ໂດຍ: ວິລະສະໄໝ ຍົດບຸນມີ
ເພື່ອຈັດຕັ້ງຜັນຂະຫຍາຍເນື້ອໃນຈິດໃຈກອງປະຊຸມສະຫຼຸບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງທົ່ວປະເທດ ປະຈຳປີ 2023, ຄະນະບໍລິຫານງານພັກທະນາຄານແຫ່ງ ສປປ ລາວ (ທຫລ) ຈຶ່ງໄດ້ດຳເນີນກອງປະຊຸມສະຫຼຸບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ປະຈຳປີ 2023 ຂອງຕົນ ຂຶ້ນຢ່າງເປັນທາງການ ໃນວັນທີ 21 ມີນາ 2024 ເປັນເວລາເຄິ່ງວັນ ທີ່ຫ້ອງປະຊຸມສຳນັກງານໃຫຍ່ຂອງ ທຫລ ພາຍໃຕ້ການເປັນປະທານຂອງ ສະຫາຍ ນາງ ວັດທະນາ ດາລາລອຍ ຮອງເລຂາຄະນະບໍລິຫານງານພັກ, ປະທານຄະນະກວດກາພັກ ທຫລ, ມີສະຫາຍຕາງໜ້າຈາກຄະນະຈັດຕັ້ງສູນກາງພັກ, ບັນດາສະຫາຍ ຄະນະບໍລິຫານງານພັກ ທຫລ, ຄະນະໜ່ວຍພັກ-ຄະນະພັກຮາກຖານ, ພະນັກງານຫຼັກແຫຼ່ງນຳພາ ແລະ ຜູ້ຮັບຜິດຊອບວຽກງານຈັດຕັ້ງ ເຂົ້າຮ່ວມ 100 ກວ່າສະຫາຍ.
ການດຳເນີນກອງປະຊຸມຄັ້ງນີ້ ແນໃສ່ເພື່ອເຮັດໃຫ້ຖັນແຖວສະມາຊິກພັກ-ພະນັກງານຫຼັກແຫຼ່ງນຳພາຂັ້ນຕ່າງໆ ໄດ້ເຊື່ອມຊຶມ ແລະ ກຳແໜ້ນຕໍ່ເນື້ອໃນສຳຄັນກອງປະຊຸມສະຫຼຸບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງທົ່ວປະເທດ ປະຈຳປີ 2023 ໂດຍສະເພາະແມ່ນ: ບົດໂອ້ລົມຂອງ ສະຫາຍ ກຳມະການກົມການເມືອງ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ຕໍ່ກອງປະຊຸມສະຫຼຸບວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງທົ່ວປະເທດ ປະຈຳປີ 2023, ຄຳແນະນຳຂອງຄະນະຈັດຕັ້ງສູນກາງພັກ ກ່ຽວກັບການປະຕິບັດມະຕິຂອງກົມການເມືອງສູນກາງພັກ ວ່າດ້ວຍການເລືອກເຟັ້ນ, ແຕ່ງຕັ້ງ, ສັບປ່ຽນໜ້າທີ່ຂອງພະນັກງານນຳພາ-ຄຸ້ມຄອງ ສະບັບເລກທີ 13/ຄຈສພ ລົງວັນທີ 11 ມັງກອນ 2024, ຄຳແນະນຳຂອງຄະນະຈັດຕັ້ງສູນກາງພັກ ກ່ຽວກັບການປະຕິບັດມະຕິຂອງກົມການເມືອງສູນກາງພັກ ວ່າດ້ວຍການຕີລາຄາພະນັກງານ ສະບັບເລກທີ 14/ຄຈສພ ລົງວັນທີ 11 ມັງກອນ 2024, ບາງເນື້ອໃນບົດສະຫຼຸບການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ທົ່ວປະເທດ ປະຈຳປີ 2023 ແລະ ທິດທາງແຜນການປີ 2024, ຕິດພັນກັບການສະຫຼຸບຕີລາຄາວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ຢູ່ອົງຄະນະພັກ ທຫລ ປະຈຳປີ 2023 ແລະ ກຳນົດທິດທາງແຜນການ ໃນປີ 2024.
ໃນໂອກາດເຂົ້າຮ່ວມເປັນປະທານກອງປະຊຸມຄັ້ງນີ້, ສະຫາຍ ນ. ວັດທະນາ ດາລາລອຍ ໄດ້ມີຄຳເຫັນເໜັ້ນໜັກຕໍ່ກອງປະຊຸມ ຮຽກຮ້ອງມາຍັງບັນດາສະຫາຍທີ່ເຂົ້າຮ່ວມກອງປະຊຸມ ເພີ່ມຄວາມຮັບຜິດຊອບໜ້າທີ່ການເມືອງ ແລະ ຍົກສູງຄວາມເປັນເຈົ້າການສືບຕໍ່ນຳເອົາເນື້ອໃນຈິດໃຈກອງປະຊຸມຄັ້ງນີ້ ນຳໄປຄົ້ນຄວ້າ ແລະ ຜັນຂະຫຍາຍຈັດຕັ້ງປະຕິບັດຕົວຈິງ ໃຫ້ເປັນຮູບປະທຳແຕ່ລະດ້ານ, ທັງມີການຊຸກຍູ້ຕິດຕາມເປັນແຕ່ລະໄລຍະ ແນໃສ່ເຮັດໃຫ້ວຽກງານຈັດຕັ້ງ, ກໍ່ສ້າງພັກ-ພະນັກງານ ຢູ່ອົງຄະນະພັກ ທຫລ ມີບາດກ້າວຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ.
