ໂດຍ: ອານຸລັກ

     ຄະນະໂຄສະນາອົບຮົມສູນກາງພັກ ຈັດຊຸດຝຶກອົບຮົມວຽກງານໂຄສະນາຜ່ານສື່ ແລະ ຜູ້ດໍາເນີນລາຍການວິທະຍຸ-ໂທລະພາບ ທີ່ຫ້ອງປະຊຸມໂຕະມົນ ຊັ້ນ 2 ຂອງ ຄອສພ ໂດຍການເປັນປະທານຂອງທ່ານ ນາງ ວິລະວອນ ພັນທະວົງ ຄະນະປະຈໍາພັກ ຮອງຫົວໜ້າ ຄະນະໂຄສະນາອົບຮົມສູນກາງພັກ, ປະທານກວດກາ; ມີທ່ານ ວັນໄຊ ຕະວິນຍານ ຄະນະພັກ ຮອງຫົວໜ້າຄະນະໂຄສະນາອົບຮົມສູນກາງພັກ ຫົວໜ້າບັນນາທິການໃຫຍ່ ໜັງສືພິມປະຊາຊົນ, ຫົວໜ້າກົມ, ຮອງຫົວໜ້າກົມ, ຫົວໜ້າພະແນກ, ຮອງຫົວໜ້າພະແນກ, ພະນັກງານວິຊາການ ແລະ ມາຈາກ 03 ພາກສ່ວນພາຍນອກຄື: ວາລະສານກໍ່ສ້າງພັກ, ວາລະສານກວດກາ, ວາລະສານປ້ອງກັນຊາດ ລວມທັງໝົດ 30 ສະຫາຍ.

     ການຈັດຝຶກອົບຮົມໃນຄັ້ງນີ້ ໃຊ້ເວລາ 4 ວັນ ໂດຍປະກອບມີບົດຮຽນທັງໝົດ 07 ບົດຄື: 1. ບົດຮຽນ, ເຕັກນິກ, ທັກສະການເປັນໂຄສົກລາຍການວິທະຍຸ; 2. ບົດຮຽນການຂຽນຂ່າວອອກໜັງສືພິມ ແລະ ເວັບໄຊ້; 3. ບົດຮຽນ, ເຕັກນິກ ແລະ ທັກສະການເປັນໂຄສົກລາຍການໂທລະພາບ; 4. ການຕັດຕໍ່ວິດີໂອ; 5. ການນໍາໃຊ້ ແລະ ການຖ່າຍວິດີໂອ; 6. ບົດຮຽນການຂຽນບົດອອກວາລະສານ ແລະ ລາຍການວິທະຍຸກະຈາຍສຽງ; 7. ເຕັກນິກການນໍາໃຊ້ກ້ອງຖ່າຍຮູບ ແລະ ການຖ່າຍຮູບນິ້ງ. ເຊິ່ງການຈັດຝຶກອົບຮົມ ວຽກງານໂຄສະນາຜ່ານສື່ໃນຄັ້ງນີ້ ໄດ້ເຮັດໃຫ້ນັກສໍາມະນາກອນຮຽນຮູ້ທັກສະ, ເຕັກນິກພື້ນຖານຂອງບົດຮຽນແຕ່ບົດ, ຮຽນຮູ້ປະສົບການຂອງນັກວິທະຍາກອນ ແລກປ່ຽນຄໍາຄິດເຫັນ , ຕັ້ງຄໍາຖາມ-ຕອບຕິດພັນກັບການຍົກເອົາພຶດຕິກໍາຕົວຈິງມາປະກອບເຂົ້າໃນການສະເໜີເນື້ອໃນໃຫ້ສົມບູນ, ເຈາະຈິ້ມບັນດາບັນຫາທີ່ສົນໃຈ ພ້ອມທັງໄດ້ຮັບຄໍາແນະນໍາທີ່ດີຈາກນັກວິທະຍາກອນ.

     ໃນຕອນທ້າຍຂອງການຝຶກອົບຮົມ ທ່ານ ນາງ ວິລະວອນ ພັນທະວົງ ຄະນະປະຈໍາພັກ ຮອງຫົວໜ້າ ຄະນະໂຄສະນາອົບຮົມສູນກາງພັກ ປະທານກວດກາ ໄດ້ມີຄໍາເຫັນຕໍ່ພິທີວ່າ: ການຝຶກອົບຮົມຄັ້ງນີ້ ເປັນຜົນສໍາເລັດການຝຶກໃນຂັ້ນຕົ້ນຂອງການເປັນສື່ ແຕ່ກໍ່ຍັງມີຂໍ້ຄົງຄ້າງທີ່ເຮົາຍັງໄດ້ສືບຕໍ່ປັບປຸງວຽກໂຄສະນາໃຫ້ມີຄຸນນະພາບ, ສືບຕໍ່ຮຽນຮູ້ຄົ້ນຄວ້າຮໍ່າຮຽນໃຫ້ຕົນເອງ, ສືບຕໍ່ຄົ້ນຄວ້າສ້າງຕົນເອງໃຫ້ເປັນນັກວິທະຍາກອນ, ນັກໂຄສົກ, ນັກຂຽນ... ຮອບດ້ານຂອງການເປັນສື່ມວນຊົນ, ໃນຂ້າງໜ້າຄວນຈະມີການເປີດຝຶກອົບຮົມໃຫ້ກວ້າງຂວາງກວ່າເກົ່າ; ຂໍສະແດງຄວາມຂອບໃຈມາຍັງວິທະຍາກອນທັງໝົດທີ່ໄດ້ຖ່າຍທອດບົດຮຽນປະສົບການໃຫ້ແກ່ນັກຝຶກອົບຮົມ, ຊົມເຊີຍຄະນະຮັບຜິດຊອບທີ່ຈັດຕັ້ງປະຕິບັດການຝຶກອົບຮົມຄັ້ງນີ້ໄດ້ເກີດຂຶ້ນ ແລະ ສໍາເລັດຕາມຄາດໝາຍທີ່ໄດ້ວາງໄວ້,ຊົມເຊີຍບັນດານັກຝຶກອົບຮົມທຸກຄົນທີ່ໄດ້ພ້ອມກັນເຂົ້າຮ່ວມຝຶກອົບຮົມໃນຊຸດນີ້ໄດ້ຢ່າງສຸດກົດສຸດປາຍ; ສືບຕໍ່ລົງເລິກວຽກງານສື່ໃນການພັດທະນາວຽກງານໂຄສະນາອົບຮົມໄປສູ່ຍຸກດິຈິຕອນ ຕາມແນວທາງຂອງພັກວາງໄວ້; ສືບຕໍ່ຈັດຕັ້ງພາລະບົດບາດວຽກງານວິຊາສະເພາະ, ນໍາເອົາບົດຮຽນທີ່ຝຶກອົບຮົມໃນຄັ້ງນີ້ໄປໝູນໃຊ້ເຂົ້າໃນວຽກງານຕົວຈິງໃຫ້ ເໝາະສົມ ແລະ ມີການພັດທະນາຍິ່ງຂຶ້ນ.