ພາບ: ​ແສງ​ຄຳ; ໂດຍ: ສ.ສົດ​ໃສ

​    ໃນ​ວັນ​ທີ 7 ກັນຍາ 2023 ທີ່​ຫ້ອງ​ປະຊຸມ​ໃຫຍ່​ໂຮງໝໍ​ມິດຕະພາບ ກະຊວງ​ສາທາລະນະ​ສຸກ ​​ໄດ້​ຈັດ​ກອງ​ປະຊຸມ​ເຜີຍ​ແຜ່, ​ເຊື່ອມຊຶມ ມະຕິ​ກອງປະຊຸມ​ຄົບ​ຄະນະ​ບໍລິຫານ​ງານ​ສູນ​ກາງ​ພັກ ຄັ້ງ​ທີ 6 ສະ​ໄໝ​ທີ XI; ຄຳ​ສັ່ງ ຂອງ​ຄະນະ​ເລຂາທິການ​ສູນ​ກາງພັກ ສະບັບ​ເລກທີ 411/ຄລສພ ວ່າດ້ວຍ​ການ​ກະກຽມ ​ແລະ ດຳ​ເນີນ​ກອງ​ປະຊຸມ 3 ຂັ້ນ​ຂອງ​ພັກ; ຄຳ​ແນະນຳ​ຂອງ​ຄະນະ​ຈັດ​ຕັ້ງ​ສູນ​ກາງ​ພັກ ສະບັບ​ເລກທີ 211/ຄຈສພ ກ່ຽວ​ກັບ​ການຈັດ​ຕັ້ງ​ປະຕິບັດ ຄຳ​ສັ່ງ​ຂອງ​ຄະນະ​ເລຂາທິການ​ສູນ​ກາງ​ພັກ. ​ໂດຍ​​ການ​ເປັນ​ປະທານ​ຂອງສະຫາຍ ປອ.ດຣ ບຸນ​ແຝງ ພູມ​ມະ​ໄລ​ສິດ, ກຳມະການ​ສູນ​ກາງ​ພັກ, ​ເລຂາ​ຄະນະ​ພັກ​ກະຊວງ, ລັດຖະມົນ​ຕີກະຊວງ​ສາທາລະນະ​ສຸກ, ມີ​ຄະນະ​ພັກ​ກະຊວງ, ຄະນະ​ພັກ​ຮາກ​ຖານ, ຄະນະ​ໜ່ວຍ​ພັກ​ຮາກ​ຖານ; ​ເລຂາ ​ແລະ ປະທານ​ຂອງ​ສາມ​ອົງການ​ຈັດ​ຕັ້ງ​ມະຫາຊົນ ຂັ້ນ​ກະຊວງ, ສະມາຊິກ​ພັກ​ສົມບູນ ທີ່​ມີ​ຕຳ​ແໜ່​ງບໍລິຫານ​ປະ​ເພດ 3 ຂັ້ນ​ຮອງ​ກົມ ​ແລະ ທຽບ​​ເທົ່າ ​ເຂົ້າ​ຮ່ວມ​ທັງ​ໝົດ ຈຳນວນ 200 ກວ່າ​ສະຫາຍ, ຍິງ 125 ສະຫາຍ.   

    ຜູ້​ເຂົ້າ​ຮ່ວມ​ກອງ​ປະຊຸມ ​ໄດ້​ຮັບ​ຟັງ​ການ​ເຜີຍ​ແຜ່ ​ເຊື່ອມ​ຊຶມ ມະຕິກອງ​ປະຊຸມ​ຄົບ​ຄະນະ​ບໍລິຫານ​ງານ​ສູນ​ກາງ​ພັກ ຄັ້ງ​ທີ 6 ສະ​ໄໝ​ທີ XI ​ສະ​ເໜີ​ໂດຍ ສະຫາຍ ປອ.ດຣ ບຸນ​ແຝງ ພູມ​ມະ​ໄລ​ສິດ ​ເຊິ່ງ​ໄດ້​ໃຫ້​ຮູ້​ຕໍ່ 07 ບັນຫາ​ສຳຄັນ ຄື:

1. ຕີ​ລາຄາ​ການຈັດ​ຕັ້ງ​ປະຕິບັດ​ແຜນ​ພັດທະນາ​ເສດຖະກິດ-ສັງຄົມ​ແຫ່ງ​ຊາດ, ​ແຜນ​ງົບປະມານ ​ແລະ ​ແຜນ​ເງິນຕາ 6 ​ເດືອນ​ຕົ້ນ​ປີ ​ແລະ ຄາດ​ຄະ​ເນ ​ແຜນ​ຈຸດ​ສຸມ 6 ​ເດືອນ​ທ້າຍ​ປີ 2023 ຕິດ​ພັນ​ກັບ​ການຈັດ​ຕັ້ງ​ປະຕິບັດ 2 ວາລະ​ແຫ່ງ​ຊາດ;
2. ຕີ​ລາຄາ​ການ​ເພີ່ມ​ທະວີ​ວຽກ​ງານ​ປ້ອງ​ກັນ​ຄວາມ​ສະຫງົບ ​ໃນ​ສະພາບ​ການ​ໃໝ່ ​ແລະ ທິດ​ທາງ​ແຜນການ​ໃນ​ຕໍ່ໜ້າ;
3. ຕີ​ລາຄາ​ການຈັດ​ຕັ້ງປະຕິບັດ​ວຽກ​ງານ​ການ​ພົວພັນ​ຄົນ​ເຊື້ອ​ຊາດ​ລາວ ຢູ່​ຕ່າງ​ປະ​ເທດ ​ແຕ່​ໄລຍະ​ປີ 2007-2022 ​ແລະ ທິດ​ທາງ​ໃນ​ຕໍ່ໜ້າ;
4. ການກະກຽມ ​ແລະ ດຳ​ເນີນ​ກອງ​ປະຊຸມ​ໃຫຍ່ 3 ຂັ້ນຂອງ​ພັກ;
5. ການ​ສືບ​ຕໍ່​ຍູ້​ແຮງ ການ​ຜັນ​ຂະຫຍາຍ​ແນວທາງ​ການ​ປ່ຽນ​ແປງ​ໃໝ່​ສູ່​ລວງ​ເລິກ, ການ​ສ້າງ​ການ​ຫັນປ່ຽນ​ທີ່​ແຂງ​ແຮງ, ​ເລິກ​ເຊິ່ງ ​ແລະ ຮອບດ້ານ​ໃນ​ການ​ນຳພາ​ຂອງ​ພັກ;
6. ຄະນະ​ບໍລິ​ຫານງານ​ສູນ​ກາງ​ພັກ ​ໄດ້​ຄົ້ນຄວ້າ ​ແລະ ປະກອບ​ຄຳ​ເຫັນ ຕໍ່​ໂຄງ​ຮ່າງ​ໂຄງການ​ການ​ເມືອງ ​ເພື່ອ​ກຳນົດ​ວິ​ໄສ​ທັດ​ຍຸດ​ທະ​ສາດ​ຍາວ​ນານ ຂອງ​ການ​ປະຕິວັດ​ຂອງ​ພັກ​ເຮົາ, ກຳນົດ​ຈຸດໝາຍ, ​ເສັ້ນທາງ​ກ້າວ​ເດີນ ຂອງ​ປະ​ເທດ​ຊາດ​ໃນ​ແຕ່ລະ​ໄລຍະ ​ເພື່ອ​ສືບ​ຕໍ່​ນຳພາ​ບັນລຸ​ຕາມ​ອຸດົມ​ການ​ຂອງ​ພັກ ກໍ່​ຄືຄວາມ​ມຸ້ງ​ມາດ​ປາດ​ຖະໜາ​ຂອງ​ປະຊາຊົນ​ລາວ;
7. ກອງ​ປະຊຸມ​ໄດ້​ວາງ​ວຽກ​ງານ​ຈຸດ​ສຸມ ​ໃນ​ການ​ນຳພາ-ຊີ້​ນຳ ​ແຕ່​ນີ້​ຮອດ​ກອງ​ປະຊຸມ​ຄົບ​ຄະນະ​ບໍລິຫານ​ງານ​ສູນ​ກາງ​ພັກ ຄັ້ງ​ທີ 7 ສະ​ໄໝ​ທີ XI

    ຈາກ​ນັ້ນ, ປະທານ​ກອງ​ປະຊຸມ​ ຍັງ​ໄດ້​ເຜີຍ​ແຜ່ຄຳ​ສັ່ງ​ຂອງ​ຄະນະ​ເລຂາທິການ​ສູນ​ກາງ​ພັກ ສະບັບ​ເລກທີ 411/ຄລສພ ວ່າ​ດ້ວຍ​ການ​ກະກຽມ ​ແລະ ດຳ​ເນີນ​ກອງ​ປະຊຸມ 3 ຂັ້ນ​ຂອງ​ພັກ, ສະຫາຍ ດຣ ​ໄພ​ວັນ ​ແກ້ວ​ປະ​ເສີດ ກຳມະການ​ປະຈຳ​ພັກກະຊວງ, ປະທານ​ກວດກາ​ພັກ​ກະຊວງ, ຮອງ​ລັດຖະມົນຕີກະຊວງ​ສາ​ທາ​ລະນະ​ສຸກ​ ຂຶ້ນ​ເຜີຍ​ແຜ່ຄຳ​ແນະນຳ ​ຂອງ​ຄະນະ​ຈັດ​ຕັ້ງ​ສູນ​ກາງ​ພັກ ສະບັບ​ເລກທີ 211/ຄຈສພ ກ່ຽວ​ກັບ​ການຈັດຕັ້ງ​ປະຕິບັດ ຄຳ​ສັ່ງ​ຂອງ​ຄະນະ​ເລຂາທິການ​ສູ​ນກາງ​ພັກ.

    ການ​ເຊື່ອມ​ຊຶມ​ຄັ້ງນີ້ ບົນ​ຈິດ​ໃຈ​ຍູ້​ແຮງ​ການຈັດ​ຕັ້ງ​ຜັນ​ຂະຫຍາຍ​ມະຕິ​ກອງ​ປະຊຸມ​ໃຫຍ່​ຂອງ​ພັກ ຄັ້ງ​ທີ XI ​ແລະ ມະຕິ​ກອງ​ປະຊຸມ​ໃຫຍ່​ຈັດ​ຕັ້ງ​ທົ່ວ​ປະ​ເທດ ຄັ້ງ​ທີ XI ​ໃຫ້​ບຸນ​ລຸຜົນສຳ​ເລັດດ້ວຍ​ປະສິດທິພາບ ​ແລະ ປະສິດ​ທິຜົນ​ສູງ.