ຂ່າວ ໂດຍ: ພອນສະຫວັນ

     ໃນວັນທີ 23 ສິງຫາ 2023 ຄະນະຈັດຕັ້ງສູນກາງພັກ ໄດ້ຈັດຝຶກອົບຮົມສ້າງຄວາມເຂັ້ມແຂງໃຫ້ພະນັກງານນຳພາ-ຄຸ້ມຄອງຂະແໜງຈັດຕັ້ງ ຂອງ ສປປ ລາວ, (Training on Strengthening Leadership Skill and Administration of Lao People’s Revolutionary Party (LPRP) Central Committee’s Organization Board) ຊຸດທີ I ທີ່ແຂວງບໍລິຄຳໄຊ ໂດຍການເປັນປະທານ ຂອງສະຫາຍ ນາງ ບຸດສະດີ ທະນະເມືອງ ກຳມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະຈັດຕັ້ງສູນກາງພັກ ແລະ ສະຫາຍ ວັນວິໄລ ແດນພູຫຼວງ, ຮອງເລຂາພັກແຂວງ, ຜູ້ຊີ້ນຳວຽກງານການເມືອງ, ແນວຄິດ, ວຽກງານພັກ-ພະນັກງານ ແຂວງບໍລິຄຳໄຊ, ມີຄະນະຮັບຜິດຊອບໂຄງການສ້າງຄວາມເຂັ້ມແຂງໃຫ້ພະນັກງານນຳພາ-ຄຸ້ມຄອງ ຂະແໜງຈັດຕັ້ງ ຂອງ ສປປ ລາວ, ມີວິທະຍາກອນ ຈາກຄະນະຈັດຕັ້ງສູນກາງພັກ ຈຳນວນ 19 ສະຫາຍ ແລະ ນັກສຳມະນາກອນທີ່ຈາກບັນດາເມືອງອ້ອມຂ້າງແຂວງບໍລິຄຳໄຊ ຈຳນວນ 48 ສະຫາຍ.

     ຊຸດຝຶກອົບຮົມໃນຄັ້ງນີ້ ແມ່ນແນໃສ່ພັດທະນາຊັບພະຍາກອນມະນຸດຂະແໜງຈັດຕັ້ງ ເຊິ່ງແມ່ນໜຶ່ງວຽກງານຈຸດສຸມ ຂອງຄະນະຈັດຕັ້ງສູນກາງພັກ  ເພື່ອສ້າງຄວາມເຂັ້ມແຂງໃຫ້ພະນັກງານນໍາພາ-ຄຸ້ມຄອງຂະແໜງຈັດຕັ້ງ ຂອງ ສປປ ລາວ, ໂຄງການດັ່ງກ່າວໄດ້ຮັບການສະໜັບສະໜູນໂດຍກອງທຶນຄວາມຮ່ວມມືພິເສດ ແມ່ນ້ຳຂອງ-ແມ່ນ້ຳລ້ານຊ້າງ (Lancang-Mekhong Cooperation Special Fund).  ຜ່ານການຝຶກອົບຮົມຈະເຮັດໃຫ້ ພະນັກງານນຳພາ-ຄຸ້ມຄອງ ໃນຂະແໜງການຈັດຕັ້ງຂອງແຂວງບໍລິຄຳໄຊ ເວົ້າລວມ, ເວົ້າສະເພາະ ແມ່ນສ້າງຄວາມຮັບຮູ້ເຂົ້າໃຈ ແລະ ຄວາມສາມາດໄປຈັດຕັ້ງປະຕິບັດຕົວຈິງ ຂອງພະນັກງານຂົງເຂດວຽກງານຈັດຕັ້ງ, ເນື້ອໃນຫຼັກສູດ, ຄູ່ມືຝຶກອົບຮົມປະກອບມີ ຈຳນວນ 20 ບົດ ຄື: 1. ທັດສະນະຂອງພັກຕໍ່ພະນັກງານ ແລະ ວຽກງານພະນັກງານ, 2. ລະບົບການເມືອງ ຂອງ ສປປ ລາວ, 3. ຄວາມຮູ້ພື້ນຖານກ່ຽວກັບວຽກງານຈັດຕັ້ງ ແລະ ການສ້າງໂຄງຮ່າງການຈັດຕັ້ງ, 4. ການກະກຽມ ແລະ ດຳເນີນກອງປະຊຸມໃຫຍ່ຂອງພັກ, 5. ທີ່ຕັ້ງ, ພາລະບົດບາດ, ໜ້າທີ່, ສິດ ຂອງຄະນະຈັດຕັ້ງແຕ່ລະຂັ້ນ, 6. ຄວາມຮູ້ພື້ນຖານກ່ຽວກັບວຽກງານກວດກາ, 7. ການດຳເນີນຊີວິດໜ່ວຍພັກ, 8. ແບບແຜນນຳພາ ແລະ ຫຼັກການລວມສູນປະຊາທິປະໄຕຂອງພັກ, 9. ການສ້າງແຜນກຳນົດພະນັກງານ, 10. ວຽກງານຄຸ້ມຄອງພະນັກງານ, 11. ຄວາມຮູ້ພື້ນຖານກ່ຽວກັບວຽກງານໂຄສະນາກໍ່ສ້າງພັກ-ພະນັກງານ, 12. ການສ້າງແຜນກໍ່ສ້າງ-ບຳລຸງພະນັກງານ, 13. ວຽກງານຄົ້ນຄວ້າສັງລວມ, 14. ການຄຸ້ມຄອງເອກະສານກ່ຽວກັບວຽກງານຈັດຕັ້ງ, 15. ທັດສະນະຂອງພັກຕໍ່ວຽກງານກໍ່ສ້າງພັກ, 16. ການສ້າງມາດຕະຖານພະນັກງານ, 17. ຄວາມຮູ້ພື້ນຖານກ່ຽວກັບວຽກງານປ້ອງກັນພັກ-ພະນັກງານ, 18, ຍົກສູງຄຸນນະພາບການຈັດຕັ້ງຮາກຖານພັກ, 19. ຍົກສູງຄຸນນະພາບສະມາຊິກພັກ ແລະ ວຽກງານຂະຫຍາຍພັກ, 20. ວຽກງານຄຸ້ມຄອງສະມາຊິກພັກ.

     ໃນໂອກາດດັ່ງກ່າວ ສະຫາຍ ນາງ ບຸດສະດີ ທະນະເມືອງ ກໍໄດ້ມີຄຳເຫັນເນັ້ນໜັກມາຍັງ ຄະນະຮັບຜິດຊອບ, ວິທະຍາກອນ ໂດຍສະເພາະພະນັກງານຫຼັກແຫຼ່ງທີ່ເຂົ້າຮ່ວມ ຈົ່ງມີຄວາມຮັບຜິດຊອບສູງ ແລະ ເອົາໃຈໃສ່ຄົ້ນຄວ້າເນື້ອໃນເອກະສານ, ຮັບຟັງການບັນລະຍາຍຈາກວິທະຍາກອນຢ່າງຕັ້ງໜ້າ, ມີຄວາມເຂົ້າໃຈຢ່າງເລິກເຊິ່ງ ເພື່ອນຳໄປຂະຫຍາຍເຂົ້າໃນໜ້າທີ່ການເມືອງຂອງຕົນ ມີຜົນສຳເລັດ ແລະ ປະສິດທິພາບສູງ ຊຸດຝຶກອົບຮົມໃນຄັ້ງນີ້ ຈະດຳເດີນເປັນເວລາ 15 ວັນ, ນັບແຕ່ ວັນທີ 23 ສິງຫາ ເຖິງ ວັນທີ 6 ກັນຍາ 2023 ຈິ່ງຈະສໍາເລັດ.