຕັ້ງແຂວງຊຽງຂວາງໄດ້ນຳພາຄະນະຜູ້ແທນຄະນະຈັດຕັ້ງແຂວງຫົວພັນ ໄປທ່ຽວຊົມທົ່ງໄຫຫີນ, ວັດໄຫຫີນໄຊຍະຣາມ ແລະ ຍັງໄດ້ຈັດກິດຈະກຳຫຼິ້ນກິລາມິດຕະພາບ ເພື່ອສືບຕໍ່ຮັດແໜ້ນຄວາມສາມັກຄີອັນເປັນມູນເຊື້ອ ແລະ ສ້າງສາຍສຳພັນທີ່ດີໃຫ້ຄະນະທັງສອງຄະນະແຂວງໃນການພົວພັນຮ່ວມມື ແລະ ພ້ອມກັບຈັດຕັ້ງປະຕິບັດແຜນນະໂຍບາຍ ແລະ ການວາງທິດທາງແຜນການວຽກງານວິຊາສະເພາະຂອງຕົນໃນຕໍ່ໜ້າ ໃຫ້ສອດຄ່ອງກັບສະພາບຄວາມເປັນຈິງຂອງທ້ອງຖິ່ນແຕ່ລະແຂວງໃນຕໍ່ໜ້າ...ຯ
