ຈຳນວນຜູ້ເຂົ້າຊົມ

   ທັງໝົດ: 12085420
wc   ປີກາຍ: 500014
wc   ປີນີ້: 575498
   ເດືອນແລ້ວ: 47520
   ເດືອນນີ້: 4582
   7 ວັນລ່າສຸດ: 1452
   ມື້ນີ້: 320
ພິທີມອບ-ຮັບໜ້າທີ່ ເລຂາຄະນະພັກ ລັດຖະມົນຕີ ກະຊວງແຜນການ ແລະ ການລົງທຶນ ຜູ້ເກົ່າ ແລະ ຜູ້ໃໝ່
ຈຳນວນຜູ້ອ່ານ: 53
ອະນຸມັດວັນທີ: 08/05/2024

ພາບ: ພິດສະໄໝ; ຂ່າວໂດຍ: ສ.ສົດໃສ

     ໃນວັນທີ 6 ພຶດ​ສະ​ພາ 2024 ຢູ່ທີ່ກະຊວງແຜນການ ແລະ ການລົງທຶນ ໄດ້ຈັດພິທີມອບ-ຮັບໜ້າທີ່ລະຫວ່າງ ທ່ານ ຄຳເຈນ ວົງໂພສີ ກໍາມະການສູນກາງພັກ  ເລຂາຄະນະບໍລິຫານງານພັກ, ລັດຖະມົນຕີກະຊວງແຜນການ ແລະ ການລົງທຶນ (ຜູ້ເກົ່າ) ແລະ ທ່ານ ປອ. ເພັດ ພົມພິພັກ ເລຂາຄະນະບໍລິຫານງານພັກ, ລັດຖະມົນຕີກະຊວງແຜນການ ແລະ ການລົງທຶນ (ຜູ້ໃໝ່) ໂດຍການໃຫ້ກຽດເຂົ້າຮ່ວມຂອງທ່ານ ສອນໄຊ ສີພັນດອນ ກໍາມະການກົມການເມືອງສູນກາງພັກ, ນາຍົກລັດຖະມົນຕີ, ມີທ່ານ ປອ. ວິສຸກ ພົມພິທັກ ຮອງຫົວໜ້າຄະນະຈັດຕັ້ງສູນກາງພັກ, ບັນດາທ່ານຮອງລັດຖະມົນຕີ, ຄະນະພັກ-ຄະນະນໍາ ພ້ອມດ້ວຍພະນັກງານ ກະຊວງແຜນການ ແລະ ການລົງທຶນ ແລະ ແຂກຖືກເຊີນຈາກພາກສ່ວນກ່ຽວຂ້ອງ ເຂົ້າຮ່ວມເປັນສັກຄີພິຍານ.

     ໃນພິທີດັ່ງກ່າວ, ທ່ານ ຄຳເຈນ ວົງໂພສີ ໄດ້ຂື້ນລາຍງານໂດຍຫຍໍ້ກ່ຽວກັບການນໍາພາ-ຊີ້ນຳວຽກງານແຜນການ ແລະ ການລົງທຶນ ໃນໄລຍະ 2 ປີກວ່າ ຊຶ່ງເປັນໄລຍະການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໄລຍະ 5 ປີ ຄັ້ງທີ IX (2021-2025)  ແລະ ຈັດຕັ້ງປະຕິບັດ 02 ວາລະແຫ່ງຊາດຄື: ວາລະແຫ່ງຊາດ ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ; ການຈັດຕັ້ງປະຕິບັດໜ້າທີ່ໂດຍພາຍໃຕ້ການຊີ້ນໍາຂອງກົມການເມືອງ, ລັດຖະບານ ແລະ ການຮ່ວມແຮງຮ່ວມໃຈອັນສຳຄັນຂອງຄະນະພັກ, ຄະນະນຳ ແລະ ສະມາຊິກພັກ-ພະນັກງານຂອງຂະແໜງແຜນການ ແລະ ການລົງທຶນ ພ້ອມກັນຈັດຕັ້ງປະຕິບັດທຸກໜ້າທີ່ວຽກງານທີ່ຂັ້ນເທິງມອບໝາຍໃຫ້ ເປັນຕົ້ນໄດ້ປັບປຸງກົງຈັກການຈັດຕັ້ງ ແລະ ພາລະບົດບາດຂອງກະຊວງ ແລະ ບັນດາກົມພາຍໃນກະຊວງ ໃຫ້ກະທັດຮັດ ແລະ ເຄື່ອນໄຫວມີປະສິດທິພາບ, ທັງໄດ້ສະເໜີ ແລະ ຮັບຮອງເອົາວັນທີ 20 ກຸມພາ 1976 ເປັນວັນສ້າງຕັ້ງກະຊວງແຜນການ ແລະ ການລົງທຶນ, ໄດ້ປັບປຸງກົນໄກ, ວິທີການ, ນິຕິກຳ ແລະ ເຄື່ອງມືຮັບໃຊ້ວຽກງານແຜນການ ແລະ ການລົງທຶນຂອງລັດໃຫ້ຄົບຖ້ວນ ແລະ ສອດຄ່ອງກັບເງື່ອນໄຂ ແລະ ສະພາບການໃນໄລຍະໃໝ່, ໄດ້ເປັນໃຈກາງຜັນຂະຫຍາຍແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ເປັນແຜນການປະຈຳປີ, ປະຈໍາໄຕມາດ ແລະ ສະຫຼຸບຕີລາຄາການຈັດຕັ້ງປະຕິບັດເປັນແຕ່ລະໄລຍະ ຕໍ່ລັດຖະບານ ແລະ ສະພາແຫ່ງຊາດໃນແຕ່ລະໄລຍະ;  ຄົ້ນຄວ້າຈັດສັນແຜນການລົງທຶນຂອງລັດໃຫ້ມີປະສິດທິຜົນຂຶ້ນ, ໄດ້ເປັນໃຈກາງແກ້ໄຂໜີ້ສິນການລົງທຶນຂອງລັດຕາມນະໂຍ ບາຍຂອງລັດຖະບານ ແລະ ທັງມີຜົນສຳເລັດໃນຫຼາຍດ້ານຕາມພາລະບົດບາດ, ໜ້າທີ່ຂອງກະຊວງນັບມື້ນັບໄດ້ຮັບການປັບປຸງດີຂຶ້ນເທື່ອລະກ້າວ. ຈາກນັ້ນ, ໄດ້ເຊັນບົດບັນທຶກມອບ-ຮັບໜ້າທີ່ ເລຂາຄະນະບໍລິຫານງານພັກ, ລັດຖະມົນຕີ ກະຊວງແຜນການ ແລະ ການລົງທຶນ ຜູ້ເກົ່າ ແລະ ຜູ້ໃໝ່.

     ໃນໂອກາດມີຄວາມໝາຍຄວາມສຳຄັນນີ້, ທ່ານ ສອນໄຊ ສີພັນດອນ ກໍາມະການກົມການເມືອງສູນກາງພັກ, ນາຍົກລັດຖະມົນຕີ ໄດ້ສະແດງຄວາມຍ້ອງຍໍຊົມເຊີຍຜົນງານທີ່ກະຊວງແຜນການ ແລະ ການລົງທຶນ ຍາດມາໄດ້ໃນໄລຍະຜ່ານມາ ຊຶ່ງຜົນສໍາເລັດທີ່ຍາດມາໄດ້ນັ້ນ ພາຍໃຕ້ການນໍາພາຂອງຄະນະພັກ, ຄະນະນໍາຂອງກະຊວງແຜນການ ແລະ ການລົງທຶນ ໂດຍແມ່ນສະຫາຍ ຄໍາເຈນ ວົງໂພສີ ເປັນຜູ້ນໍາໜ້າ ໄດ້ນໍາພາຈັດຕັ້ງປະຕິບັດພາລະບົດບາດ ໃນການເປັນເສນາທິການໃຫ້ແກ່ລັດຖະບານ ໃນການຄຸ້ມຄອງມະຫາພາກກ່ຽວກັບວຽກງານແຜນການ ແລະ ການລົງທຶນ, ວຽກງານສະຖິຕິແຫ່ງຊາດ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ເຂດເສດຖະກິດພິເສດ ໃນຂອບເຂດທົ່ວປະເທດ; ທ່ານ ນາຍົກລັດຖະມົນຕີ ໄດ້ເນັ້ນໃຫ້ຄະນະນຳ ແລະ ພະນັກງານທັງໝົດຂອງກະຊວງແຜນການ ແລະ ການລົງທຶນ ກໍາແໜ້ນພາລະບົດບາດໜ້າທີ່ຂອງກະຊວງແຜນການ ແລະ ການລົງທຶນ ເພື່ອເພີ່ມທະວີຄວາມຮັບຜິດຊອບໃນການປະຕິບັດໜ້າທີ່ການເມືອງຂອງຕົນໃຫ້ສູງຂຶ້ນ, ເພີ່ມທະວີຄວາມສາມັກຄີພາຍໃນ ໄປຄຽງຄູ່ກັບການປັບປຸງແບບແຜນວິທີເຮັດວຽກ ແລະ ວິທີນຳພາຂອງຄະນະພັກໃຫ້ຮັບປະກັນລັກສະນະວິທະຍາສາດ ແລະ ເລັ່ງໃສ່ແກ້ໄຂບັນຫາຕົວຈິງຂອງກະຊວງແຜນການ ແລະ ການລົງທຶນ, ສ້າງການຫັນປ່ຽນແຂງແຮງເລິກເຊິ່ງ ແລະ ຮອບດ້ານ ຕາມຈິດໃຈມະຕິກອງປະຊຸມໃຫຍ່ ຄັ້ງທີ XI ຂອງພັກ, ຈັດຕັ້ງປະຕິບັດວຽກງານຕາມຫຼັກການລວມສູນປະຊາທິປະໄຕ, ຄົ້ນຄວ້າຕົກລົງບັນຫາສຳຄັນຕ່າງໆເປັນໝູ່ຄະນະ, ມີການຕິດຕາມ-ກວດກາ, ຊຸກຍູ້ ມີການປະເມີນຜົນເປັນປົກກະຕິ ເພື່ອສົ່ງເສີມຜົນສຳເລັດ ແລະ ແກ້ໄຂບັນຫາທີ່ຄົງຄ້າງໃຫ້ທັນເວລາ; ສືບຕໍ່ແກ້ໄຂຜົນຂອງການດຳເນີນຊີວິດການເມືອງກາງສະໄໝ ຂອງຄະນະບໍລິຫານງານພັກ ກະຊວງແຜນການ ແລະ ການລົງທຶນ ໃຫ້ໄດ້ຮັບຜົນດີກວ່າເກົ່າ; ເປັນຕົ້ນແມ່ນຄຳສະເໜີ ຕໍ່ການນໍາພາລວມຂອງຄະນະພັກ ແລະ ຄຳຕຳນິສົ່ງຂ່າວຂອງສະມາຊິກພັກຕໍ່ບຸກຄົນ ຄະນະພັກ, ຫາງສຽງໃດຍັງບໍ່ແຈ້ງ ໃຫ້ສືບຕໍ່ກວດກາ ເພື່ອແກ້ໄຂ, ຄະນະນໍາ ກະຊວງແຜນການ ແລະ ການລົງທຶນ ຕ້ອງເຊີດຊູຄວາມເປັນແບບຢ່າງນຳໜ້າກວ່າໝູ່, ເປັນຫຼັກແຫຼ່ງທີ່ແຂງແກ່ນ; ຄະນະນໍາເຂັ້ມແຂງ ຈຶ່ງຈະນຳພາເຕົ້າໂຮມຄວາມສາມັກຄີພາຍໃນ ແລະ ໃຫ້ເປັນກຳລັງແຮງສືບຕໍ່ນຳພາທົ່ວຂະແໜງການຂອງຕົນ, ສູ້ຊົນປະຕິບັດບັນດາຄາດໝາຍທີ່ກຳນົດໄວ້ ໃນມະຕິກອງປະຊຸມໃຫຍ່ ຄັ້ງທີ IV ຂອງອົງຄະນະພັກກະຊວງແຜນການ ແລະ ການລົງທຶນ ໃຫ້ບັນລຸຕາມຄາດໝາຍທີ່ວາງໄວ້, ນໍາພາ-ຊີ້ນໍາ ການກະກຽມການດຳເນີນກອງປະຊຸມໃຫຍ່ 3 ຂັ້ນຂອງພັກ ຢູ່ໃນສາຍໄຍການຈັດຕັ້ງຂອງກະຊວງແຜນການ ແລະ ການລົງທຶນ ດ້ວຍການເຊື່ອມຊຶມ, ກຳແໜ້ນເນື້ອໃນ ແລະ ວິທີການຈັດຕັ້ງປະຕິບັດໃຫ້ມີຂະບວນຟົດຟື້ນ ແລະ ຮັບປະກັນຄຸນນະພາບ ໂດຍເອົາໃຈໃສ່ສ້າງແຜນກຳນົດພະນັກງານນຳພາ-ຄຸ້ມຄອງ ເພື່ອກະກຽມບຸກຄະລາກອນໃຫ້ແກ່ການດຳເນີນກອງປະຊຸມໃຫຍ່ຂອງອົງຄະນະພັກກະຊວງແຜນການ ແລະ ການລົງທຶນ ທີ່ຈະໄຂຂຶ້ນໃນຕໍ່ໜ້ານີ້. ພາຍໃຕ້ການນຳພາຂອງຄະນະພັກ ຄະນະນຳກະຊວງ ໂດຍມີທ່ານ ປອ. ເພັດ ພົມພິພັກ ເລຂາຄະນະບໍລິຫານງານພັກ, ລັດຖະມົນຕີກະຊວງແຜນການ ແລະ ການລົງທຶນ ຜູ້ໃໝ່ ເປັນຜູ້ນຳໜ້າ ຈະສາມາດນຳພາສ້າງໄດ້ຜົນງານໃໝ່ ກ້າວສູ່ຜົນສຳເລັດໃໝ່ຢ່າງຕັ້ງໜ້າ.