ຂ່າວ: ອານຸລັກ

     ໃນວັນທີ 06 ກັນຍາ 2023 ຄະນະຈັດຕັ້ງສູນກາງພັກໄດ້ປິດການຝຶກອົບຮົມສ້າງຄວາມເຂັ້ມແຂງໃຫ້ແກ່ພະນັກງານນໍາພາ-ຄຸ້ມຄອງ ຂະແໜງການຈັດຕັ້ງ ທີ່ແຂວງບໍລິຄໍາໄຊ, ໂດຍການເປັນປະທານຂອງສະຫາຍ ນາງ ບຸດສະດີ ທະນະເມືອງ ກໍາມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະຈັດຕັ້ງສູນກາງພັກ ແລະ ສະຫາຍ ວັນວິໄລ ແດນພູຫຼວງ, ຮອງເລຂາພັກແຂວງ, ຜູ້ຊີ້ນໍາວຽກງານການເມືອງ-ແນວຄິດ, ວຽກງານພັກ-ພະນັກງານ ແຂວງບໍລິຄໍາໄຊ; ມີສະຫາຍ ຮສ ປອ ໄກສອນ ເພັງໂສພາ ຮອງຄະນະພັກຮາກຖານ ສໍານັກງານອະທິການບໍດີ ຫົວໜ້າຫ້ອງການຫຼັງປະລິນຍາຕີ ມະຫາວິທະຍາໄລແຫ່ງຊາດ, ມີບັນດາຄະນະສະຫາຍຮອງເລຂາພັກເມືອງ ຄະນະປະຈໍາພັກ ຫົວໜ້າຄະນະຈັດຕັ້ງເມືອງ ຮອງຫົວໜ້າຄະນະຈັດຕັ້ງແຂວງ, ມີວິທະຍາກອນຈາກຄະນະຈັດຕັ້ງສູນກາງພັກ ແລະ  ສໍາມະນາກອນ ຈໍານວນໜຶ່ງເຂົ້າຮ່ວມ.

     ການຝຶກອົບຮົມໃນຄັ້ງນີ້ ມີການບັນຍາຍບົດສອນ ທັງໝົດ 20 ບົດ ປະກອບມີ: ບົດກ່ຽວກັບວຽກງານພັກຈໍານວນ 7 ບົດ, ວຽກງານພະນັກງານຈໍານວນ 5 ບົດ, ວຽກງານປັບປຸງກົງຈັກ 4 ບົດ ແລະ ບົດປິ່ນອ້ອມ 4 ບົດ; ເປັນການຍົກ​ໃຫ້​ເຫັນດ້ານທິດ​ສະ​ດີ, ຫຼັກການ, ​ແນວທາງ​ຂອງ​ພັກ-ນະ​ໂຍບາຍ​ຂອງ​ລັດ ​ແລະ ພຶດຕິ​ກຳ​ ກ່ຽວກັບວຽກງານກໍ່ສ້າງພັກ, ພະນັກງານ ແລະ ປັບປຸງກົງຈັກການຈັດຕັ້ງ ເພື່ອໃຫ້ບັນດານັກສໍາມະນາກອນໄດ້ຮັບຮູ້ທາງດ້ານພື້ນຖານກ່ຽວກັບທິດສະດີ​ລວມ ​ແລະ ທິດ​ສະ​ດີ​ວຽກ​ງານ​ຈັດ​ຕັ້ງ​ກໍ່ສ້າງ​ພັກ-ພະນັກງານ​. ນອກນີ້, ​ຍັງ​ເປັນ​ໂອກາດ​ໃຫ້​ຜູ້​ເຂົ້າ​ຮ່ວມ​ໄດ້​ແລກປ່ຽນ​ບົດຮຽນ, ປະສົບການຕົວຈິງພາຍໃນຫ້ອງ ປະກອບສ່ວນມີຄຳຄິດ-ຄຳເຫັນແລກປ່ຽນສົນທະນາບົດຮຽນຢ່າງກົງໄປກົງມາ ເຮັດໃຫ້ວິທະຍາກອນກໍາແໜ້ນບັນຫາຂອງທ້ອງຖິ່ນເພື່ອປັບປຸງເນື້ອໃນບົດສອນຂອງຕົນໃຫ້ສອດຄ່ອງກັບຄວາມເປັນຈິງ ແລະ ປະສົບການຕົວຈິງຈາກທ້ອງຖິ່ນຮາກຖານ.

     ໃນຕອນທ້າຍຂອງການຝຶກອົບຮົມ ທ່ານ ນາງ ບຸດສະດີ ທະນະເມືອງ ກໍາມະການສູນກາງພັກ, ຮອງເລຂາຄະນະພັກ, ຮອງຫົວໜ້າຄະນະຈັດຕັ້ງສູນກາງພັກ ໄດ້ມອບໃບຢັ້ງຢືນໃຫ້ແກ່ນັກສໍາມະກອນ ທັງໝົດ 44 ສະຫາຍ, ຍິງ 17 ສະຫາຍ ພ້ອມທັງມີຄໍາເຫັນໂອ້ລົມເຊິ່ງໄດ້ເນັ້ນໜັກໃຫ້ນັກສໍາມະນາກອນຈົ່ງສືບຕໍ່ຄົ້ນຄວ້າ, ກໍາແໜ້ນບົດຮຽນວຽກງານຈັດຕັ້ງ, ກໍ່ສ້າງພັກ-ພະນັກງານ ທີ່ໄດ້ນໍາມາຝຶກອົບຮົມໃນຄັ້ງນີ້ໃຫ້ເລິກເຊິ່ງ ເພື່ອນໍາໄປໝູນໃຊ້ເຂົ້າໃນວຽກງານຕົວຈິງຂອງແຕ່ລະສະຫາຍໃຫ້ມີປະສິດທິຜົນສູງ ເຊິ່ງຈະເປັນການປະກອບສ່ວນອັນສໍາຄັນເຂົ້າໃນການຍົກສູງຄຸນນະພາບວຽກງານຈັດຕັ້ງ, ກໍ່ສ້າງພັກ-ພະນັກງານ ຢູ່ຂັ້ນຮາກຖານໃຫ້ເປັນມືອາຊີບເທື່ອລະກ້າວ. ພ້ອມທັງສະເໜີມາຍັງຄະນະພັກ-ຄະນະນຳຂອງແຂວງບໍລິຄໍາໄຊ ສືບຕໍ່ເອົາບົດຮຽນໃນຄັ້ງນີ້ຜັນຂະຫຍາຍ ແລະ ຝຶກອົບຮົມໃຫ້ແກ່ພະນັກງານທີ່ເຮັດວຽກງານຈັດຕັ້ງຢູ່ບັນດາພະແນກການຂອງແຂວງ, ຫ້ອງການຂອງເມືອງ ແລະ ວິຊາການທີ່ເຮັດວຽກງານຈັດຕັ້ງທີ່ຢູ່ໃນຄວາມຮັບຜິດຊອບຂອງຕົນ; ໃນຂ້າງຫນ້າທາງຄະນະຈັດຕັ້ງສູນກາງພັກຈະໄດ້ລົງມາປະເມີນຜົນວຽກງານພາຍຫຼັງທີ່ໄດ້ຝຶກອົບຮົມແລ້ວປະສິດທິຜົນຂອງວຽກງານຈັດຕັ້ງໄດ້ຮັບການພັດທະນາຂຶ້ນ ຫຼື ບໍ່, ຖ້າມີປະສິດທິຜົນໂຄງການຝຶກອົບຮົມພະນັກງານຈັດຕັ້ງພວກເຮົາກໍ່ຈະໄດ້ຮັບການສະໜັບສະໜູນຂຶ້ນໄປເລື້ອຍໆ.