ຈຳນວນຜູ້ເຂົ້າຊົມ

   ທັງໝົດ: 12085420
wc   ປີກາຍ: 500014
wc   ປີນີ້: 575498
   ເດືອນແລ້ວ: 47520
   ເດືອນນີ້: 4582
   7 ວັນລ່າສຸດ: 1452
   ມື້ນີ້: 320
ສຳເລັດ ກອງປະຊຸມໃຫຍ່ ສະມາຊິກພັກ ຄັ້ງທີ IV ໜ່ວຍພັກ ບໍລິຫານ ຂຶ້ນກັບຄະນະພັກຮາກຖານບໍລິສັດລາວໂທລະຄົມມະນາຄົມມະຫາຊົນ
ຈຳນວນຜູ້ອ່ານ: 58
ອະນຸມັດວັນທີ: 23/04/2024

        ໃນວັນທີ 08 ເມສາ 2024, ກອງປະຊຸມໃຫຍ່ ສະມາຊິກພັກ ຄັ້ງທີ IV ຂອງໜ່ວຍພັກບໍລິຫານ ທີ່ຂຶ້ນກັບຄະນະພັກຮາກຖານ ບໍລິສັດລາວໂທລະຄົມມະນາຄົມ ມະຫາຊົນ (ລລທ) ໄດ້ຈັດຂຶ້ນຢ່າງເປັນທາງການ  ໂດຍການເຂົ້າຮ່ວມເປັນປະທານຂອງສະຫາຍ ສຸພົນ ຈັນທະວີໄຊ ຄະນະບໍລິຫານງານພັກກະຊວງ ເຕັກໂນໂລຊີ ແລະ ການສື່ສານ, ເລຂາຄະນະພັກຮາກຖານ ລລທ, ປະທານກອງປະຊຸມ, ມີຕາງໜ້າຈາກກົມຈັດຕັ້ງກະຊວງເຕັກໂນໂລຊີ ແລະ ການສື່ສານ ພ້ອມດ້ວຍສະຫາຍຄະນະປະຈໍາພັກຮາກຖານ ລລທ, ຕາງໜ້າບັນດາໜ່ວຍພັກ, ຕາງໜ້າ 3 ອົງການຈັດຕັ້ງມະຫາຊົນ, ຕາງໜ້າຫ້ອງການພັກ ແລະ ສະມາຊິກພັກສົມບູນ, ສຳຮອງຂອງໜ່ວຍພັກ ບໍລິຫານ ເຂົ້າຮ່ວມ.

        ໃນກອງປະຊຸມ, ສະຫາຍ ນາງ ​ວິໄລວັນ ຍົດໄຊວິບູນ ເລຂາໜ່ວຍພັກບໍລິຫານ ໄດ້ຂຶ້ນຜ່ານບົດລາຍງານການເມືອງ ສະຫຼຸບການເຄື່ອນໄຫວວຽກງານຂອງໜ່ວຍພັກບໍລິຫານ ໄລຍະ 5 ປີ (2019-2023) ແລະ ທິດທາງແຜນການເຄື່ອນໄຫວໃນ 5 ປີຕໍ່ໜ້າ (2024 - 2028). ໃນໄລຍະ 05 ປີຜ່ານມາ ເຖິງວ່າສະພາບການຂອງໂລກທັງຢູ່ໃນລະດັບພາກພື້ນ ແລະ ສາກົນ ເກີດມີຄວາມທ້າທາຍໃນຫຼາຍດ້ານ ເຊິ່ງມັນໄດ້ສົ່ງຜົນກະທົບຕໍ່ການພັດທະນາເສດຖະກິດ-ສັງຄົມຂອງຊາດ ເວົ້າລວມ, ເວົ້າສະເພາະ ແມ່ນໄດ້ສົ່ງຜົນກະທົບໂດຍກົງ ຕໍ່ການພັດທະນາວຽກງານ ການດໍາເນີນທຸລະກິດຂອງ ລລທ ກໍ່ຄືການບໍລິຫານຈັດການວຽກງານຂອງພະແນກບໍລິຫານ ເຖິງແນວໃດກໍຕາມ ໂດຍໄດ້ຮັບການນໍາພາ-ຊີ້ນໍາ ໂດຍກົງຈາກຄະນະພັກຮາກຖານ ລລທ  ເຮັດໃຫ້ຄະນະໜ່ວຍພັກ ສະມາຊິກພັກ-ພະນັກງານ ຂອງໜ່ວຍພັກບໍລິຫານ ໄດ້ມີຄວາມສາມັກຄີເປັນປຶກແຜ່ນ, ຕັດສິນໃຈສູງຜ່ານຜ່າອຸປະສັກນາໆປະການ ປະຕິບັດໜ້າທີ່ການເມືອງທີ່ໄດ້ກໍານົດໄວ້ໃນມະຕິກອງປະຊຸມ ຄັ້ງທີ V ຂອງຄະນະພັກຮາກຖານ ລລທ ເວົ້າລວມ, ເວົ້າສະເພາະແມ່ນຈັດຕັ້ງປະຕິບັດບັນດາຄາດໝາຍທີ່ກໍານົດໄວ້ໃນມະຕິກອງປະຊຸມໃຫຍ່ ຄັ້ງທີ III ຂອງໜ່ວຍພັກບໍລິຫານ ໃຫ້ມີຜົນສໍາເລັດເປັນຢ່າງດີ ເປັນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມແຫ່ງຊາດ.

        ໃນວາລະກອງປະຊຸມ, ບັນດາສະມາຊິກພັກພາຍໃນໜ່ວຍພັກ ໄດ້ພ້ອມກັນນໍາໃຊ້ສິດປະຊາທິປະໄຕຂອງຕົນ ປ່ອນບັດເລືອກຕັ້ງເອົາຄະນະໜ່ວຍພັກ ຊຸດໃໝ່ ແລະ ເລືອກເອົາຜູ້ແທນສົມບູນ ແລະ ສຳຮອງ ເຂົ້າຮ່ວມກອງປະຊຸມໃຫຍ່ ຄະນະພັກຮາກຖານ ລລທ (ຈໍານວນຜູ້ແທນສົມບູນ 23 ສະຫາຍ ແລະ ສໍາຮອງ 7 ສະຫາຍ); ຜົນການປ່ອນບັດເລືອກຕັ້ງ ໄດ້ຄະນະໜ່ວຍພັກ ຊຸດໃໝ່ 3 ສະຫາຍ ຈາກຜູ້ສະໝັກ 5 ສະຫາຍ ເຊິ່ງກອງປະຊຸມຄັ້ງປະຖົມມະເລີກ ໄດ້ຕົກລົງເຫັນດີຮັບຮອງເອົາສະຫາຍ ນາງ ວິໄລວັນ ຍົດໄຊວິບູນ ​​ເປັນເລຂາໜ່ວຍພັກ, ສະຫາຍ ວິໄຊ ວິລະວົງ ເປັນຮອງເລຂາໜ່ວຍພັກ ທັງເປັນປະທານກວດກາ ແລະ ສະຫາຍ ນາງ ພິດສະໄໝ ແກ້ວມະນີ ເປັນກໍາມະການໜ່ວຍພັກ.

        ໃນຕອນທ້າຍກອງປະຊຸມ, ສະຫາຍ ສຸພົນ  ຈັນທະວີໄຊ  ຄະນະບໍລິຫານງານພັກກະຊວງ ເຕັກໂນໂລຊີ ແລະ ການສື່ສານ, ເລຂາຄະນະພັກຮາກຖານ ລລທ ໄດ້ມີຄຳເຫັນສະແດງຄວາມຍ້ອງຍໍຊົມເຊີຍ ຕໍ່ຜົນງານຂອງໜ່ວຍພັກບໍລິຫານໃນໄລຍະຜ່ານມາ ພ້ອມທັງເນັ້ນໃຫ້ຄະນະໜ່ວຍພັກບໍລິຫານ ຊຸດໃໝ່ ເອົາໃຈໃສ່ໃນການແບ່ງງານ, ແບ່ງຄວາມຮັບຜິດຊອບໃຫ້ລະອຽດຈະແຈ້ງ ເພື່ອເປັນບ່ອນອີງໃນການເຕົ້າໂຮມຄວາມສາມັກຄີຂອງອ້າຍເອື້ອຍນ້ອງສະມາຊິກພັກ-ພະນັກງານໃນຂົງເຂດຄວາມຮັບຜິດຊອບຂອງຕົນໃຫ້ມີຜົນສຳເລັດໃນແຕ່ລະໄລຍະ, ເອົາໃຈໃສ່ ຕິດຕາມ, ກວດກາ, ຊຸກຍູ້ການເຄື່ອນໄຫວວຽກງານ, ເນັ້ນໜັກເຖິງ 6 ໜ້າທີ່ຂອງໜ່ວຍພັກ ໂດຍສະເພາະແມ່ນການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ເປັນໜ້າທີ່ກວມລວມ ແລະ ຢັ້ງຢືນເຖິງດ້ານດີ, ດ້ານກ້າວໜ້າ ແລະ ດ້ານອ່ອນ ໃນການເຄື່ອນໄຫວນໍາພາຂອງໜ່ວຍພັກຕົນ.