ຂ່າວ: ວິລະສະໄໝ ຍົດບຸນມີ
ພາບ: ພິດສະໄໝ ວິໄລຮັກ
ໃນວັນທີ 29 ກັນຍາ 2023 ທີ່ຫ້ອງປະຊຸມສູນກາງສະຫະພັນແມ່ຍິງລາວ ໄດ້ຈັດກອງປະຊຸມທົ່ວອົງຄະນະພັກ ສູນກາງສະຫະພັນແມ່ຍິງລາວ ປະຈຳໄຕມາດ Ⅲ ປີ 2023 ໂດຍການເປັນປະທານ ຂອງສະຫາຍ ນ. ອິນລາວັນ ແກ້ວບຸນພັນ ກຳມະການສູນກາງພັກ, ເລຂາຄະນະບໍລິຫານງານພັກ, ປະທານຄະນະບໍລິຫານງານສູນກາງສະຫະພັນແມ່ຍິງລາວ ມີຄະນະປະຈຳພັກ, ຄະນະບໍລິຫານງານພັກ, ຄະນະໜ່ວຍພັກກົມ, ສູນ, ສະມາຊິກພັກ ພ້ອມດ້ວຍພະນັກງານ-ລັດຖະກອນ ສູນກາງສະຫະພັນແມ່ຍິງລາວ ເຂົ້າຮ່ວມ.
ກອງປະຊຸມດັ່ງກ່າວໄດ້ຮັບຟັງ ການຜ່ານບົດສະຫຼຸບການຈັດຕັ້ງປະຕິບັດມະຕິກອງປະຊຸມ ຄະນະພັກກາງສະໄໝ ສະໄໝ Ⅳ ຂອງຄະນະບໍລິຫານງານພັກ ສສຍລ, ບົດໂອ້ລົມ ຂອງສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດຕໍ່ກອງປະຊຸມເປີດກວ້າງ, ຄຳສັ່ງສະບັບເລກທີ 411/ຄລສພ, ລົງວັນທີ 8 ສິງຫາ 2023 ວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ, ຄຳແນະນຳສະບັບເລກທີ 211/ຄຈສພ, ລົງວັນທີ 16 ສິງຫາ 2023 ກ່ຽວກັບການຈັດຕັ້ງປະຕິບັດຄຳສັ່ງຂອງຄະນະທິການສູນກາງພັກ ວ່າດ້ວຍ ການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ສະເໜີໂດຍ ສະຫາຍ ນ. ທຳມາ ເພັດວິໄຊ ຮອງເລຂາຄະນະພັກ, ຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ, ຫຼັງຈາກນັ້ນ ສະຫາຍ ນ. ເຫຼັກ ແສນຄຳວົງສາ ກຳມະການປະຈຳພັກ ໄດ້ຂຶ້ນຜ່ານຄຳແນະນຳວ່າດ້ວຍການກະກຽມ ດຳເນີນກອງປະຊຸມໃຫຍ່ 3 ຂັ້ນ ຂອງສະຫະພັນແມ່ຍິງ.
ໃນຕອນທ້າຍຂອງພິທີ ສະຫາຍ ນ. ອິນລາວັນ ແກ້ວບຸນພັນ ກຳມະການສູນກາງພັກ, ເລຂາຄະນະບໍລິຫານງານພັກ, ປະທານຄະນະບໍລິຫານງານສູນກາງສະຫະພັນແມ່ຍິງລາວ ໄດ້ເຜີຍແຜ່ເຊື່ອມຊຶມເອກະສານສຳຄັນຂອງສູນກາງພັກຕື່ມອີກຈຳນວນໜຶ່ງ.
