ໂດຍ:ສົມຈິດ ສີປະເສີດ

     ເພື່ອເສີມສ້າງຄວາມສາມັກຄີແບບພິເສດການຮ່ວມມື ລະຫວ່າງ ລາວ-ຫວຽດນາມ ເວົ້າລວມ, ເວົ້າສະເພາະລະຫວ່າງຄະນະຈັດຕັ້ງແຂວງບໍ່ແກ້ວກັບຄະນະຈັດຕັ້ງພັກແຂວງເຊີນລາ ສ.ສ ຫວຽດນາມ ໃຫ້ ແໜ້ນແຟ້ນຍິ່ງຂຶ້ນ.ໃນກາງເດືອນສິງຫາ 2023 ຄະນະຈັດຕັ້ງແຂວງບໍ່ແກ້ວ ໄດ້ໄປເຄື່ອນໄຫວເຮັດວຽກ ແລະ ແລກປ່ຽນບົດຮຽນວິຊາສະເພາະຢູ່ ສ.ສ ຫວຽດນາມ ຊຶ່ງນໍາໂດຍ ສະຫາຍ ສົມພອນ ແກ້ວມະນີ ກໍາມະການປະຈໍາພັກແຂວງ, ຫົວໜ້າຄະນະຈັດຕັ້ງແຂວງບໍ່ແກ້ວ ພ້ອມດ້ວຍຄະນະ ໂດຍຄະນະຈັດຕັ້ງພັກແຂວງເຊີນລາ ນໍາໂດຍສະຫາຍ ເລຮົ່ງລອງ ກໍາມະການປະຈໍາພັກແຂວງ, ຫົວໜ້າຄະນະຈັດຕັ້ງພັກແຂວງເຊີນລາ ພ້ອມດ້ວຍຄະນະໃຫ້ການຕ້ອນຮັບ. ການພົບປະແລກປ່ຽນບົດຮຽນເຊິ່ງກັນ ແລະ ກັນ ຂອງທັງສອງຄະນະຈັດຕັ້ງໄດ້ຈັດຂຶ້ນທີ່ຫ້ອງປະຊຸມຊັ້ນສອງຂອງຄະນະຈັດຕັ້ງພັກແຂວງເຊີນລາ ສ.ສ ຫວຽດນາມ ໂດຍມີພະນັກງານຂອງຄະນະຈັດຕັ້ງທັງສອງແຂວງ (ບໍ່ແກ້ວ-ເຊີນລາ) ຈໍານວນ 31 ສະຫາຍ, ຍິງ 8 ສະຫາຍ ເຂົ້າຮ່ວມ.

    ໃນກອງປະຊຸມຄະນະນໍາທັງສອງຝ່າຍໄດ້ຜັດປ່ຽນກັນລາຍງານແຈ້ງສະພາບການຂອງແຕ່ລະຝ່າຍໃຫ້ກັນຊາບ, ໂດຍແຕ່ລະຝ່າຍໄດ້ຍົກໃຫ້ເຫັນຜົນສຳເລັດ ແລະ ບາງດ້ານທີ່ຍັງຄ້າງໃນວຽກງານຈັດຕັ້ງກໍ່ສ້າງພັກ-ພະນັກງານຢູ່ທ້ອງຖິ່ນທີ່ຈະໄດ້ສຸມໃສ່ຊ່ວຍເຫຼືອຊຶ່ງກັນ ແລະ ກັນແກ້ໄຂໃນຕໍ່ໜ້າ, ໄດ້ແລກປ່ຽນບົດຮຽນໃນການກໍ່ສ້າງພັກ ແລະ ວຽກງານອື່ນໆ, ພ້ອມກັນນັ້ນ ກໍ່ໄດ້ສະເໜີທິດທາງໃນການສືບຕໍ່ພົວພັນຮ່ວມມື ລະຫວ່າງຄະນະຈັດຕັ້ງພັກແຂວງເຊິນລາ ສ.ສ ຫວຽດນາມ ກັບ ຄະນະຈັດຕັ້ງແຂວງບໍ່ແກ້ວໃນຊຸມປີຕໍ່ໜ້າ.

     ພາຍຫຼັງເຮັດວຽກພົບປະກັນເປັນທາງການແລ້ວ ຄະນະຈັດຕັ້ງພັກແຂວງເຊີນລາ ຍັງໄດ້ນຳພາຄະ ນະຜູ້ແທນຄະນະຈັດຕັ້ງແຂວງບໍໍ່ແກ້ວ ໄປວາງກະຕາດອກໄມ້ ແລະ ຈູດທູບຢູ່ຫໍ່ບູຊາ ທ່ານປະທານໂຮ່ຈີນິນຢູ່ສະໜານຫຼວງ, ທ່ຽວຊົມການພັດທະນາເສດຖະກິດ-ສັງຄົມຂອງແຂວງເຊິນລາ, ເມືອງມາຍເຊິນ ແລະ ໄດ້ຢ້ຽມຢາມສະຖານທີ່ປະຫວັດສາດການປະຕິວັດຫວຽດນາມ, ໄປຢ້ຽມຢາມສະຖານທີ່ຄຸມຂັງທ່ານຜູ້ນໍາໃນສະໄໝເກົ່າທີ່ຕັ້ງສູນກາງການຕໍ່ສູ້ກູ້ຊາດສະໄໝກ່ອນ ແລະ ຢ້ຽມຢາມເຂດອານຸສອນສະ ຖານກອງທັບເຕີຍຕຽນ (ກອງພັນໃຫຍ່ 52) ເມືອງມົກເຈົາ ແຂວງ ເຊີນລາ.

    ຜ່ານການຢ້ຽມຢາມຂອງຄະນະຈັດຕັ້ງບໍ່ແກ້ວ ທີ່ແຂວງເຊີນລາ ສ.ສ ຫວຽດນາມໃນຄັ້ງນີ້ຍິ່ງເປັນການສືບຕໍ່ຮັດແໜ້ນ ແລະ ເສີມຂະຫຍາຍການພົວພັນຮ່ວມມືກັນໃຫ້ແໜ້ນແຟ້ນຍິ່ງຂຶ້ນ. ພ້ອມກັນນັ້ນ ກໍ່ໄດ້ຮຽນຮູ້ບັນຫາໃໝ່ຈຳນວນໜຶ່ງ ໂດຍສະເພາະແມ່ນບົດຮຽນການຂະຫຍາຍສະມາຊິກພັກເຂົ້າໃນບ້ານທີ່ຢູ່ຫ່າງໄກສອກຫຼີກ, ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ວຽກງານການປະຕິບັດນະໂຍບາຍຕໍ່ສະມາຊິກພັກທີ່ເປັນປະຊາຊົນ ແລະ ວຽກງານອື່ນໆ ຂອງແຂວງເຊິນລາ ເພື່ອນຳມາໝູນໃຊ້ເຂົ້າໃນການປັບປຸງວຽກງານພັກຂອງພວກເຮົາໃຫ້ມີປະສິດທິຜົນ ແລະ ມີຄວາມກ້າວໜ້າຍິງຂຶ້ນຕື່ມ. ການພົບປະແລກປ່ຽນບົດຮຽນໃນຄັ້ງນີ້ເຖິງເວລາຈະສັ້ນ ແຕ່ເນື້ອໃນການພົບປະແລກປ່ຽນບົດຮຽນແມ່ນເລິກເຊິ່ງ ແລະ ອຸດົມສົມບູນ, ໄດ້ຕີລາຄາສູງຕໍ່ກັບການພົບປະແລກປ່ຽນບົດຮຽນກ່ຽວກັບວຽກງານກໍ່ ສ້າງພັກ-ພະນັກງານ ແລະ ວຽກງານປັບປຸງກົງຈັກການຈັດຕັ້ງໃນຄັ້ງນີ້ ເປັນການຢັ້ງຢືນເຖິງຄວາມສາມັກຄີຜູກພັນອັນເປັນມູນເຊື້ອຂອງສອງຄະນະຈັດຕັ້ງແຂວງ ໃນການປະຕິບັດພາລະບົດບາດການເປັນເສນາທິການໃຫ້ແກ່ຄະນະພັກແຂວງ.